Navenda Nûçeyan-Bi boneya nêzîkbûna 8’ê Adarê Roja Jinên Kedkarên Cîhanê, Kongra Star li navçeya Amûdê meşek organîze kir. Şêniyên ji Amûdê, endamên saziyên civaka sivîl û Partiya Yekitiya Demokratîk (PYD) tev li meşê bûn. 

Meş ê ji Qada Şehîd Cîhad a navenda navçeyê heta Qada Jina Azad dewam kir.

Alên Kongra Star, wêneyên cîgira Hevserokatiya Meclisa Qamişloyê Rihan Amûdê (Leyman Şiwêş) û Hevseroka Meclisa Qamişloyê Yusra Derwêş, şehîdên Komkujiya Helincê û pankartên bi nivîsên “Birêxistinbûna jinan bersiva êrişên dagirkeriyê ye” û “Bi vîna jina azad em ê siyasetên qirkirin, dagirkerî û tecrîdê têk bibin” hatin rakirin.

Jinan dirûşmeyên “Jin, Jiyan, Azadî” û “Bijî berxwedana YPJ`ê” berz kirin.

Li Qada Jina Azad li ser navê Kongra Star berdevka Rêveberiya Dibistanan a Amûdê Hena Xalid axivî û diyar kir ku jin ji gelek mafên xwe ji ber nêzîkatiyên bi zîhniyeta baviksalar mehrûm man.

Hena Xalid bal kişand ser hedefgirtina jinan û wiha got: “Armanca wan jî têkbirina têkoşîna jinan e, Kongra Star bi îdeolojiya azadiya jinan xwe bi rêxsitin dike, encamên xebatên wê jî di nava Şoreşa Rojava de derdikevin û vîna jinan pê xurt dibe.”

Meş bi dirûşmeya “Jin, Jiyan, Azadî” bi dawî bû.