پەروین ئامارا

 

قامیشلۆ-شەوی ٣١ی کانونی یەکەمی ٢٠٢٤. ئاسایشی سلێمانی لە باشووری کوردستان هێرشی کردە سەر ناوەندەکانی کۆمپانیای گزنگی بەربەیان کە بەرنامە بۆ کەناڵی ژن تیڤی و ڕێکخراوی ژنانی ئازادی کوردستان "ڕژاک" و ڕێکخراوی نوێگەر بۆ پەرەپێدانی هونەر و ڕێکخراوی مەرزییەی ژنان و هەر چوار ناوەندەکەی داخست، ژنە ڕۆژنامەنووسانی باکوور و ڕۆژهەڵاتی سووریا کاردانەوەیان بەرامبەر بە هێرشکردنە سەر دامودەزگاکانی ژنان دەربڕی و داوایان لە هەموو لایەک کرد خاوەنداری لەو دامەزراوانە بکەن کە ناسنامەی ژنان دەردەبڕن.

 

ڕۆژنامەنووس جوانە جومعە لە سەرەتای قسەکانیدا وتی: هیچ دەسەڵاتێک ناتوانێت بڕیار لەسەر دامودەزگاکانی ژنان لەسەر خاکی کوردستان بدات، چوار دامەزراوەی ژنان لە شاری سلێمانی لە باشووری کوردستان لەلایەن ئاسایشی سلێمانییەوە داخراون، ئێمە وەک ڕۆژنامەنووس بە توندی ئیدانەی ئەو هێزانە دەکەین کە ئەم بڕیارەیان داوە و ڕەزامەندییان لەسەر داخستنی ئەو دامەزراوانە داوە، هیچ هێزێک مافی ئەوەی نییە چوار دامەزراوەی ژنان لەسەر خاکی کوردستان دابخات.

 

"ئەو ڕێکخراوانەی کە بوونەتە دەنگی ژنان دەکرێنە ئامانج"

لە درێژەی قسەکانیدا، جوانە جومعە ئاماژەی بەوەدا کە داخستنی ئەو دامەزراوانەی ژنان پلانێکی بە ئەنقەستەو وتی: شەوی سەرەتای ساڵی ٢٠٢٥ ئەم بڕیارانە درا و دەستبەجێ جێبەجێ کران، ڕوونە کە پێشتر هەندێک بڕیار بۆ داخستنی ئەو دامەزراوانەی ژنان دراوە، بەبێ ئەوەی بەڵگەنامەیەکی فەرمی و هۆکارێکی جیاواز بخەنەڕوو، یەکسەر ئەم دەزگایەیان داخست، ئەمە یەکەمجار نییە کە ئەم سیاسەتە گڵاوە دژ بە ڕێکخراوەکانی ژنان لە باشووری کوردستان بەڕێوە دەچێت، پێش ئێستا دوو هاوڕێی ڕۆژنامەنووسمان لە ٢٣ی ئابی ٢٠٢٤ لە شاری سلێمانی باشووری کوردستان کە خاکی کوردە، لەلایەن دەوڵەتی تورکەوە هێرشیان کرایە سەر،  ئێمە ئەم هێرش و سیاسەتە پیسانە جیاواز نابینین کە دژی ئەم دامودەزگا ژنانە دەکرێت، هەموو ئەو هێرشانەی کە کرایە سەر ژنان، ئەم دەزگایانە ڕاستی ئەو هێرشانەیان ئاشکرا کرد، بە تایبەتی ئەو کۆمپانیایەی کە بەرنامە بۆ ژن تیڤی ئامادە دەکات، وەک کۆمپانیای گزنگی بەربەیان کە ماوەی ٧ ساڵە دەنگی ژنان لە باشووری کوردستان بەرەوپێش دەبات، دەکرێتە ئامانج.

 

جوانە جومعە ڕایگەیاند، وەک ژنی ڕۆژنامەنووس، داوا لە هەموو ڕۆژنامەنووسان دەکەن هەڵوێستیان هەبێت بەرامبەر بەو هێرشانە و لە درێژەی قسەکانیدا وتی: وەک ڕۆژنامەنووسانی باکوور و ڕۆژهەڵاتی سووریا، داوا لە هەموو ژنە ڕۆژنامەنووسانی هەر چوار پارچەی کوردستان دەکەین کە هاتوونەتە دەرەوە بۆ ئەم هێرشانە خاوەنداری لە دامودەزگاکانی ژنان بکەن، داوا لە حکومەتی عێراق و باکوروی کوردستان دەکەین لەو بڕیارە بکشێنەوە.

 

"دەیانەوێت بەم هێرشانە دەنگی ڕاستی ببڕن"

ڕۆژنامەنووس ئاگری ئیبراهیم هەروەها باسی لەو بڕیارانە کرد کە لەسەر چوار ڕێکخراوی ژنان لە باشووری کوردستان دراون و وتی: ئەمە یەکەمجار نییە کە ڕێکخراوە ڕاگەیاندنەکان لە باشووری کوردستان ببنە ئامانجی هێرشەکان، ئەم ڕووداوە هیچ جیاوازییەکی نییە لەگەڵ هێرشەکانی پێشووی ڕۆژنامەنووسانی ژن تیڤی لە باکوور و ڕۆژهەڵاتی سووریا. لە پرۆسەیەکدا کە هەمووان داوای یەکسانی و دیموکراسی دەکەن، ئەو دامەزراوانە داخران، کەسانێک کە ڕاستیەکان بە جیهان دەڵێن هەمیشە ئامانجی هێرشەکانن، ئەوان دەیانەوێت لە ڕێگەی ئەم هێرشانەوە دەنگی ڕاستی و ئیرادەی ژنان نەهێڵن.

 

لە کۆتایی قسەکانیدا وتی: بێ ئەوەی بە فەرمی هیچ لەسەر ئەو دامەزراوانە بڵێن داخرانم وەک ڕۆژنامەنووسانی ژن تیڤی سەرەڕای هەموو هێرشەکانی ئێستا، بەردەوام دەبین لە کارەکانمان و ئەم بڕیارە ناتوانێت ئیرادەمان بشکێنێت، دەنگی ڕاستی دەگەیەنین بە مرۆڤایەتی.