ROŞÊL CANYOR

Suweyda – Li Sûriyeyê rêveberiya demkî ji aliyê Heyet Tahrîr El Şam (HTŞ) a cîhadîst ve hat avakirin. Piştre di 12’ê Adarê de Destûra derbasbûnê hat îmzekirin. Paşê jî di 31’ê Adarê de desteya wezîran a ji  23 kesan pêk tê, aşkera kir. Destûra derbasbûnê û desteya wezîran di serî de ji aliyê jinan ve, li gelek bajarên Sûriyeyê rastî nerazîbûnan hat. Tê diyarkirin ku Destûr ji aliyê feraseta yekparêz ve hatiye îmzekirin, tê de tenê jinek heye û ev deste gelên Sûriyeyê temsîl nake.

Jinên Suweydayî diyar kirin ku rêjeya wezaretên di desteyê de, rewşa civakî û siyasî ya welêt nîşan nade. Jinan got ku hebûna tenê jinek, berdewama polîtîkayên cudaxwaziya li hember jinan e.

‘Jinên Sûriyeyî berxwedana li hember dijwariyan nîşan dan’

Mamosteya teqawit û Însaaf Abdulbakî, endama berê ya Meclîsa Şaredariya Suweydayê û endama Yekîtiya Jinan e. Însaaf anî ziman ku tenê Wezareta Karên Civakî û Xebatê dane jinê û got ku ev jî nîşaneya nêrîna kevneşopî ya li heber rola jinê ye. Însaaf diyar kir ku pêwîst e derfetên firehtir bidin jinan û axaftina xwe wiha domand: “Jin, nîvê civakê ye, nîvê din jî ji aliyê wê ve tê xwedîkirin. Çima derfetê nadin jinan ku di hemû qadan de tecrubeyên xwe nîşan bidin? Jinên Sûriyeyî, berxwedana xwe ya li hember dijwariyan nîşan dan. Ger ku tê xwestin li pişt mêran bê hiştin, sedema vêya lawazbûna wê nîne, derkirina wê û dûrxistina wê ya ji pêvajoyên biryardayînê ye.”

Însaaf Abdulbakî, da zanîn ku serkeftinên rêveberiyan û hikûmetan, dê bi temsîliyeta adilane ya jinan pêkan be. Însaaf rola ku jinan bi taybetî li Suweydayê û bi giştî li Sûriyeyê di protesto û tevgerên sivîl de lîstine, bibîr xist.

‘Pêdivî bi hikûmetek ku herkesî hembêz bike heye’

Yek ji jinên ku beşdarî tevgera gel a Suweydayê bûye jî, Îlhâm Al-Hamd e. Îlhâm destnîşan kir ku  rêveberiya demborî beriya niha soz daye jinan ku ewê kotaya ji sedî 30 pêk bîne, lê li ser vê soza xwe nesekiniye. Îlhâm da zanîn ku desteya wezîran temsîliyeta hemû pêkhateyên civaka Sûriyeyê nake û wiha got: “Em ji bo azadî û wekheviyê daketin kolanan, lê piştî van hemû têkoşînan di hikûmeta nû de tenê wezîrek jin cîh digre. 22 wezaret jî dane mêran. Ev rewş bi temamî li dijî daxwazên me yên ku me di salên borî de anîn ziman jî ye. Nîşan dide ku wekheviya zayendî hê jî tenê sloganek e.”

Îlhâm Al-Hamd, diyar kir ku derkirina siyasî û erdnîgarî ya di desteya wezîran de, red dikin. Îlhâm got ku li Sûriyeyê pêdivî bi hikûmetek wisa heye ku cudahiya zayendî, siyasî an jî herêmî nake, hemû gelan temsîl dike.