Navenda Nûçeyan-Di daxuyaniya Koordînasyona KJK’ê de hat diyarkirin ku Rêberê Gelê Kurd Abdullah Ocalan riya azadî û aştiyê bi rengekî herî bi wate nîşanî jinan daye û wiha hat gotin: “Di çalakiyên 8’ê Adarê de divê daxwaza azadiya fizîkî ya Rêberê Apo bê kirin. Di sedsala 21’ê de têkoşîna azadiya jinan rasterast girêdayî paradîgmaya Rêber Apo û xeta azadiya jinan e.”

Daxuyaniya ku Koordînasyona KJK’ê di Roja Jinên Kedkarên Cîhanê 8’ê Adarê de bi sernavê “Ji bo jinên ku bi 8’ê Adarê re ber bi biharbûna jinan ve diçin” weşand, bi vî rengî ye:

“Em di bin siya şerê ku berdewam dike û qetlîamên li dijî  jinan û bi têkoşîna jinan a ku weke rojê li hemberî vê siyê xwe nîşan dide, pêşwaziya 8’ê Adarake din a nû dikin. Jin li dijî zîhniyet û pergala mêran a serdest ku hewl dide jinan û gelan tune bike, weke mizgîniya biharê hêviyê didin û jiyanê dixemilînin.

Em nikarin têkoşîna azadiyê ya jinan bi rojekê re sînordar bikin. Lê belê rojeke weke 8’ê Adarê ku bi sedan jin hatin şewitandin û qetilkirin, mezintirîn erka me jinan e ku divê em vê rojê veguherînên vejînekê û her roj di vê çarçoveyê de tevbigerin.

Têkoşîna jinan tekoşîna xweparastinê ye

Şerê Cîhanê yê 3’yemîn bi awayekî eşkere li dijî jinan nehatibû îlankirin lê belê şerekî nixumandî bû wisa jî bi rê ve çû. Her çend vê rastiyê bi hezaran derew, dek û dolaban veşêrin jî rewşa heyî rewşa şerekî  dijwar e. Ji ber vê yekê têkoşîna jinan di heman demê de têkoşîna xweparastina li hemberî vî şerî ye. Emerîka, welatên Ewropayê û gelek welatên cîhanê yên din a niha li hemberî tu dewletan ne di nava şerekî şênber de ne lê belê gava ku em li hejmara qetilkirina jinan, destdirêjî, qetilkirin û îstîsmara karî dinêrin, em bi hejmara windayên ku di kêliyên şer de jî pêk nehatine re rû bi rû dimînin. Ji bilî şerekî dijwar ne pêkan e ku em van hejmaran bi gotineke din pênase bikin.

Her wiha di van salên dawî de bi zêdebûna şerên netewedewletan û şerên navxweyî re, ev rewş di astên metirsîdar de derdikeve pêşiya me. Şerên li Kurdistan, Rojava, Filistîn, Ûkrayna, Sûdan, Yemenê, Nîjerya, Efxanistan, Îran, Azerbeycan, Ermenistan û li gelek welatên ku me navê wan bilêv nekirine asta qetlîamên li dijî jinan derdixin asteke bilindtir. Helbet li hemû welatên cîhanê li dijî van yekan di astên cuda de jî be jin têkoşîna xwe dimeşînin û ev hemû têkoşîn gelekî watedar û girîng in.

Li ber xwe bidin xwe û civaka xwe birêxistin bikin

Lê belê feraseta Şerê Cîhanê yê 3’yemîn weke feraseta serdest a mêran di meriyetê de ye û li her derê ji bo ku jinan û têkoşînê biçewisînin çi ji destên wan tê, dikin. Ji ber vê yekê 8'ê Adarê rojeke gelekî watedar û girîng e. Li dijî vê rastiya şerê heyî ku cîhanê talan û pûç dike em weke jinan divê sînorên netewedewletan ji xwe re weke astengî nebînin û wan derbas bikin, piştevaniya hev bikin, êşên xwe bi dengekî bilindtir biqîrin û xwe bigihîjînin hêza têkoşîn û birêxistinbûnê. Li dijî şerê ku ji aliyê dewletên xwedî zîhniyeta mêr ve hatine destpêkirin, li dijî pergala xwedî zîhniyeta mêr a global ku li dijî hemû jinan û gelan hatiye destpêkirin, li ber xwe bidin û xwe û civaka xwe birêxistin bikin, vê yekê ji bo xwe weke têkoşîna aştiyê ya roja me diyar bikin.

Zîhniyeta Şerê Cîhanê yê 3’yemîn girêdayî neteweperestî, zayendperestî, olperestî û zanistperestiyê şer dide destpêkirin û di çarçoveya vê yekê de dimeşîne. Ev zîhniyet hemû cihên ku lê ye pûç dike. Ji ber vê yekê jî di roja me ya îroyîn de feraset û têkoşîna jinan a aştiyê divê li dijî her cure neteweperestî, olperestî, zayendperestî û zanistperestiyê li ser hîmên demokratîk û paradîgmaya ekolojîk û azadparêziya jinan bi pêş bikeve. Divê em têkoşînê, li dijî neteweperestiyê neteweya demokratîk, li dijî olperestiyê baweriya demokratîk, li dijî zayendperestiyê jiyana azad a wekhev, li dijî zanistperestiyê jî Jinolojî û Zanista Azad berfirehtir bikin û astên têkoşîna xwe di vê çarçoveyê de bilindtir bikin.

