Hesekê – 4’ê Nîsanê rojbûna Rêberê Gelê Kurd Abdulah Ocalan li Hesekê ya Kantona Cizîrê ya Bakur û Rojhilatê Sûriyeyê bi pêşengiya Kongra Star bi şahiyekê hat pîroz kirin.

Şahî li parka 4’ê Nîsanê ya bajarê Hesekê hat pîrozkirin.

Piştî deqeyek rêzgirtin, Endama Kordînasyona Kongra Star Nahid Silêman axivî. Nahîd Silêman bal kişand ku 4’ê Nîsanê îfadeya vejîna gelê Kurd, jinan û tevahî gelên bindest e û destnîşan kir ku ew ê bi xwedî derketina li banga dîrokî ya Abdullah Ocalan xebatên xwe li ser bingehê azadiyê bimeşînin. Nahîd Silêman destnîşan kir ku ew ê têkoşîna xwe bilind bikin û azadiya fîzîkî ya Abdullah Ocalan pêk bînin.

Paşê Endama Yekîtiya Jinên Ciwan Losnak Kavoriyan axivî. Losnak Kavoriyan da zanîn ku fikir û ramanê Abdullah Ocalan ronahî daye jiyana her mirovekî û wiha got: “Fikir û ramanê Rêber Ocalan ji bo tevahî mirovahiyê xelasiya ji bindestî û koletiyê ye. Ji bo wê 4’Nîsanê em weke zayîn û xelasiya mirovahiyê pênase dikin. Rêber Apo ji bo jinan fedekariyek mezin kir û bi birdoziya xwe hemû jinan ji bendên koletiyê xelas kir. Ji bo wê îro erka me wekî jinên ciwan xwedî derketina li vê birdoziyê ye. Heya azadiya fîzîkî ya Rêber Apo em ê têkoşîna xwe bilind bikin.”

Pîrozbahî  bi coş û bi gerandina dîlanan li ber Koma Serdem, Koma Tolhildan û Koma Hîlala Zêrîn û Koma Zîlan dewam kir.