ناوەندی هەواڵ

 

ڕێکخراوی سندووقی منداڵانی نەتەوەیەکگرتووەکان "یونسێف" دەربارەی بارودۆخی منداڵە دەستبەسەرکراوەکانی ئەم دواییەی خۆپیشاندانەکانی ڕۆژهەڵاتی کوردستان و ئێران ڕاگەیاندراوێکی بڵاوکردەوە.

 

لە ڕاگەیاندراوەکەدا هاتووە: داوای ئازادکردنی هەموو ئەو منداڵانە دەکەین کە لە کاتی ناڕەزایەتییەکان دەستبەسەر کراون، هەرچەندە ژمارەی تەواوی منداڵە دەستبەسەرکراوەکان دیار نییە، بەڵام پێویستە ڕێگە بدرێت چاودێری سەربەخۆ دۆخی تەندرووستی و شێوازی هەڵسوکەوت لەگەڵیان لەناو زیندانەکاندا هەڵبسەنگێنێت.

 

ئاماژە بەوەشکراوە، زیندانیکردن کاریگەریی نەرێنی درێژخایەنی لەسەر گەشە و داهاتوویان دەبێت، بۆیە داوا لە دەسەڵاتدارانی ئێران دەکەین ڕێز لە مافەکانیان بگرێت و ڕێگە بدات بەردەوام پەیوەندییان بە بنەماڵەکانیانەوە بکەن.

 

بەپێی ڕاپۆرتەکان لەم ناڕەزایەتییانەدا زیاتر لە ٢٣٠ منداڵ کوژراون و ئامارەکان نیشانی دەدەن کە زیاتر لە ٢٧٪ـی دەستبەسەرکراوەکان تەمەنیان لە خوار ١٨ ساڵدایە.