Beyrûd – Meclîsa Jinê ya Partiya Yekîtiya Demokratîk (PYD), li Lûbnanê duyemîn civîna xwe ya salane li dar xist û geşedanên siyasî û civakî yên li herêmê nirxand. Di nava mijarên sereke yên civînê de, xurtkirina rola jinan di civakê de û zêdekirina beşdariya wan a çalak di qadên cuda de jî cih girt.

Civîn, bi dirûşmeya "Rêxistinbûna Jin û Civakê, Mîsogeriya Azadiya Fîzîkî ya Rêber Apo ye" hate lidarxistin. Gelek endamên dîasporaya Kurd, endamên Kongreya Star û nûnerên PYD’ê ya Lûbnanê beşdarî civînê bûn.

Di civînê de peyamên Abdullah Ocalan ên der barê xebatên rêxistinbûnê û rola jinan a di civakê de hate xwendin. Di peyamên Ocalan de, hate destnîşankirin ku bihêzkirina jinan û civakê ji bo avakirina pergalek federal a demokratîk şert û mercê bingehîn e.

‘Serhildana "Jin Jiyan Azadî" di têkoşîna rizgariya jinê de xaleke dîrokî ya werçerxê ye’

Axaftina vekirinê ya civînê ji aliyê berpirsa Meclîsa Jinê ya PYD’ê û endama partiyê Rêvan Muhammed ve hate kirin. Rêvan Muhammed, destnişan kir serhildana "Jin Jiyan Azadî" di têkoşîna rizgariya jinan a li Rojhilata Navîn de xaleke dîrokî ya werçerxê ye û diyar kir ku di çarçoveya têgeha "Jinolojî" de armanca vê pêvajoyê fêmkirina jiyan, maf, berpirsiyariyên jinan û cihê wan di avakirina civakê de ye.

Di berdewamiya civînê de geşedanên siyasî û rêxistinî hatin nîqaşkirin. Piştre rapora çalakiyên salane ya Meclîsa Jinê hate pêşkêşkirin û xebatên girîng ên sala borî hatin kirin hatin nirxandin. Bi taybetî rola rêxistinî ya jinan di çalakiyên neteweyî û civakî de û beşdariya wan di ruhê berxwedana civakî de hate destnîşankirin.

Civîn, bi nîqaşkirina pêşniyar û planên nû yên pêşerojê ji bo xurtkirina rêxistinên jinan bi dawî bû. Di vê çarçoveyê de, biryar hate dayîn ku rêbazên xebatê ji nû ve werin nirxandin ku hişmendiya rêxistinî ya endaman were bilindkirin û rola jinan li Lûbnanê were zêdekirin.

‘Têkoşîna jinan dê li ser xeta azadiyê ya Abdullah Ocalan pêşxistiye bidome’

Piştî civînê, Rêvan Mihemed balkişand li ser girîngiya ku civîn di 6’emîn salvegera şehadeta Sekretera Giştî ya Partiya Pêşerojê ya Sûriyeyê Hevrîn Xelef hatiye li dar xistin. Rêvan Mihemed, destnîşan kir ku Hevrîn Xelef sembola nasnameya jina berxwedêr e û diyar kir ku divê jinên Kurd bi nirxên azadî û berxwedanê ve girêdayî bibînin. Rêvan Mihemed, diyar kir ku têkoşîna jinan dê li ser xeta azadiyê ya ku Abdullah Ocalan pêşxistiye bidome.

Rêvan Mihemed, di berdewamiya axaftina xwe de ragihand ku di civînê de polîtîkayeke xebatê ya nû ya bi armanca bilindkirina têkoşîna jinan ji bo misogerkirina azadiya fîzîkî ya Abdullah Ocalan hatiye nîqaşkirin. Rêvan, diyar kir ku ji bo xurtkirina rêxistinên jinên Kurd li Lubnan, dîasporayê û parastina nasnameya çandî ya Kurd planên pêşerojê tên çêkirin.

Banga tevlîbûna modernîteya demokratîk

Rêvan Mihemed, bang li jin û jinên ciwan kir: "Ji şêwaza jiyana ku modernîteya kapîtalîst ferz dike dûr bikevin û tevlî modernîteya demokratîk bibin. Ev rêya di avakirina civakek azad û hevseng de rola jinan bingeh digre, rêya me ye."