Navenda Nûçeyan- Zarokên li El Faşêrê rasterast bandorên şer dijîn. Bi sedan zarok bêyî malbatên xwe gihîştin kampên penaberan û di şert û mercên birçîbûn, qelsî û tîbûnê de dijîn. Gelek zarok ji ber windakirina malbatên xwe yan jî şahidiya tundiyê ya di dema reva xwe de travmaya derûnî dijîn.

Neteweyên Yekbûyî, di daxuyaniya xwe ya îro de ragihand ku di meha Cotmehê de li bajarê El Faşêrê yê li Darfura Rojava pêleke mezin a koçberiyê çêbûye, piştî ku Hêzên Piştgiriya Lezgîn bajar xistin bin kontrola xwe, zêdetirî 100 hezar kes neçar mane birevin.

NY’ê, ragihand ku bi sedan zarok bêyî malbatên xwe gihîştine kampên penaberan. UNICEF’ê, ragihand ku di navbera rojên 26’ê Cotmehê û 22’ê Mijdarê de 354 zarok, ji ber ku malbatên xwe winda kirine, xizmên wan hatine qetilkirin an jî hatine binçavkirin, bi tena serê xwe gihîştine kampa Tawaylayê. Ev agahî ji aliyê ABC News’ê ve hatin ragihandin.

Konseya Penaberan a Norwêcê, ragihand ku herî kêm 400 zarok bêyî malbatên xwe gihîştine kampa Tawaylayê û hinek zarok bi alîkariya xizm, cîran an jî xerîban hatine kampê. Piraniya zarok birçî ne û lawaz in. Her wiha di hinek zarokan de nîşaneyên travmaya derûnî,  fikar, girîna domdar, bêdengî, vekişîna hundirê xwe, xewnên tirsnak û tevgerên şer, hatine dîtin.

Li gorî Rêxistina Tenduristiyê ya Cîhanê, di pevçûnan de herî kêm 40 hezar kesan jiyana xwe ji dest dan û 12 milyon kes jî ji cih û warên xwe bûn. Ajansên alîkariyê, diyar dikin ku dibe hejmara rastîn zêdetir be.