دەنگدانی تایبەتی هێزە ئەمنی و سەربازییەکان، نەخۆش و زیندانییەکان ئەمڕۆ بەڕێوەدەچێت، کاندیدێکیش دەڵێت "ئه‌مڕۆ دەرفەتی ئێــوەیە نوێنەری ڕاستەقینە و داکۆکیكاری مافه‌كانتان  دیاریبکەن".

ناوەندی هەواڵ

 

بەیانی ئەمڕۆ کاتژمێر ٧:٠٠ دەنگدانی تایبەت لە عێراق و هەرێمی کوردستان لە ٥٩٥ ناوەندی دەنگدان بە ڕووی ملیۆنێک و ٧٥٧ هەزار و ٧٢٧ کەس بەڕێوەدەچێت، ئەم دەنگدانە تایبەتە بە هێزە سەربازیی و ئەمنییەکان، ئاوارەکان، زیندانییەکان و نەخۆشەکانی نەخۆشخانە، کە خاوەنی کارتی بایۆمەترین مافی دەنگدانیان هەیە.

 

یوسرا ڕەجەب، کاندیدی سەربەخۆی ژمارە ٢٣ لە بازنەی ٥ی پارێزگای سلێمانی، سەبارەت بە دەنگدانی تایبەت لە تۆڕی فەیسبووکی خۆی دەنووسێت: "ئه‌مڕۆ دەرفەتی ئێــوەیە نوێنەری ڕاستەقینە و داکۆکیكاری مافه‌كانتان  دیاریبکەن".

 

هەروەها دەشنووسێت: "ڕوونه‌ له‌لاتان كێ ‌هۆكاره‌ بۆ برسیكردنی منداڵه‌كانتان، دەرفەتی ئێوه‌یه‌ تۆڵە لە دەسەڵاتێک بکـەنەوە كه‌وا خەمی ئێوەی نەبووە و نابێت، ئه‌وه‌ ئێمه‌ بووین شه‌ڕی قوتی ئێوه‌مان ده‌كرد له‌ به‌غدا و ئه‌مان له‌ هه‌رێم ٦٠ ڕۆژ جارێک به‌ هه‌زار ناڕه‌زایه‌تی ئه‌نجایش به‌ ته‌واوه‌تی مووچه‌كانتان وه‌رنه‌ده‌گرت".

 

یوسرا دەشڵێت چاوڕوانی هیـمەتی ئێوەین بۆ ئەوەی بەرەی چاکەخوازان فراوانتر بکەین دژ بەگەندەڵان و دەسەڵاتی بنەماڵــە.

 

بەپێی ئامارەکانی کۆمسیۆنی باڵای هەڵبژاردنەکانی عێراق، ملیۆنێک و ٧٥٧ هەزار و ٧٢٧ کەس کە ١٣ هەزار و ٧٦ کەسیان ژنن، لە سەرتاسەری عێراق دەنگدانی تایبەت دەیانگرێتەوە، ئامارەکانی هەرێمی کوردستانیش بەم جۆرەیە:

پارێزگای هەولێر: ٦٩ هەزار و ٤٤٤ کەس

پارێزگای سلێمانی: ٦٨ هەزار و ٤٦٨ کەس

پارێزگای دهۆک: ٤٨ هەزار و ٦٠٥ کەس

پارێزگای کەرکوک: ٤٦ هەزار و ٦٠ کەس

 

ت.پ