FÎDAN ABDULLAH

Şehba- Piştî pîrozbahiya Newrozê ya li bajarê Leuven ê Belçîkayê, li dijî Kurdên ku bi rengê konvoyê ji bajarokê Heûsden-Zolderê derbas dibûn, êrîş pêk hat. Nijadperestên ku hewl dan nêzî 40 kesên ku xwe di malekê de girtin bişewitînin, al û sembolên Kurd şewitandin. Di vîdeoyek ku li ser medyaya dîjîtal belav bû de, tê dîtin ku nijadperestên êrîşê Kurdan dikin, bi sembola bozkurt û bi dirûşmên “Allah û Ekber” zirar didin gelek wesayîdan. Piştî bihîstina êrîşê, di demeke pir kurt de Kurdên li Hollanda, Belçîka, bajarê Leuven û herêmên derdorê, ketin nava liv û tevgerê. Li bajarên din ên Ewropayê jî bi daxwaza girtin û hesabpirsîna êrîşkaran çalakiyên protestoyî hatin lidarxistin. Jinên Efrînî yên ji bajarê Şehba yê Bakur û Rojhilatê Sûriyeyê ji cih û warên xwe bûne, bertekên xwe der barê êrîşê de anîn ziman.

'Divê çalakiyên protestoyî bidomin’

Silvana Hassan, sekna xurt û bi biryar a gelê Kurd a piştî êrîşan silav kir û wiha axivî: “Em piştgiriya ciwanên Kurd a ji bo malbatên rastî êrîşan hatine, teqdîr dikin. Li dijî êrîşa ku pêk hat bêdeng neman û berteka pêwîst nîşan dan. Em dixwazin Kurd û hemû welatên Ewropayê çalakiyên xwe yên protestoyî bidomînin. Mirovên rastî êrîşê hatin, ji pîrozbahiya Newrozê vedigeriyan. Li qada Newrozê daxwaza mafên xwe, aştî û jiyana bi ewle kirin. Divê hemû kes bi daxwaza hesabpirsîna kiryarên sivîlan hedef digrin rabin ser piyan.”

'Divê kiryar bên eşkerekirin û derkevin pêşberî darazê’

Hanifa Ahmed jî bal kişand li ser polîtîkayên şer ên dewleta Tirk ên li dijî gelê Kurd û wiha got: “Êrîşa nijadperest ê hat pêkanîn, nîşanê ya tirsa wan a ji têkoşîna gelê Kurd. Em ev êrîşa dij mirovahiyê şermezar dikin. Eşkerekirin û darizandina kiryaran, berpirsyariya hikûmeta Belçîkayê ye. Ev bûyer ne hêsan e û nayê paşguhkirin. Ev bûyer li ser axên dewletek ku îdiaya demokrasî û mirovahiyê dike sûcek mezin e."

'Em bêdengiya civaka navneteweyî şermezar dikin'

Tulîn Raşîd jî diyar kir ku dewleta Tirk polîtîkayên îmha û înkarê dimeşîne û wiha axivî: “Em li Efrînê bûn şahidên polîtîkayên qirkirinê yên dewleta Tirk ên li dijî gelê Kurd. Em bêdengî û xemsariya civaka navneteweyî şermezar dikin. Dewleta Tirk ji herêmên Bakur û Rojhilatê Sûriyeyê dest pê dike û heta Ewropayê li dijî gelê Kurd sûcan pêk tîne. Dewletên navneteweyî, rê li ber pêkanîna qetlîamên dewleta Tirk vedikin.”