Çalakiyên îsal divê di çarçoveya xwedîderketina azadiya fizîkî ya Rêber Apo de be

Rêber Apo 25 sal in li Îmraliyê di bin şert û mercên gelekî giran de tê dîlgirtin, riya azadî û aştiyê bi awayekî herî watedar nîşanî me jinan daye. Çalakiyên îsal ên 8’ê Adarê jî di heman demê de divê di çarçoveya bangkirin û xwedîderketina azadiya fizîkî ya Rêber Apo de be. Têkoşîna azadiya jinan a sedsala 21’ê rasterast girêdayî paradîgmaya Rêber Apo û xeta azadiyê ya jinan e.

Tevî ku em çaryeka ewil a sedsala 21’ê hêdî hêdî li dû xwe dihêlin, têkoşîna jinan divê feraseta aştiyê ya stratejîk, bi îdeolojî, polîtîka, birêxistinbûn û têkoşîna xwe, xweparastina xwe bi pêş bixin. Di vê 8’ê Adarê de li seranserê cîhanê divê em navê hemû jinên ku hatine qetilkirin bi bîr bînin, em astengiyên weke sînoran derbas bikin û dengê xwe bigihîjînin hev û bi feraseta Neteweya Demokratîk û Konfederalalîzma Demokratîk piştevaniya hev bikin. Divê li dijî vî şerê ku jinan û civakan pûç dike, em li her derê dengê xwe bilind bikin. Em li dijî êrîşên li ser jinan ên Boko Haramê yên li Nîjeryayê, yên Talîbanê yên li Efxanistanê, yên rejîma şerîetê yên li Îranê û faşîzma AKP’ê yên li Tirkiyeyê û dîsa li dijî destdirêjî, kuştin, îşkence, îstîsmarkirina ked û bedenê û heqaretên li dijî jinan ên li Sûdan, Yemen, Ûkrayna, Ermenistan, Brezîlya, Arjantîn, Meksîka, Şîlî û li hemû welatên cîhanê her cure êrîşan derxin holê û yekitiya têkoşîna jinan xurtir bikin.

Dewleta Tirk li dijî şoreşa jinan êrîşan dike

Li Rojava dewleta Tirk li dijî şoreşa jinan bi tolhildaneke mezin êrîşan dike, jinên ku têkoşîna azadiyê dimeşînin li Şengal, Mexmûr, Başûr, Bakur û heta Parîsê qetil dike. Li Efrîn, Serêkaniyê û qadên şoreşa jinan ku ji aliyê komara Tirk a faşîst ve hatiye dagirkirin, jin her roj rastî îşkenceyên giran tên û bi kuştinê re rû bi rû dimînin. Li Bakur li dijî destkeftiyên jinan bi her cure rêbazên şerê taybet û fizîkî hewl tê dayîn bê desteserkirin û tasfiyekirin. Girtîgeh bi jinên ku têdikoşin dagirtî ne. Her wiha goristan jî bi jinên ku bi destên mêrên mîna Erdogan, hatine qetilkirin tijî bûne. Di vê 8'ê Adarê de divê Erdogan û mêrîtiya kirêt a li nava civakê belav bûye li her derê bê teşhîrkirin û zîhniyeta faşîst û mêrtî bi edaleta jinan bê mehkûmkirin. Divê em dewleta Îranê ya ku jinan darve dike, îşkenceyê li wan dike, bedena wan heps dike, rejîma Talîbanê ya Efganistanê, avadaniya çeteyên Boko Haram, desthilatdariya dewleta mêr ên rê li ber hemû şer û zordariyan vedike û pergala kapîtalîst a ku jinan vediguherîne her cure metayê, teşhîr û şermezar bikin.

Tevahiya cîhanê bikin qada serhildanê

Bi dirûşma ‘Jin, Jiyan, Azadî’ divê em mêrtiya hegemonîk li her deverê bi hiş û edaleta jinan bidarizînin. Bi meşa ber bi Şoreşa Jinan a bi dirûşma ‘Jin, Jiyan, Azadî’ re divê em li dijî vê pergala kapîtalîst a ku jiyanê ziwa dike û têk dibe, li dijî her cure versiyonên wê yên faşîst, li dijî vê pergala desthilatdariya mêr a ku heta hucreyên me îstîsmar dike, serî hildin. Hemû kolan, bajar, gund, çiya, kargeh û zevî her der ên me ne, warên me yên avakirin û serhildanê ne.

Jin bi serhildana xwe, bi pîvanên redkirinê, bi zanebûna jiyana azad û bi avakirina wê re jiyanê mîna biharê zindî û ronî dikin. Bi wesîleya 8'ê Adarê em bang li hemû jinên ku bi serhildana xwe jiyanê jinûve ava kirine dikin ku tevahiya cîhanê bikin qada serhildan û avakirinê, hevrêtiya jinan a li vî welatî xurt bikin û têkoşînê mezin bikin.”