نەغم کەراجە

غەززە – لە گۆشەیەکی تاریکی ئەو شارەدا کە زیندووەکان کۆتاییان پێ دێت و گۆڕستانەکان دەست پێدەکەن، ئیمان عەیاد، دایکی هەشت منداڵە و تەمەنی لە چلەکاندایە، ژیانێک دەژی کە تەنها بە ناو لە ژیان دەچێت، دوای دوایین ئاوارەبوونی، هیچ پەناگەیەکی نەدۆزیەوە جگە لە شوێنێکی تەسک لە نێوان گۆڕەکاندا، لەناو گۆڕستانێکدا کە دەیان تەرمی تێدایە، بەردی گۆڕەکانی مردن لە هێمای نەبوونیەوە گۆڕاون بۆ دیواری ڕۆژانە کە وردەکارییەکانی ژیانی گەمارۆ دەدەن.

 

لەوێ لە نێوان زەوییە شێدارەکان و گۆڕە نزیکەکاندا، چادرەکەی هەڵدا، هەوڵیدا خەیاڵێکی پارێزراوی بۆ منداڵەکانی دروست بکات لە شوێنێکدا کە تەنها بێدەنگییەکی قورس و تیرۆری شاراوە دەناسێت.

 

ئیمان عەیاد لەناو ژینگەیەکی سەختدا دەژی، کە بۆنی مەرگ تێکەڵ بە بۆنی ئاوی وەستاو دەبێت و مێروو و مشک زۆر دەبن، وتی: هەرگیز بە خەیاڵمدا نەدەهات بگەمە ئەم خاڵەی بێدەسەڵاتی، لەگەڵ منداڵەکانم لە نێو گۆڕەکاندا بژیم، ئێمە دەخەوین و لە خەو هەڵدەستین بەم دیمەنە، وەک ئەوەی چاوەڕێی نۆرەی خۆمان بین، شەوانە سەخترینن، چونکە  بەبێ ڕووناکی، گۆڕستانەکە دەگۆڕێت بۆ شوێنێکی وێران کە تێیدا دەنگەکان بە خەیاڵدا دەڕوات و ترسەکان ڕەگیان دادەکوتن، هەروەها هەموو شەوێک گوێم لە دەنگی سەیر دەبێت، بە خەیاڵمدا دێت گۆڕەکان دەجووڵێن یان کەسێک تەلەفۆنم بۆ دەکات، لە ترسێکی بەردەوامدام، بەڵام دەبێت لە پێناو منداڵەکانمدا بمێنمەوە.

 

"قۆناغێک بۆ ژیانی ڕۆژانەی"

بۆ ئەو گۆڕستان چیتر تەنها شوێنی ناشتن نییە، بەڵکو بووەتە قۆناغی ژیانی ڕۆژانەی، لە نێو گۆڕەکاندا جل و بەرگی منداڵەکانی دەشوات و ژەمە سادەکانیان دروستدەکات و دار ئامادە دەکات هەر خواردنێک کە لەبەردەستدایە، هەوڵدەدات ڕێوڕەسمەکانی دایکایەتی لەناو ئەم وێرانکاریەدا بپارێزێت.

 

وتی: هەموو کارەکانی خێزانەکەم لێرە ئەنجام دەدەم، شۆردن و خواردن دروست دەکەم، هەموو ئەمانە لەکاتێکدا سەیری گۆڕەکانی دەورووبەرم دەکەم، هەندێک جار هەست دەکەم مردن چاودێری هەموو جووڵەیەکمان دەکات، سەرەڕای توندی دیمەنەکە، هەوڵدەدات گەورەیی کارەساتەکە لە منداڵەکانی بشارێتەوە، بەڵام دان بەوەدا دەنێت کە بووەتە مەحاڵ، منداڵەکانم لێم دەپرسن بۆچی لێرە دەژین، هیچ وەڵامێکم نییە بۆ ئەوەی دڵنیایان بکەمەوە.

