ÎMAN SEMÎR ELÎ

Misir – Meryem Safwat, xwendekara sala yekem a Fakulteya Dermansaziyê ya Zanîngeha El-Ehlul a Asyut a Misrê ye. Meryem, rêyek bêhempa vekiriye ku serkeftina akademîk bi hewesa hunerê re dike yek. Ji bo jinên ciwan ên ku tevî dijwariyên civakî û perwerdehîyê xewnên xwe bi dest dixin, wekî mînak xizmet dike.

Rêwîtiya wê ji zarokatiyê destpê dike

Rêwîtiya Meryem Safwat di şanoyê de di salên zarokatiya wê de bi çalakiyên dibistanê dest pê kir. Meryem beşdarî şanoyan bû, helbest û nivîs xwendin. Jêhatîbûna wê zû bala xelkê kişand ser xwe. Piştgiriya ku wê ji malbata xwe, nemaze ji diya xwe stend, roleke girîng di pêşxistina şiyanên wê yên hunerî de lîst.

Piştî ku di pêşandaneke dibistanê de jêhatiya wê hat ferqkirin, dema ku di temenê ciwaniyê de tevlî Navenda Çandê bû, hobiya wê veguherî kariyerek hunerî ya cidî. Ji wê demê ve, wê di gelek berhemên şanoyê de lîstiye û gelek xelat girtiye. Ya herî dawî ji van xelata yekem a "Lîstikvana Herî Baş" e. Ji bo performansa wê di lîstika "Şeva Kujer" ku di çarçoveya Festîvala Klûbên Şanoyê de hate pêşkêşkirin.

Rêxistinkirina demê ya bi awayek baş

Meryem Safwat diyar kir ku zehmetiya herî mezin a ku pê re rû bi rû maye, hevsengkirina perwerdehiya xwe ya zanîngehê û xebata xwe ya şanoyê bû. Tevî ku prova û pêşandan bi demên azmûnan re li hev diketin jî, wê bi rêxistinkirina baş a dema xwe karî di her du waran de jî bipêş bikeve. Wê tekez kir ku şano ne astengiyek ji bo serkeftina wê ya akademîk bûye, motîvasyonek zêde bûye.

Huner peyamek mirovî û çandî hildigre

Derbarê ezmûna xwe ya wekî jineke ciwan a lîstikvaniyê di civaka Misira Jorîn de, Meryem diyar kir ku ew rastî hin nêrînên dijber hatiye, lê ew bawer dike ku huner peyamek mirovî û çandî hildigre û mafê jinan heye ku beşdarî her cûre çalakiyên hunerî û afirîner bibin. Çalakiyên wê bi şanoyê ve sînordar nebûn; wê di kurtefîlm û reklaman de jî rol girt. Wê vê dawiyê di kurtefîlma "Olive Oil" de lîst ku tê payîn ku di festîvalên navneteweyî de bên nîşandan.

Xelatek girîng ji bo kariyera wê

Di tevahiya rêwîtiya xwe ya hunerî de, wê gelek xelat girtine. Di nav wan de xelatek ji bo performansa wê ya di lîstika "Naime" de li festîvaleke şanoya amator û xelatek Festîvala Şanoya Neteweyî ji bo rola wê wekî "Melike" di lîstika "Sunset Oasis" de hene. Ew vê xelatê wekî xaleke girîng a werçerxê ya di kariyera xwe de dibîne.

Derbarê armancên xwe yên pêşerojê de, ew dibêje ku dixwaze tevî bernameya xwe ya akademîk a dijwar jî, rolên cûrbecûr bigre ser xwe û hewesa xwe ya ji bo şanoyê biparêze. Ew tekez dike ku şano, beşek bingehîn a jiyan û nasnameya wê ye.