فادیا جومعە

 

لوبنان-قەیرانی مرۆیی لە شاری "صور" لەژێر بۆردوومان و هەڕەشەکان خراپتر دەبێت، لەگەڵ زیادبوونی ژمارەی کۆچبەران و دانیشتووان و ئەوانەی بەرخۆدان دەکەن. نزیکەی ٤٠ هەزار کەس لە شارەکەدا ماون و ژمارەیەکی هاوشێوە لە کامپەکانی فەلەستیندان، دۆخێک کە فشارێکی زۆر دەخاتە سەر ژێرخانی ناوخۆیی لە نێوان هەڕەشەکانی هێزەکانی ئیسرائیل بۆ چۆڵکردنی شارەکە، کۆچبەرەکان لە ١٥ پەناگەدا بڵاوبوونەتەوە، جگە لە ماڵ و شوێنە گشتیەکان کە کراونەتە پەناگەی کاتی.

 

لە وێنەیەکی سەرنجڕاکێشدا کە بۆ سێیەم ساڵ لەسەریەک بەردەوامە، پڕۆژەی "بذور صور" وەک شوێنێکی ژیان لە ناوەڕاستی قەیرانەکاندا، وا دیارە خاکەکە دەبێتە پەناگە و کارکردن بەرخۆدانێکی ڕۆژانەیە. لەناو یەکێتی شارەوانییەکانی ئەو شارەدا. ژنانی کۆچبەر لە گوندەکانی سەر هێڵی پێشەوە، لەژێر بۆردوومانەکەدا، چیرۆکێکی جیاواز دروست دەکەن، درێژەدان بەو پڕۆژەیەی کە دەستیان پێکردووە بۆ پشتیوانی کردن لە بەرخۆدانەکەیان و گۆڕینی بۆ پایەیەک کە پاڵپشتی بەشێکی زۆری شارەکە دەکات.

 

لەوێدا تەنها چاوەڕێی یارمەتی نین، بە دەستی خۆیان سەوزە دەچێنن و بەروبووم دەچنن و گوڵ ئاو دەدەن، وەک درێژەپێدەری یادەوەری گوندەکانیان کە ناچار بوون وازی لێبهێنن، لە چێشتخانە سادەکاندا ڕۆژانە ژەمەکان بۆ نزیکەی چوار هەزار کۆچبەر لە شارەکەدا ئامادە دەکرێت و ماندوێتییان دەگۆڕێت بۆ بوێری.

 

ئەمە تەنها دەستپێشخەری نییە، بەڵکو چیرۆکی خۆڕاگری و ئیرادەی ژنانە لە بەرامبەر شەڕدا. ئەو ژنانەی ماڵەکانیان لەدەستداوە، بەڵام توانای بونیادنان و ژیانیان لەدەست نەداوە.

 

"ئێمە دەگەڕێینەوە و گوندەکانمان ئاوەدان دەکەینەوە"

زەینەب مەهدی دانیشتووی شاری ناقورا و ئێستا کۆچبەرە وتی: نزیکەی سێ ساڵە لە دۆخێکی سەختی کۆچبەرییدا دەژین،  سەرەڕای ئەمەش شارەکەمان بەجێنەهێشتووە بەڵکو شانبەشانی پڕۆژەی "بذور صور" ماوینەتەوە کە بە هاوکاری یەکێتی شارەوانییەکانی "صور" دەستیپێکردووە، ئێمە بەردەوامین لە کارە کشتوکاڵییەکانمان، هەوڵدەدەین کێڵگەکان بچێنین و بەروبوومەکان بچێنین بۆ پاڵپشتیکردنی بەرخۆدانی کۆچبەران لە پەناگەکاندا، هەرگیز لە کارکردنمان نەوستاین؛ ئێمە دەچێنین، گژوگیا و تۆوەکان دەپارێزین بۆ پاراستنی خۆبەڕێوەبەری و بەردەوامیی خۆمان، لەسەر ئەم خاکە بەردەوام دەبین، یان لێرە دەژین یان بە کەرامەت و بوێرییەوە دەمرین. دەگەڕێینەوە گوندەکانمان بۆ چاندنی کێڵگەکانمان و ماڵەکانمان ئاوەدان دەکەینەوە.

 

هەموو ڕۆژێک ئامادەکردنی خواردن بۆ کۆچبەران

مونیفە ئەدیبی کە لە حەوشەوە کۆچبەر بووەو بەرپرسە لە بەڕێوەبردنی چێشتخانەکە، سەرەڕای هەموو  هەلومەرجەکان باس لە بەردەوامی کار دەکات و وتی: چێشتخانەکە پاڵپشتی کۆچبەرەکانی گوندەکانی بەرەکانی پێشەوە دەکات، ڕۆژانە خواردن بۆ سێ هەزار و ٥٠٠ کەس ئامادە دەکەین، هەندێکجاریش ژمارەکە دەگاتە چوار هەزار کەس، بە پاڵپشتی یەکێتی شارەوانیەکان و ئەنجومەنی باشوور خۆراک بەسەر ١٦ پەناگەی شارەکەدا دابەش دەکرێت.

 

بەو دەستپێشخەرییە هەستی سەربەخۆیی وەرگرتەوە

فەرەح حیجازی کە لە بەیت لیفەوە کۆچبەر بووە، پشتڕاستی دەکاتەوە کە ئەمە یەکەم ئەزموونی کۆچبەری نییەو پێشتر ئەزموونی کردووە وتی: بەشداری پڕۆژەی چێشتلێنان دەکەم لە یەکێتی شارەوانییەکان بۆ پاڵپشتیکردنی کۆچبەران.

 

لە نێوان کشتوکاڵ و چێشتلێناندا ژنان ڕۆژانە چیرۆکی بەرخۆدان بە ژیانی خۆیان دەنووسن و شوێنی دەستپێشخەری لەو چیرۆکانەدا دەبێتە هێڵی یەکەمی بەرخۆدان لە کەرامەت و ژیان.