Enqere- Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari di civîna Koma Jinan a Meclisê ya partiya xwe de mijarên di rojevê de nirxand. Jinên tevli Nobeta Edaletê bûn û endamên Înîsiyatîfa Dayikên Aştiyê û Dayikên Şemiyê jî tevlî civînê bûn. Dayikên laçikspî dovîzên ‘Tecrîd sûcê li dijî mirovahiyê ye’ û ‘Deng bide grevên birçîbûnê’ hilgirtin. Tulay Hatîmogûllari di destpêka axaftina xwe de êrişa li dijî Dêra Santa Marîayê şermezar kir û got ku ew li gel xelkê û Xiristiyan in.

Nobetên Edaletê

 Tulay Hatîmogûllari diyar kir ku pirsgirêka sereke ya Tirkiyeyê pirsgirêka Kurd e û got: “Divê ev pirsgirêk bi rêbazên demokratîk bê çareserkirin. Dayîkan jî ji ber vê yekê dest bi Nobeta Edaletê kirine. Mixabin desthilat bi çek, tank, top, SÎHA û ÎHA’yan bersivê dide vê daxwaza birûmet a gelê Kurd. Tecrîda girankirî ya li ser birêz Ocalan bi sala ye didome. Ji bo protestokirina vê rewşê jî girtiyên siyasî dest bi greva birçîbûnê kirin. Ji bo piştgiriya vê çalakiyê jî li Tirkiye û Kurdistanê dayik nobetên edaletê digirin. Daxwaza wan jî ewe ku pirsgirêka Kurd bi rêyên demokratîk çareser bibe, tecrîd were rakirin û azadiya fîzîkî ya birêz Ocalan e.”

Ji bo meşa Azadiyê bang

  Tulay Hatîmogûllari di berdewamiya axaftina xwe de bal kişand ser ‘Meşa Mezin a Azadiyê’ ku wê ji bo rakirina tecrîda li Îmraliyê, çareserkirina pirsgirêka kurd bi rêyên demokratîk û azadiya fîzîkî ya Abdullah Ocalan, partiyên siyasî û rêxistinên girseyî yên demokratîk di navbera 1-15’ê sibatê de li dar bixin û wiha dom kir: “Meşa Mezin a Azadiyê ku dê di 1’ê sibatê de weke du baskan li Qers û Wanê dest pê bike, dê heta 15’ê sibatê bidome. Armanca vê meşê û ya ji çalakiyên greva birçîbûnê û nobetên edaletê heman e. Armanc, rakirina tecrîdê, çareserkirina pirsgirêka kurd bi rêyên demokratîk e. Her wiha di vê meşê de her cihê em digihijinê dê bi jin, kedkar û karkeran re hevdîtinan bikin. Weke DEM Partiyê em jî dê cihê xwe di meşê de bigirin. Ne tenê em, nivîskar, rewşenbîr û nûnerên hêzên demokrasiyê jî dê di vê meşê de li cem me cih bigirin.”

‘Divê pêvajoya muzakereyê dest pê bike’

  Tulay Hatîmogûllari bertek nîşanî tecrîda li ser Rêberê PKK’ê Abdullah Ocalan da û tecrîd weke “sûcê li dijî mirovahiyê” pênase kir û got: “Weke DEM Partiyê em careke din banga guftûgo û muzakereyan dikin. Tevahiya hemwelatiyên Tirkiyeyê ji vî şerî bibandor dibin. Ji bo serî bi Kurdan bidin tewandin plana têkbirinê xistin meriyetê. Lê li çar parçeyên Kurdistanê jî ev plan têk çû. Gelê Kurd serî netewand û li her çar parçeyan xwe hêj bêhtir birêxistin kir û dikare dengê xwe bigihîne hemû cîhanê. Hûn bi tu awayî nikarin vê berxwedanê têk bibin.

 Rûsya, Ûkrayna, Îsraîl, Filistîn, Sûriye, Rojava, Iraq, Herêma Federe ya Kurdistanê, Îran, Pakistan pir tevlihev in. Lûleyên keştiyên li Behra Sor bi cih bûn, li gelan zivirîne. Hewl didin şer berfireh bikin. Herêma bi şerekî dijwar re rû bi rû ye. Tirkiye nikare xwe ji vê hevkêşeyê xelas bike. Lewma em dibêjin pirsgirêka kurd çareser bikin da ku li dijî atmosfera şer em bi hev re bisekinin. Binêrin, heke em bi hev re nebin, em ê li dijî êrişên kûrewî têk biçin.

