ناوەندی هەواڵ

 

وریشە مورادی، زیندانی سیاسیی کورد، لە زیندانی ئێڤینی ڕژێمی ئێرانەوە، بە پەیامێک پشتیوانی خۆی بۆ  خۆپیشاندەرانی سەرانسەری ڕۆژهەڵاتی کوردستان و ئێران نیشان دا.

 

دەقی پەیامەکەی وریشە مورادی بەم شێوەیەیە:

“ئەم ڕێگەیە بەردەوامیی ئەو وەرچەرخانە مێژووییەی "ژن، ژیان، ئازادی’ـیە، وەرچەرخانێک کە تێیدا کۆمەڵگە هەم دیکتاتۆریی ئایینی و هەم پاشایەتیی لە دوای خۆی جێهێشت، ژنان نەک وەک هێمایەک، بەڵکو وەک هێزێک کە دژی سیستمی باوکسالاری و دەسەڵاتخوازیی هەردوو جۆرە حوکمڕانییەکە ڕادەوەستن، پێشەنگی ئەم تێکۆشانەن.

 

ئەم وشانە لە پشت دیوارەکان و لە تەنیشت ئەو ژوورانەوە نووسراون کە دەنگیان بە لەسێدارەدان و ستەمەوە بەستراوەتەوە، ڕژێم پێی وایە جەستەکانی زیندانی کردووە، دەنگەکانی کپ کردووە و ئیرادەی گەلی شکاندووە؛ بەڵام مێژوو بەردەوام نیشانیداوە، کە نە دیوار نە دەرگا، نە کۆت و نە پەتی سێدارە ناتوانن ئاگری بەرگری خامۆش بکەن، خۆپیشاندانەکانی شارە جیاوازەکانی ئێران و بەتایبەتی ئیلام و کرماشان، بەرهەمی داڕمانێکی پێکهاتەیی و ئەنجامی ڕاستەوخۆی سیستمێکە، کە ژیان و کەرامەتی گەل بە تۆپ، چەک، گرتن و لەسێدارەدان بە بارمتە دەگرێت، کۆمەڵکوژیی دژی خەڵک لە مەلەکشاهی نیشانەیەکی ڕوونی دڵڕەقی و بێئومێدیی ئەم سیستمەیە و ئەمەش بەڵگەیەکی ئاشکرایە، کە ستەم و خوێنڕشتن نە ڕەوایی و نە سەقامگیری بەرهەم ناهێنێت، بەڵکو بەرگری و ئیرادەی بەکۆمەڵ سەرلەنوێ بونیات دەنێتەوە.

 

ئەم ڕێگەیە بەردەوامیی ئەو وەرچەرخانە مێژووییەی ‘ژن، ژیان، ئازادی’یە، وەرچەرخانێک کە تێیدا کۆمەڵگە هەم دیکتاتۆریی ئایینی و هەم پاشایەتیی لە دوای خۆی جێهێشت، ژنان نەک وەک هێمایەک، بەڵکو وەک هێزێک کە دژی سیستمی باوکسالاری و دەسەڵاتخوازیی هەردوو جۆرە حوکمڕانییەکە ڕادەوەستن، پێشەنگی ئەم تێکۆشانەن، ئامادەیی ژنان لە مەیدانەکاندا نەک تەنیا هاوسەنگیی هێز تێکدەدات، بەڵکو لە هەمان کاتدا نیشانی دەدات کە ئازادی لە ناو دڵی کۆمەڵگەدایە و هیچ دیکتاتۆر، یان شا، یان سیستمێکی کۆنەپەرست ناتوانێت دەستی بەسەردا بگرێت یان کۆنتڕۆڵی بکات.

 

گەلی کوردستان لە وێستگە وەرچەرخانە مێژووییەکاندا بەردەوام سەلماندوویەتی، کە بە پشتبەستن بە ڕێکخستنی کۆمەڵایەتی و یادەوەرییەکی زیندووی تێکۆشان، دەتوانن بێ گەڕانەوە بۆ هەر ناوەندێکی هێز، لە هەموو کایەکاندا جێگەی خۆیان بگرن، تێکۆشان لە کوردستان بەرهەمی ئیرادەی بەکۆمەڵ، ئەزموونی مێژوویی بەرگری و تۆڕە زیندووەکانی کۆمەڵگەیە؛ ئەمە تێکۆشانێکە کە ئازادی نەک وەک بەڵێنێک، بەڵکو وەک کردارێک دەبینێت، ئەم جوگرافیایە نیشانیداوە، کە مێژوو بە فەرمان، پەیام یان نۆستالژیای پاشایەتی نانووسرێتەوە، بەڵکو بە پراکتیک، بەرگری و قوربانیدان دەنووسرێتەوە.

 

ئەمڕۆ باسەکە گەڕانەوە بۆ ڕابردوو و گەڕانەوە بۆ تاج و تەخت نییە، هەروەها بەرهەمهێنانەوەی سیستمی ئیسلامیش نییە، پرسەکە گۆڕانکارییەکی مێژووییە لە هەردوو جۆرە دەسەڵاتە کۆنەپەرستەکە، ڕێبەرایەتیی ئەم ڕێگەیە نە لە دەستی پاشاکانی دوێنێدایە و نە لە دەستی حوکمڕانانی ئەمڕۆ؛ بەڵکو لە دەستی گەلدایە، ئێمە باوەڕمان بە کۆمەڵگەیەکی بڕیاردەر، خاوەن ئیرادە، دیموکرات و فرەچەشن هەیە، کە هەموو گەلان ناسنامە نەتەوەییەکان و ئایینەکان لەخۆ بگرێت.

 

ئازادی ڕێک لەناو ئەم کۆمەڵگەیەدایە و هیچ زیندانێک، هیچ لەسێدارەدانێک، هیچ ستەمێک و هیچ هێزێک ناتوانێت ئەم ڕێڕەوە مێژووییە ڕابگرێت".