Beyrûd – Kongra Star û Partiya Yekîtiya Demokratîk (PYD) li Lubnanê şehîd Şîlan Kobanî û hevalên wê di salvegera şehadeta wan de bi bîr anîn.

Bîranîn li navenda Komeleya Çandî û Civakî ya Newrozê bi beşdarbûna endamên civaka Kurd a li Lubnanê hate lidarxistin.

Merasîm bi kêliyek bêdengiyê ji bo giyanên şehîdan dest pê kir. Piştre sînevîzyonek li ser jiyana heval Şîlan Kobanî hate nîşandan. Paşê rêvebera Kongra Star Leyla Mihemed axivî û şehîd Şîlan Kobanî, şehîd Zekeriya û şehîd Ferhad bi bîr anî.

Leyla Mihemed behsa rêwîtiya têkoşîna pêşengên têkoşîna azadiya gelê Kurd kir û got, "Van hevalên şehîd, bi têkoşîna xwe ya siyasî û neteweyî, bingeha yekem a damezrandina Partiya Yekîtiya Demokratîk (PYD) pêk anîn." Leyla Mihemed her wiha tekez kir ku komploya li dijî wan armanc dikir ku têkoşîna siyasî û rêxistinî li Mûsil û li ser sînorê Sûriyeyê qels bike. Leyla Mihemed diyar kir ku heval bi rêbazên nemirovane hatine qetilkirin û diyar kir ku vê bûyerê leza têkoşîna siyasî û partîzanî, bi taybetî di destpêka sala 2011’an de, zêde kiriye.

Di dawiya axaftina xwe de Leyla Mihemed got ku têkoşîna jinan di her warî de îlhamê ji têkoşîna şoreşger Şîlan Kobanî digire.

Merasîma bîranînê bi dirûşmeyan bi dawî bû.