 

هەفتەی ڕابردوو لوتکەی ئازارەکانی ژیانی ئیمان عەیاد بوو کاتێک ناچار بوو تەرمی کەسێک بنێژێت کە سەگێکی بێسەرپەرشت لە گۆڕەکەیەوە دەریهێناوە و دەستی کردبوو بە خواردنی، وتی: من تەرمی مردووەکەم بینی لەسەر زەویە، سەگەکە دەیخوارد، نەمتوانی هاوار بکەم، هەستم کرد دڵم وەستا، بە دەستی خۆم ناشتمەوە، نەک تەنها بۆ مردووەکە، دەگریام نەک تەنها بۆ مردووەکە بەڵکو بۆ دۆخی هەموومان، ئەم ڕووداوە کاریگەرییەکی قووڵی دەروونی لەسەر ئەو و منداڵەکانی بەجێهێشت، هەروەها هەستی نائەمنی و ترسی بەردەوامی لە دووبارەبوونەوەی دیمەنەکە زیاتر کردووە.

 

ئیمان عەیاد لە ناو چادرەکەیدا بەدەست بارودۆخی ژیانی ناخۆشەوە دەناڵێنێت، لەگەڵ هەر باران بارینێکدا چادرەکە ئاوی تێدەچێت و زەویەکەی قوڕاوی دەبێت، وتی: هەر جارێک باران دەبارێت، من و منداڵەکانم دەخنکێین، چادرەکە هیچ پارێزگارییەک لە سەرما و باران ناکات، جگە لەوەش بەردەوام چادرەکە لەلایەن ئەو مشکانەوە دەدڕێت کە ڕووبەڕووی ناوچەکە دەبنەوە، ئەمەش ناچاری دەکات ڕۆژانە ڕووبەڕووی ململانێی مێشوولە و مێرووەکان بێتەوە، هەندێکجار بە دەنگی مشکەکان لە خەو هەڵدەستم کە چادرەکە دەخۆن، دەترسم زیان بە منداڵەکانم بگەیەنن، بەڵام بێدەسەڵاتم.

 

"ڕزگاری کاتی"

ئیمان عەیاد هەموو بارگرانی خێزانەکەی لە سەر شانی خۆی هەڵدەگرێت، سەرچاوەی داهات و بژێوی و کاری نییە و هیچ هاوکارییەکیش نییە، ئەمەش بۆتە هۆی ئەوەی کە ڕووبەڕووی برسێتی و بێبەشی ببێتەوە، هەروەها هەوڵدەدەم کەمترین شت بۆ منداڵەکانم دابین بکەم، بەڵام زۆرجار ناتوانم، هەست دەکەم بە تەنها لە شەڕێکی نایەکساندا دەجەنگم، ئەم ئازارە تەنها بۆ ئەو نییە، بەڵکو ڕەنگدانەوەی ڕاستی دەیان ژنە کە خۆیان بە ناچاری لە بارودۆخێکی هاوشێوەدا دەبیننەوە، لەناو گۆڕستانەکان یان شوێنە جێهێڵراوەکاندا، دوای ئەوەی هەموو ڕێگاکانی کۆچکردنیان بەڕوودا داخراوە.

 

زۆرێک لە ژنان ئەمڕۆش هەمان ئەزموون دەژین، بەرپرسیارێتی تەواوی خێزانەکانیان لە ژینگەیەکی ناجێگیردا هەڵدەگرن، لە سەرەتاییترین توخمەکانی شکۆمەندی مرۆڤ بێبەشن، لەم شوێنانەدا ئازارەکانیان بەهۆی مەترسییەکانی تەندروستی و دەروونی و بڵاوبوونەوەی نەخۆشییەکان و نەبوونی تایبەتمەندی و ترسی بەردەوام بۆ منداڵەکانیان زیاتر دەبێت، هەروەها ئێمە تەنها ژمارە یان حاڵەتی زوو تێپەڕین نین، بەڵکو ئێمە دایکین کە هەوڵدەدەین منداڵەکانمان بە زیندووی بهێڵینەوە.

 

لەناو گۆڕەکاندا، ئیمان عەیاد، ژنێکی فەڵەستینی هەوڵدەدات دەست بەو هێزە کەمەوە بگرێت کە بۆی ماوەتەوە، بەڵام دەنگە دیارەکان هەڵگری پەیامێکی ڕوونن کە ئەمە ژیان نییە، بەڵکو مانەوەیەکی کاتیە لە کاتێکدا چاوەڕێی دادپەروەریەکی نەبوو و ویژدانێکی مرۆڤایەتی دەکەن کە هێشتا بەئاگا نەبووەتەوە.