ROŞÊL CANYOR

Suweyda – Tîma Puzzle şeva 31’ê Adarê li bajarê Suweyda yê Sûriyeyê konserek a koroya jinan lidarxist û pirsgirêkên ku jin dijîn û têkoşîna wan anî ser dikê. Konser wek çalakiyek ku bihêzbûna jinan û hêvî û baweriya wan a ji bo guherînên tîne ziman derket pêş. Hunermend û aktîvîst, bi performansa xwe bal kişandin û peyama “Em dengê xwe bilind bikin û hunerê bikin amûrek ku jin pirsgirêkên xwe îfade bikin” dan.

Di sehneyek ya şanoyê ku sê kêlî derbas nekir de, zoriyên ku jin ji zarokatî heta pîrbûnê pê re rû bi rû tên anîn ziman. Performans, qedexeyên ku li jinan hatin sepandin û rastiyên bi êş ku jin her roj rastî tên bi awayek bi bandor raxist ber çavan.

Jinên bi riyê şano û muzîkê rastiya xwe tînin ziman, diyar kirin ku divê mafê jinan were naskirin û beşdarî pêvajoyên biryardayîn û guherînê bibin. Bi vê sayê hedef dikin ku jin bi awayek çalak beşdari rêveberiya civakê bibin. 

‘Ev performans bi bandor û ji dil e’   

Lîstîkvana şano û nivîskar Kholoud Al- Musafî bal kişand ku ew bi jinên perwerdeya şano negirtine re dixebite û got: “Ev pêvajo ji bo jin serpêhatiyên xwe raste rast bînin ziman ji dilê wan tê. Bi armanca destekdayîna jinan gelek şêwirên derûnî û perwerdeya şano tê dayîn.”

Kholoud Al-Musafî diyar kir ku lîstok ji serpêhatiyên rast îlham girtiye û got: “Me lîstîkvanên profesyonel û senaryoyên berê hatine nivîsîn bikar ne anîn. Ji ber wê performans hê bi bandor û ji dil e. Peyama bingehîn ya vê lîstîkê ew bû ku bal kişandina ser zextên ku jin di nava civakê de pê re rû bi rû tên bû. Her wiha peyamê dide ku ji bo ev zext di pêşerojê de dûbare nebe divê têbikoşin.” 

‘Huner amûrek bi hêz e’  

Dîrektora rêveberinê ya rêxistina ‘Riyên Aştiyê’ ya li Suweydayê, parêzer û aktivîsta sivîl Şuruk Abu Zeîdan destnîşan kir ku huner ji bo jin dengên xwe bidin bihîstin amûrek bi hêz e û got: “Li cihê kombûnên kevneşop yan jî meteryalên nivîskî, peymanên ku bi riya hunerê tên dayîn zêdetir bi bandor in.”

‘Divê jin di mekanîzmayên biryardanê de bin’

Şuruk Abu Zeîdan destnîşan kir ku li Sûriyeyê dûrxistina jinan her ku diçe zêde dibe û wiha got: “Divê jin zêdetir di civakê de nûnertiyê bike. Di rêveberiya nû de qasî pêwîst nûnertiya jinan nayê kirin. Ji bo guherîna vê, hewldanek rast nehate kirin. Divê jin beşdarî pêvajoyên guherîna siyasî û mekanîzmayên biryardaryînê bibin. Ji bo rewşa heyî bê sererastkirin divê jin zêdetir dengê xwe bilind bikin.”

‘Jin hê ji mafên xwe yên bîngehîn bê par in’  

Sanna Al-Shaar ku di akademiya Muzîkê de mamostetiyê dike diyark ir ku ji bo bûye parçeyek ji konserê gelek keyfxweş e û got: “Tevî jin ji nivî civakê pêk tên, hê ji mafên xwe yên bîngehîn bê par mane. Di mijara beşdariya perwerdê û rêveberinê de rastî astengiyên mezin tên. Peyamên hunerê bi leztir digihije mirovan. Ez di wê baweriyê de me ev çalakî bibe bangek ji bo pêkanîna mafê jinan û wekheviyê.”