Navenda Nûçeyan-Koordînasyona Kongra Star, ji bo bîranîna Şîlan Kobanê (Meysa Baqî), Fuat (Hîkmet Tokmak), Zekeriya Toros (Zekeriya Îbrahîm), Ciwan Kobanî (Haci Cuma Alî) û Cemîl Nebo (Nebo Elî) daxuyaniyek da. Koordînasyona Kongra Star bi bîr xist ku 5 rêheval di sala 2004’an de dema ku ji bo kar û xebatên PYD’ê bipêş bixin berê xwe dane qada Rojava.

‘Em deyndarên van rêhevalan in’

Kongra Star da zanîn ku 5 rêhevalên wan di encama komployekê ku ji aliyê rejîma Baasê ve hatî kirin de li ser sînorê Rojava û Iraqêde hatine qetilkirin û wiha domand: “Em her 5 rêhevalên xwe bi rêzdarî bibîr tînin û soza layîqbûyîna bîranîna wan dûbare dikin. Ji beriya her tiştî em bi baldarî viya dibêjin ku, îro eger em li ser xakên xwe yên azad dijîn, bûne xwedî nasnameya xwe, di nava Rojhilata Navîn de û cihanê de bûne xwedî gotin, wek jin eger îro em bi rêxistin kirine, em deyndarê rêhevalên weke Şîlan Kobanê ne. Ji ber ku di demeke herî zehmet de ku êrîşên rejîma Sûrî bi hemû awayên xwe rasterast li ser gelê Kurd pêk dihat, ku nedihişt xebatek ji bo demokratîkbûyîna Sûriyeyê bimeşe, van rêhevalan bi dildarî, wêrekiyeke mezin, di nava van xakan de kar û xebat meşandin.”

‘Şoreşa Rojava li ser keda rêheval Şîlan kêlî bi kêlî  hatiye hûnandin’

Kongra Star destnîşan kir ku Şîlan Kobanê ji Helebê heta Şamê ked daye û wiha domand: “Îro ji me re hîmê şoreşê ava kiriye. Em dizanin ku Şoreşa Rojava li ser keda rêheval Şîlan kêlî bi kêlî  hatiye hûnandin ve hatiye avakirin. Rêheval Şîlan hîn di temenê xwe yê biçûk de eleqeyek ji bo fikrên Serok Apo bipêş xistibû. Ji xwe re weke xeyaleke mezin didît ku ew li pey fikrên Serok Apo bibe şervanek azadiyê. Dema ku ev derfet ket destê wê jî, yêkser ji Helebê heta Şamê tevlî kar û xebatan bû ku gelê xwe ji zilma rejîma Baasê rizgar bike. Di vê çerçoveyêde li Efrîn û Helebê di nava xwendekaran de xebatên şoreşê dimeşîne. Di nava gel de her wiha di nava ciwanan de gelek tê hezkirin û bi bandor dibe.”

‘Bi têkoşîna van rêhevalên me îradeya azad biser ket, dîktatorî têk çû’

Kongra Star diyar kir ku di sala 2004’an de Şîlan Kobanê dema ku ji bo kar û xebatên PYD bipêş bixin tevî 4 rêhevalên xwe berê xwe daye qada Rojava û derbarê qetilkirina wan de ev agahî dan: “Lê di encama komployekê ku ji aliyê rejîma Baasê ve hatî kirin de li ser sînorê Rojava û Iraqê tên şehîdxistin.  Tenê sedemek hebû ji bo hedefgirtina wan. Ew jî, pêşîgirtina li têkoşîna gelê Kurd ê Rojava bû. Rejîma Sûriyeyê di şûna ku ji guhertin û diyalogê re vekirîbe, rewşa xwe a hundirîn bi gelan re di nava wekhevî û aştiyê de çareser bike, rêxistinbûyîna xwe bi gelên di nava Sûriyeyê de ne re xurt bike, têkoşîna van rêhevalên me ji xwere xeterî dît. Lê belê dîmenê ku îro derketiye holê, nîşan dide ku bi  hezaran Şîlan, Fuad, Ciwan, Zekeriya, Cemîl mezin bûne, lê navê rejîma Baasê jî li holê nemaye. Ango bi têkoşîna van rêhevalên me, îradeya azad biser ket, dîktatorî têk çû.”

‘Ev xebat dê ji dîrokê re bibe mînakek’

Kongra Star balkişand ser rola Şîlan, Fuad, Ciwan, Zekeriya û Cemîl a di gihandina lûtkeya têkoşînê de û da zanîn ku ev rol tu caran nayê jibîrkirin. Kongra Star da zanîn ku her yek ji wan di demên herî krîtîk de kar û xebat meşandine û hiştine ku şoreşa Rojava û Bakûr û Rojhilatê Sûriyeyê mezintir bibe. Kongra Star diyar kir ku ev xebat dê bibe mînakek ji dîrokê re û daxuyaniya xwe wiha bidawî kir: “Bi hezaran kes îro li ser mîrasa wan dimeşin û şoreşê mezintir dikin. Em jî weke Kongra Star li ser hîmê rêheval Şîlan û rêhevalên pê re şehîd bûne, xwe mezin dikin. Emê ji bo ku layîqê têkoşîna wan bin, bi tevahî hêza xwe ve Şoreşa Rojava mezintir û xurttir bikin. Em dîsa rêhevalên xwe bibîr tînin û soza xwe ya ji bo wan nû dikin.”