SÎLVA ÎBRAHÎM

Kobanê – Bajarê Kobanê di bin dorpêçeke dijwar de dijî ku av, elektrîk, înternet û dabînkirina xwarinê qut bûne. Ji ber vê yekê, niştecih daxwaza rakirina dorpêçê û ji nû ve destpêkirina çalakiyên bazirganî dikin. Di bin dorpêçê de Însiyatîfa "Destê Alîkariyê", bi çavkaniyên sînorkirî, alîkarî dide kesên koçber ên ku ji Reqa, Tebqa û derdora Kobanê ji ber êrîşên cîhadîstên HTŞ’ê direvin.

Niha 25 endamên însiyatîfê hene

Însiyatîfa "Destê Alîkariyê" berê dest bi hewldanên alîkariya mirovî ji bo xelkê Şahba kiribû. Wê demê ji 700 malbatan re stargeh peyda kiribû. Ev cara duyemîn e ku ew alîkariyê didin kesên ku di êrîşên dawî de li Kobanê penaber bûne. Însiyatîf niha xwedî 25 endaman e, lê ji bo her kesê ku dixwaze beşdar bibe û alîkariyê pêşkêş bike vekirî ye. Pêdiviyên malbatan têr nakin ku hewcedariyên malbatan bicîh bînin.

‘Ji ber dorpêça li ser bajêr, mîqdara pêdiviyan sînordar e’

Endama Însiyatîfa "Destê Alîkariyê" Edla Rûmî, tekez kir ku tenê alîkariya kesên koçber têr nake û bal kişand ser pêwîstiya rakirina dorpêçê û ji nû ve destpêkirina çalakiyên bazirganî yên li bajêr. Edla Rûmî diyar kir ku ev înîsiyatîf ji hêla xelkê Kobanê ve, hem di hundir û hem jî li derveyî bajêr, bi xwe tê fînansekirin û wiha got: “Pêdiviyên ku li malbatan têne belavkirin, tiştên li dikan û firotgehan in. Wekî ku em dizanin, ji ber dorpêça li ser bajêr, mîqdara pêdiviyan sînordar e. Betanî û doşek jî ji bexşên niştecihan têne belavkirin.”

‘Divê li Kobanê gelek însiyatîfên din jî hebin’

Edla Rûmî piştrast kir ku înîsiyatîfê di 24ê Çileyê de dest bi çalakiyên xwe kiriye û di vê dema kurt de kariye alîkariya 400 malbatan bike. Edla Rûmî ev agahî dan: “Pêdiviyên li Kobanê, sînordar bûne û pêdiviyên bi hezaran malbatên koçber pêk naynin. Divê gelek însiyatîfên din ji bo piştgiriya kesên koçber li Kobanê hebin. Em dikarin ji bo hefteyek din alîkariyê peyda bikin, lê ji ber dorpêça berdewam û kêmbûna pêdiviyên ji ber wê, em êdî nikarin vê yekê bikin. Tenê peydakirina alîkariyê ji bo alîkariya kesên koçber, têr nake. Bi şert û mercên heyî yên li bajêr, rakirina dorpêçê û ji nû ve destpêkirina çalakiyên bazirganî pir girîng e.”

‘Kobanê ne layîqî dorpêçek wiha ye’

Edla Rûmî ji ber vê yekê bang li gelê Kurd kir ku derkevin kolanan da ku daxwaza rakirina dorpêça li ser bajêr bikin. Edla Rûmî bi gotinên “Kobanêya ku keleha berxwedanê ye, ne layîqî dorpêçek wiha ye. Em hêvî dikin ku her kes dê piştevaniyê bike da ku vê dorpêçê bişkîne” balkişand ser girîngiya rakirina dorpêça li ser Kobanê.