ناوەندی هەواڵ

 

یەکێتی ڕۆشنبیرانی کانتۆنی جزیرە لە کتێبخانەی شلێر لە شاری قامیشلۆ، سیمینارێکی تایبەتی سەبارەت بە بارودۆخی سیاسی سووریا و ڕێککەوتنی ۲۹ی کانوونی دووەمی نێوان هەسەدە و حکومەتی کاتی سووریا ڕێکخست.

 

ئیلهام ئەحمەد، هاوسەرۆکی فەرمانگەی پەیوەندییەکانی دەرەوەی خۆبەڕێوەبەری ڕۆژئاوا لە سیمینارەکەدا قسەی کردو ئاماژەی بەوەدا کە هەوڵێکی زۆر هەیە بۆ دروستکردنی شەڕی ناوخۆیی و فیتنە لە نێوان پێکهاتەکاندا، وتیشی: دەیانەوێت گەلی کورد لەناوبەرن و بێ ماف و ناسنامە بیهێڵنەوە، بەڵام پڕۆژەی ئێمە بۆ ئازادیی هەموو گەلانە و ڕێگری لەو پیلانانە دەکەین.

 

جەختی کردەوە کە بڕیاری حکومەتی کاتی بۆ داننان بە مافەکانی کورد هەنگاوێکی ئەرێنییە و بۆ یەکەمجارە بڕیارێکی وا دەردەچێت، ئێمە لە ڕووی سیاسی و یاساییەوە بەدواداچوون دەکەین بۆ ئەوەی ئەو بڕیارانە لەسەر زەوی جێبەجێ بکرێن.

هەروەها لەبارەی وردەکارییە سەربازی و کارگێڕییەکانەوە، ئاشکرای کرد کە فیرقە و لیوای نوێ لە حەسەکە و کۆبانێ دروست دەکرێن و ژنان ڕۆڵی تێدا دەبینن، ئاماژەی بەوەش کرد کە پارێزگاری حەسەکە دیاری کراوە و گفتوگۆ لەسەر دەروازە سنوورییەکان و زمان بەردەوامە و لیژنەیەکیش بۆ نووسینەوەی دەستوور پێکدەهێنرێت.

 

ئیلهام ئەحمەد جەختی لە یەکێتی مێژوویی کورد کردەوە و ڕایگەیاند کە پێنووس لە فیشەک بەهێزترە، هەموو هەوڵێکیان بۆ گەڕانەوەی ئاوارەکانی عەفرین و سەرێکانی و دابینکردنی ئارامی و ئازادییە بۆ تەواوی خەڵکی ناوچەکە.