ناوەندی هەواڵ

 

ئەکادیمیای ژنۆلۆژی ڕۆژئاوا ڕاپۆرتێک لەسەر کاریگەریی هێرشەکانی ئەم دواییەی گرووپەکانی سەر بە حکومەتی کاتیی سووریا بڵاوکردەوە، کە لە ٦ـی کانوونی دووەمی ٢٠٢٦ـەوە، دژی منداڵان لە ڕۆژئاوا و باکوور و ڕۆژهەڵاتی سووریا ئەنجام دراون.

 

لە ڕاپۆرتەکەدا هاتووە، ئەو هێرشانەی لەلایەن سوپای سووریا، گرووپە چەکدارەکانیان و چەکدارە خێڵەکییەکان "بە ئەندامانی پێشووی داعشیشەوە" و دەوڵەتی تورکی ئەندامی ناتۆ ئەنجام دراون، بە شێوەیەکی سیستەماتیک مافە بنەڕەتییەکانی منداڵانیان بۆ ژیان، تەندرووستی، خۆراک، پەناگە، یاری، پەروەردە و ئاسوودەیی دەروونی پێشێل کردووە.

 

ئاماژە بەوەشکراوە، لەم ڕاپۆرتەدا پشت بە شایەتحاڵە مەیدانییەکان، یاداشت و نموونە بەڵگەدارکراوەکان بەستراوە کە بە ڕوونی ئەوە دەخاتە ڕوو، منداڵان قوربانیی لاوەکی یان تەنها ئازارچەشتوویەکی پاسیڤی جەنگ نین، بەڵکو کارەکتەری کۆمەڵایەتین کە ڕاستەوخۆ وەک ئامرازێک بۆ ژێردەستکردنی کۆمەڵگە و کۆنترۆڵکردنی داهاتوو دەکرێنە ئامانج.

 

هەروەها ئامانجی ڕاپۆرتەکە تێپەڕاندنی ئەو تێڕوانینە تەسکانەیە کە جەنگ تەنها وەک پێکدادانی چەکداری، جووڵەی بەرەکانی جەنگ و ئەنجامە سەربازییەکان دەبینن. ئەم توێژینەوەیە جەنگ وەک شێوازێکی فرەڕەهەند و سیستەماتیکی توندوتیژی دەبینێت کە لەلایەن عەقڵییەتێکی باوکسالار، دیکتاتۆر و داگیرکەرەوە بەسەر کۆمەڵگەدا سەپێندراوە.

 

هاوکات، ئامانجی ئەم ڕاپۆرتە ئاشکراکردنی ئەم پێشێلکارییانەیە و مامەڵەکردنە لەگەڵ ئەزموونەکانی منداڵان نەک تەنها وەک کارەساتێکی مرۆیی، بەڵکو وەک هێرشێکی کۆمەڵایەتی و مێژوویی، جەنگ بە شێوەیەکی سیستەماتیک ئاسایشی جەستەیی و دەروونی منداڵان، هەستی ئینتما، مافی خوێندن و پەیوەندییە کۆمەڵایەتییەکانیان دەکاتە ئامانج.

 

دەتوانن ڕاپۆرتەکە لێرەدا بە زمانی ئینگلیزی " ڕاپۆرت" و لێرەشدا " ڕاپۆرت"ەکە بە زمانی ئەڵمانی دابگرن.