ŞÊRÎN MUHEMED

Qamişlo – Bi destpêkirina şoreşa Rojava ku wek şoreşa jinê tê nasîn, tevgerên jinan dest bi vekirina saziyên xwe yên ji bo zanakirin û pêşxistina jinan di warên hunerî û çandî de, kirin. Ev jî bû sedem ku bi hezaran jin berê xwe bidin qadên jiyanê û li hebûna xwe bigerin. Evîn Şahîn a 18 salî û ji bajarê Qamişlo yê kantona Cizîrê Bakur û Rojhilatê Sûriyeyê ye, berpirsyariya pêşxistina şoreşa jinê li herêmên Bakur û Rojhilatê Sûriyeyê girtiye ser milê xwe. Evîn Şahîn bi riya weşandina dîmenên biçûk ên kar û xebatên jinan, li herêmê li ser malpera xwe ya  medyaya dîjîtal, hewl dide şoreşa jinê û girîngiya wê bi jinên cîhanê bide nasîn.

'Jinan bi şoreşa jinê didim nasîn'

Derbarê armancên xwe yên weşandina li ser malperên medyaya dîjîtal Evîn Şahîn wiha got: "Ez dîmenan amade dikim, bi riya wan hewl didim saziyên jinan wek Weqfa Jina Azad bi jin û jinên ciwan bidim nasîn. Naskirina jinan ji kar û xebatên saziyên jinan re dihêle feraseta bavsalarî bê guhertin. Proje û xebatên jinan wek perwerdeyên îdeolojîk, hunerî, stran, şano, wênexêzî û lêdana amûrên mûzîkê, diweşînim. Jin afirîner e û dikare civakê ava bike. Lê ew ji aliyê mêr ve ji warên jiyanî hatiye dûrxisitn. Jinan karîbûn di şoreşa jinê de hebûna xwe îsbat bikin û destkeftiyên ku dikevin xizmeta jinan bi dest bixin."

'Li hûrgiliyên pêşxistina jinan digerim'

Evîn Şahîn tekez kir ku ew bi kar û xebatên jinan li Bakur û Rojhilatê Sûriyeyê bandor bûye û wiha got: "Ez bi şoreşa jinê bandor bûm, ji ber vê yekê min xwest hûrgiliyên pêşxistina jinan li herêmê bigerim. Min berê xwe da navend û saziyên jinan ku karên wan belge bikim, ji bo ku şopa wan di dîrokê de bimîne. Her wiha rê li pêşiya jinan vekim ku berê xwe bidin van navendan û xeyalên xwe pêk bînin. Bi îsrar im ku di karê xwe yê weşandina dîmenan de berdewam bikim. Girîng e ku em jiyana jinan li herêmê ji jinên Sûriyeyê û cîhanê re ragihînin û şoreşa jinê bi wan bidin nasîn."

'Berê xwe bidin navendên jinan'

Evîn Şahîn ji perwerdeyên çandî û hunerî yên Weqfa Jina Azad gelek sûd girtiye. Evîn bi van gotinan dawî li axaftina xwe anî: "Ez fêrî lêdana tembûrê bûm. Bi riya vê yekê min karîbû ji nêz ve hûrgiliyên perwerdeyan bişopînim û belge bikim. Her wiha ev navend piştevaniya jinan di warê derûnî, civakî û hunerî de jî dike. Bang li hemû jinan dikim ku berê xwe bidin saziyên jinan ji bo pêşxistina xwe. Şoreşa Rojava derfetên mezin ji me re peyda kir û divê em jî van derfetan baş bikar bînin."