ژوان کەرەمی

 

کامیاران- پیاوان هەمیشە باسی خۆیان و ژنانیان کردووە، زۆربەی ئەو شتانەی لەسەر دونیا دەیخوێنینەوە و دەیبیستین و دەیزانین دەنگی پیاوانە، بەڵام کاتی ئەوە هاتووە ژنان پلاتفۆرمەکان بگرنەدەست و دەنگی خۆیان بن لەپێناو گەڕاندنەوەی مافە زەوتکراوەکانیان و یەکسانی نێوان ڕەگەزەکان.

 

نابێت مرۆڤ تەنیا لە ڕوانگەی ڕۆشنبیرەوە پشت بە گێڕانەوەی جیهانی ژن ببەستێت، بەڵکو دەبێت ڕاستەوخۆ لەگەڵ ژنانی هەموو توێژە کۆمەڵایەتییەکان قسە بکات، بۆیە نوژنها لەگەڵ شاعیرێک بە ناوی خوازراوی "چۆمان" گفتوگۆی کرد.

 

ئەو سنووردارکردنانەی کە کچان دەگرێتەوە

سەبارەت بە جیاکاری و سنووردارکردنی ژنان بەهۆی دابونەریتەوە چۆمان دەڵێت: لە منداڵیمەوە خێزانەکەم وەها مامەڵەیان لەگەڵ کچان کردووە، کە مافی ئەوەیان نییە جلوبەرگی ئاسودە لەبەر بکەن لە ماڵ و دەرەوە، بە پێچەوانەی براکانمەوە، کە ئەوان مافیان هەبوو هەرچییەکیان بوێت لەبەری بکەن، تەنانەت ئەگەر لە ماڵەوە بە نیمچە ڕووتیش بمێننەوە و لێپرسینەوەیان لەگەڵدا ناکرێت.

 

ئاماژەی بەوەشکرد، "ئەو بڕیارانەی لە خێزاندا دەدرێن داوای بۆچوونمان لێناکەن، تەنانەت ئەگەر بۆچوونی خۆمانیش دەرببڕین، ئەوە لەبەرچاو ناگیرێت، ئەگەر دروستیش بێت، ئەمە جیاکارییەکی ڕوون بوو بەرامبەر ئێمە وەک کچ، ئێمە ئاگاداری جیاکاری جێندەری بووین".

 

ژنان دەچەوسێنرێنەوە

چۆمان حسێن زادە ئاماژەی بەوەدا، "هاوسەرگیری من هەڵبژاردەی من نەبوو، بەڵکو هەڵبژاردنی خێزانەکەم بوو کە ناچاریان کردم، هیچ بژاردەیەکیان بۆم نەهێشتەوە، بنەماڵەکان گرنگییان بە ئارەزووی کچەکە و داهاتووی کچەکە نەدەدا، چەوساندنەوەی ژنان دەرئەنجامی وابەستەیی ئابوورییە، سەربەخۆیی دارایی چەندین کێشە و ئاستەنگ لە ژیانی ژناندا لادەبات و ڕێگەی پێشکەوتنیان بۆ دەکاتەوە، بەڵام لەو کۆمەڵگەیانەی پڕن لە هەڵاواردن و عەقڵیەتی پیاوسالاری زاڵە، دەبێت فاکتەری دیکە هەبن بۆ کەمکردنەوە، نابێ ڕەهەندە یاسایی و سیاسی و کولتووری و کۆمەڵایەتییەکانی هەڵاواردن لە دژی ژنان لەبیر بکەین، چونکە ئەم ڕەهەندانە هەمان کاریگەری ڕەهەندی ئابوورییان هەیە".

 

ڕاپەڕینی "ژن، ژیان، ئازادی" وەرچەرخانێکی مێژووییە لە ژیانی ژناندا

سەبارەت بە کاریگەرییەکانی ڕاپەڕینی ئەم دواییە لەسەر ژنان و کچان چۆمان ڕایگەیاند، "زانین و خوێندەواری بۆ ژیان لە کۆمەڵگەیەکی ئاوادا پێویستی زۆربەی خەڵک و بەتایبەت ژنانە، تێگەیشتن لە مانای ئازادی و یەکسانی و هۆشیاری لە مافەکان نوێنەرایەتی کۆمەڵگایەکی ئاوەدانتر دەکات.

 

لە کۆتایی قسەکانیدا چۆمان حسێن زادە دووپاتی کردەوە، "گۆڕانکارییە سیاسییە بنەڕەتییەکان دەتوانن زۆر کاریگەر بن و ئەگەر ئەوە ڕووبدات، بێ گومان ژنان وەک هەموو کۆمەڵگە پێشکەوتووەکانی ناوچەکانی دیکەی جیهان، کە ژنان لە ئازادی و یەکسانی سودمەندن، لە شوێنی شیاوی خۆیان لە کۆمەڵگەدا دادەنرێت.