ناوەندی هەواڵ

 

پۆلیسی دهۆک لە ڕاگەیاندراوێکدا ئاماژەی بەوەدا شەوی ڕابردوو لە کۆمەڵگای چڕە لە شارۆچکەی شێخان سەر بە پارێزگای دهۆک، لەسەر کێشەی زەوی و زار لە نێوان جوتیار و خاوەن موڵکێکدا، شەڕە تەقە دروستدەبێت و ژنێک دەکوژرێت.

 

ژنەکە تەمەنی ٣٠ ساڵە و دایکی سێ منداڵە و بە سەردان چووەتەوە ماڵی باوکی، لە شەوی ڕابردوو لە ئەنجامی شەڕە تەقەیەکدا کوژرا.

 

بەپێی زانیارییەکان کێشەی زەوی و زار لە نێوان جوتیار و خاوەن موڵکەکەدا ماوەیەکی درێژە بوونی هەیە و کێشەکەشیان گەیشتووەتە وەزارەتی ناوخۆی حکومەتی هەرێمی کوردستان، بە ئامادەبوونی ڕێبەر ئەحمەدی وەزیری ناوخۆ، هەردوولا کۆبوونەوەتەوە و بەڵێنیان داوە کە زەوییەکە کشتوکاڵی تێدا دەکرێت تا بەڵگەی خاوەنداری موڵکەکە لەلایەن حکومەتەوە دەگەڕێتەوە.

 

بەهۆی گوێنەدانی حکومەتی هەرێمی کوردستان بە کێشەکە و پاش ساڵێک نەگەڕانەوەی بەڵگەکان، شەوی ڕابردوو شەڕە تەقە دروستبوو، بەهۆیەوە ژنێک کوژرا.

 

پۆلیسی دهۆک ئەوەشی ڕاگەیاند کە تاوانبارەکان دەستگیرکراون و شەڕەکە کۆنترۆڵ کراوە.

 

ت.پ