 Bi taybet jî banga min ji bo partiya desthilatê; heke em bi hev re nebin, em ê li dijî êrişên kûrewî têk biçin. Li girtîgehan, nobetên edaletê û Meşa Mezin a Azadiyê dê dengê demokrasiyê bilind bibe. Dê daxwaza aştiyê derkeve pêş. Werin em bi hev re deng bidin vî dengî. Li dijî aqilê mêr ê banga şer dike, divê em em jin cisareta avakirina aştiyê bêhtir mezin bikin. Banga min ji bo jinên li rojavayê Tirkiyeyê ye; heta ku li welêt şer hebe, zexta li welêt zêde dibe. Demokrasî, mafên jinan, mafên mirovan û mafên xwezayê tên paşguhkirin. Me ber bi rewşekî wisa ve dibin ku em nema dikarin qala wan jî bikin. Jin bêhtir rastî tundiyê tên û cînayetên jinan zêdetir dibin. Îcar ser re jî xizaniya em dijîn heye. Em bi xizaniyeke mezin re rû bi rû ne. Dema em li dijî vê derdikevin jî ji me re dibêje ‘hûn terorîst in.’”

‘Werin em jin bi hevre pirsgirêkan çareser bikin’

 Tulay Hatîmogûllari bang li jinan kir û got: “Li vir dixwazim bang li jinên Tirk bikim; dayikên kurd destê aştiyê dirêjî we dikin. Dibêjin; ‘werin em bi hev re pirsgirêka Kurd çareser bikin.’ Heke em jin bi destê hev bigirin, em dikarin vê dijminatiya li dijî Kurdan a hatiye hînkirin bidin aliyekî û aştiyê pêk bînin. Werin em jin di mijara aştiyê de bêhtir bibiryar bin û bêhtir biîrade bin. Em bi hev re çekan binax bikin. Li xakên Anatoliya û Mezopotamyayê bila dara aştiyê mezin bibe.  Hefteyek berê li Nexweşxaneya Yedîkule ya Stenbolê bijîşekî êrişa zayendî li dijî hemşîreyê kir. Tevî hemû delîlan û qebûlkirina faîl jî, hewl dan faîl mafdar derxînin. Çendek roj berê jî Ayşegul li Enqereyê hate qetilkirin. Gelo ma em li benda qetilkirina çend jinan e? Gelo dê hêj mirina çend jinan ji hêla daraza mêr ve bê temaşekirin? Divê ev mijar bibe mijara komxebatan lê li pey mafe nefeqeyê ketine. Jinên hêja em jin bo bijîn hene. Ne ji bo ku ji hêla mêran ve bên qetilkirin. Heke mafê jiyanê nebe, tu wateya mafên din nîne. Em jin dê ji bo jiyana xwe hev bigirin. Em ê xwe birêxistin bikin û bi hev re bi ser kevin.”

Hilbijartinên xwecihî

  Tulay Hatîmogûllari bal kişand ser hilbijartinên xwe cihî û wiha dom kir: “Em di erefeya hilbijartina xwecihî de ne. Weke ku hûn jî dizanin me pêşhilbijartineke xurt li dar xist. Gelemperiya namzetên hevşaredarî û meclisên şaredariyan gel bi xwe hilbijartin. Li Amedê bernameya danasîna namzetan hebû. Bi wê coş û enerjiyê hatim. Me li wê eywanê vîna gel dît. Me li wê eywanê dît ku weke DEM Partiyê me demokrasî nîşanî Tirkiye û gelên cîhanê da.

 Dema danasîna namzetan de ji bo me mijareke jêneveger heye ku ew jî xebata xweser a jinan e. Hemû jinan cilên rengîn li xwe kiribûn. Her yek ji wan kevneşopiya xwe temsîl dikir. DEM Partî ev e. DEM Partî Anatoliya ye, Mezopotamya ye, Tirkiye ye. DEM Partî roniya çavên jinan, vî gelî û Tirkiyeyê ye.

‘Emê Qeyûman bişînin’

  Em ê bi saya xwedîderketina gel û jinan qeyûman bişînin. Serokê Giştî yê AKP’ê dibêje; ‘di îktîdara me de em li gorî helwesta siyasî nêzî şaredariyan nebûn.’ Erê baş e lê ma ev qeyûm ji fezayê hatine? Yên ku rêzê ji bo tercîha siyasî ya gel nagirin ew in. Dema van derewan dikin jî qet rûyê wan sor nabe. Mereq nekin em ê di 31’ê Adarê de bi serkeftineke mezin bersivê bidin wan.

 Banga min ji bo jinên ku DEM Partiyê baş nas nakin ev e; ji kerema xwe yek bi yek hemû xebatên DEM partiyê bişopînin. Hema hema tekane partiye ku ji bo jinan xebatên sosyal dimeşîne. Divê jin bêhtir xwedî li vê partiyê derkevin. DEM Partî dê were dewran dê biguhere. Dirûşma me ya kampanyayê ya nû jî ev e. Em ê bên, jin dê bên, ciwan dê bên, karker dê bên, kedkar dê bin, dayikên aştiyê dê bên.”