ژوان کەرەمی

 

هەورامان- سەرەڕای بارینی بەفرێکی زۆر لە شاری هەورامان لە ڕۆژهەڵاتی کوردستان، خەڵکی شارەکانی ڕۆژهەڵاتی کوردستان و ناوچەکانی دیکەی کوردستان جەژنی پیر شالیاریان بەرز ڕاگرت.

 

دوێنێ، ٢ی شوبات، مەراسیمی پیرشالیار لە ناوچەی هەورامانی ڕۆژهەڵاتی کوردستان بەڕێوەچوو، کە ساڵانە دووجار بۆ ماوەی سێ ڕۆژ ئاهەنگ دەگێڕن، کاتێک ژمارەیەکی زۆر لە خەڵک لە بەردەم ماڵی مێژوویی پیرشالیار کۆدەبنەوە و لەژێر بەفر و سەرمادا، ئاهەنگ و زکری عیرفانی دەگەنەوە.

 

بەشداربووان لە شارەکانی سنە، کرماشان، مەریوان، جوانڕۆ، بانە، سەقز، سونقور، و تاران لە ڕۆژهەڵاتی کوردستان و ئێران، و شارەکانی هەڵەبجە و سلێمانی لە هەرێمی کوردستان، جلوبەرگی کوردییان لەبەردا بوون و بازنەیەکیان پێکهێنا، و ئاهەنگیان گێڕا.

 

نەبوونی ژنان کاریگەری نەرێنی لەسەر مەراسیمەکە هەبوو، چونکە جۆرێک لە جیاکاری لە نێوان ڕەگەزەکاندا دروستکرد، بەو پێیەی خەڵکی شاری هاورامان وایان زانی کە جیاکردنەوەی ڕەگەزەکان بەشێکی ڕێوڕەسمەکەیە و هەندێکی دیکەش بە دیاردەیەک دەزانن کە لە کاتی یەکگرتنی ئیسلام و زەردەشتیدا چڕتر بووەوە و سەرەڕای ئەوەش ژنان لە ڕێگەی بەشداریکردنیان لە مەراسیمەکەدا ئەم نەریتانەیان شکاند.

 

بەشێک لە ژنان بە لەبەرکردنی جلی کوردی و نەپۆشینی باڵاپۆشی زۆرەملێ و پێشوازیکردن لە فۆتۆگرافەر و پەیامنێران بۆ دانانی وێنە و چاوپێکەوتن، بەشداربوون و ئەمەش بە پرۆسەیەکی گۆڕانی ئەرێنی دەبینرێت.