قامیشلۆ

 

لە ٦ی کانوونی دووەەوە چەتەکانی هەتەشە لە گەڕەکی شێخ مەقسود و ئەشرەفیەی شاری حەلەبی سوریا کۆمەڵکوژییەکی ترسناک دژی سەدان منداڵ و ژن ئەنجام دەدەن، ئەوان ئەم تاوانانەیان بە ئاشکرا ئەنجامداوە، نەخۆشخانەکانیان کردووەتە ئامانج بە تۆپباران و کوشتن و دەستگیرکردنی کارمەندانی پزیشکی، لە پێشێلکارییەکی ئاشکرادا کە دەکاتە تاوانی جەنگ.

 

مانگی سووری کورد لە قامیشلۆی باکوور و ڕۆژهەڵاتی سووریا ١٢ی کانوونی دووەم ڕاگەیاندراوێکی بڵاوکردەوە و تیایدا دەستبەسەرکردنی سێ لە ئەندامانی وەک بارمتە لەلایەن حکومەتی کاتی سووریاوە ڕاگەیاند.

 

لە ڕاگەیاندراوەکەدا پشتڕاستی کردووەتەوە، کە لەم دواییانەدا سێ ئەندامی مانگی سووری کورد لە گەڕەکی ئەشرەفیە و شێخ مەقسودی شاری حەلەب لەلایەن حکومەتی کاتی سووریاوە دەستگیر کراون، ڕوونیشی کردۆتەوە، کە ئەرکی مانگی سووری کورد سنووردارە بە کاری مرۆیی و پێشکەشکردنی فریاگوزاری سەرەتایی و هاوکاریی پزیشکی بۆ هاوڵاتیانی مەدەنی کە بەهۆی هێرشەکانەوە زیانیان بەرکەوتووە.

 

جەخت لەوە کراوەتەوە کە تیمەکانی مانگی سووری کوردی بە تەواوی لە بواری مرۆیی و دوور لە هەر ئەجێندایەکی سیاسی و سەربازی کار دەکەن.

 

جەختی لەوە کردەوە، کە دەستبەسەرکردنی تیمەکانی مانگی سووری کورد پێشێلکارییەکی ئاشکرای یاسای مرۆیی نێودەوڵەتی پێکدەهێنێت، کە یاسا نێودەوڵەتییەکان مسۆگەری پاراستنی کارمەندانی پزیشکی و فریاگوزاری لە کاتی ململانێکاندا دەکەن.

داوای ئازادکردنی دەستبەجێ و بێ مەرجی هاوکارەکانی و گەرەنتی بۆ پارێزراوییان و گەڕانەوە بۆ ئەرکە مرۆییەکانیان کرد، هەروەها حکومەتی کاتی بە تەواوەتی بەرپرسیارێتی لە هەر زیانێک کە بەسەریاندا بێت، داوای لە هەموو ڕێکخراوە نێودەوڵەتی و مرۆییەکان کرد بە پەلە دەستێوەردان بکەن، جەختی لەسەر پێویستی ڕێزگرتن لە بنەماکانی کاری مرۆیی و پاراستنی تیمەکانی پزیشکی و فریاگوزاری لە هەر جۆرە دەستگیرکردنێک یان بە ئامانجگرتنێک کردەوە.

 

ئەو سێ ئەندامەی کە دەستگیرکراون بریتین لە: یوسف حەنان حەمۆکۆ، شۆفێری ئۆتۆمبێلی فریاگوزاری، عەبدول ڕەحمان عەبدە، پەرستار، ڕامی حسێن عەلی سەرۆکی تیمی پزیشکی.