Navenda Nûçeyan – Rêxistina Mafê Mirovan a HRANA bi raporekê bîlançoya 24 saetên dawî ya şerê Îsraîl-Emerîkayê û Îranê ya Rojhilatê Kurdistan û Îranê belav kir. Li gorî daneyên dawî di nava 24 saetan de asta mirovî ya şer ji nûve giran bûye û herî kêm 24 sivîlan jiyana xwe ji dest dane.

Li gorî rapora HRANA di encama êrişên 24 saetên borî de li Rojhilatê Kurdistan û Îranê 24 welatiyên sivîl ku di nav de 8 zarok û 6 jin hene, jiyana xwe ji dest dan û 88 welatî jî birîndar bûn. HRANA ragihand ku piraniya êrişan li ser Esfehan, Tewrêz, Xorasanî Rezewî, Yezid, Zencan, Elbûrz û Tehran hatine pêkanîn.

HRANA ragihand ku di nava 24 saetên borî de li ser 21 parêzgehên Rojhilatê Kurdistan û Îranê, herî kêm 701 êrîş hatine pêkanîn ku 29 baregehên leşkerî, baregehên Muhafizên Şoreşa Îranê, navendên hêza Besîc, balafirgehên leşkerî, navendên polîsan, bîrên neftê û qadên enerjiya atomî yên Îranê bûn.

Li gorî bîlançoyên ne fermî, ji destpêka şerê Îran û Îsraîl-Emerîkayê heta duh ve li Rojhilatê Kurdistan û Îranê, hezar û 551 welatiyên sivîl jiyana xwe ji dest dane ku 236 jê zarokin. Her wiha 702 kesên ku jiyana xwe ji dest dane nayê zanîn, sivîlin an jî leşkerin û hê lêkolîn didome.

Wezareta Tenduristiya Îranê, ragihand ku bêyî cûdahiya di navbera leşker û sivîlan de, ji destpêka şer heta niha hejmara jinên jiyana xwe ji dest dane gihiştiye 244’an.

Li gorî rapora HRANA, di vê demê de qadên bicihbûnê û hinek bînesaziyên sivîl xisar dîtine. Navendek a tenduristiyê ya li bajarê Mînab di nava hedefan de ziyan dîtiye.