Riha – Di pêşengiya Platforma Saziyên Demokratîk de ji bo rojbûna Rêberê Gelê Kurd Abdullah Ocalan ê 4’ê Nîsana 1949’an li gundê Amara yê Xelfetiya Rihayê hat cîhanê bi deh hezaran kes ji bo sala 76’emîn a rojbûnê pîroz bikin berê xwe dan Xelfetiyê. Bi şiara  “Bi rêbertiya azad ber bi civaka demokratîk” ve bi deh hezaran kes ji Kurdistan û gelek bajarên Tirkiyeyê bi otobus û wesayîdên taybet, ber bi Xelfetiyê ve ketin rê. Bi hezaran kesên ku di saetên sibehê de gihîştin cihê ketina navçeyê, her çendî di rê de rastî gelek astengiyan hatin jî hem bi meşa ku li dar xistin, hem jî bi mihrîcanê dîmenên rengîn derxistin holê.

Girse di saetên sibehê de gihîşt ketine navçeyê!

Girseya ku di saetên serê sibehê de gihîşt ser riya navçeyê, rastî dorpêça leşkeran hat. Qedexeya çalakiyan a walîtiyê hincet hat nîşandan û riya ku 25 km. ji navçeyê re mabû bi bariyeran hat girtin û nehiştin rojnamger dîmenên welatiyên ku bertek nîşanî girtina rê dan bikşînin. Girseya ku xwest bimeşe ber bi bariyeran ve çû, heyeta ku zêdetirî wê jin bûn, bi tilîlî û govendê astengiyê şermezar kirin. Piştî biryardariya gel, bi hinceta “rê digrin” xwestin wesayîdên welatiyan ji wê derê rakin lê ev pêkanîn jî bi kêr nehat, bi muzakereyan heyet û girse ketin navçeyê.

Qad bû cihê coş û rengîniyê

Welatiyên ku ber bi qada mihrîcanê ve çûn, bêyî ku ji ber baranê rawestin, li qadê govend gerandin. Di mihrîcana ku beşdariya ciwanan zêde bû de, jinên ciwan bi hev re govend gerandin û dirûşmên “Em bi zextan nawestin” avêtin. Li qada ku kêliyên bi coş hatin jiyîn dayikan bi cilên xwe yên neteweyî û şalên bi rengên kesk, sor û zer qadê rengîn kirin. Dayikên ku bi dirûşm û hêvî ketin qadê, ji aliyê ciwanan ve bi tilîlî hatin pêşwazîkirin. Tevî bêxewî û hewaya cemidî girseyê bi saetan goveng gerand, heta derengiya şevê li qadê ma.

Tevî mudaxele û astengiyan jî gel ket navçeyê

Li qada festîvalê bi hezaran kes, bi govendê li benda roja 4’ê Nîsanê man, kesên ku hê bi rê de bûn dixwestin werin navçeyê jî bi hinceta biryara qedexeyê hatin rawestandin. Ciwan û welatiyên ku pêşiya wan bi bariyeran hat girtin, dema ku xwestin astengiyan şermezar bikin, rastî êrîşa bi gaza îsotê û ava bi şid hatin. Ji ber êrîşê qad bi gaza îsotê hat dagirtin, di dema mudaxeleyan de gelek kesên ku dayik û ciwan jî di navberê de hebûn birîndar bûn. Piştî mudaxeleyê jî girse ji cihê xwe tevnegeriya, li pêşiya bariyeran kom bû. Piştî kombûnê girse rastî lêgerîna bi GBT’ê hat.

Ji bo ciwanan peyama biryardariyê

Welatiyên ku heta navçeyê ji sê bendên lêgerînê û GBT’ê derbas bûn, piştî saetan gihîştin qada mihrîcanê. Girseya ku ji saetên sibehê ve hat rawestandin li dora saet 19.00 de ket navçeyê. Ciwanên ku bi meşê hatin cihê mihrîcanê, wêneyên Mustafa Dag û Mehsûm Karaoglan ên sala 2009’an di meşa Amarayê de hatibûn kuştin hilgirtin. Ciwanên ku bi dirûşman ketin qadê, ji aliyê girseyê ve bi guleyên hewayî hatin pêşwazîkirin. Piştî pêşwazîkirinê, peyama Rêberê Gelê Kurd Abdullah Ocalan a di hevdîtina 31’ê Adarê de li Îmraliyê ji bo ciwanan şand hat xwendin. Di peyama ku ji aliyê xortekî ciwanên DEM’ê ve hat xwendin de bal hat kişandin ser xebat û biryardariya ciwanan. Ciwanên ku bi baldarî li peyamê guhdarî kirin, di dawiyê de çepik lêdan û dirûşmên “Biji Serok Apo” qîriyan.

Dayikan findên pasteyê vemirandin

Pasteya bi teşeyê ala Kurdistanê jî li qadê di destên dayikan de hat gerandin. Findên pasteyê bi hêviya aştî û azadiyê ji aliyê dayikan ve hatin vemirandin û vê kêliya dîrokî bi flaşên telefonan veguherîn şahiyê.

Bi heyecana ji bo meşê li benda sibehê man

Mihrîcana ku bi deh hezaran kes beşdar bûn, di saetên şevê de bi derketina hunermendan domiya. Bi hezaran mirovên ku guh nedan westandin û bêxewiyê, qada mihrîcanê neterikandin. Gel bi heyecana ji bo meşa roja 4’ê Nîsanê, roja 3’yê Nîsanê tevî dorpêç û astengiyan, bi hêvî û biryardarî derbas kir.