حەسەکە 

 

بە دروشمی "پەروەردە بە زمانی دایک مافێکی ڕەوا و بنەڕەتییە"، دانیشتووانی شاری حەسەکە لە کانتۆنی جزیرەی باکوور و ڕۆژهەڵاتی سووریا بە بۆنەی ١٥ی ئایار ڕۆژی زمانی کوردی ڕێپێوانێکی جەماوەرییان ئەنجامدا. 

  

ڕێپێوانەکە لە بازنەی مەرشۆی شارەوە دەستی پێکرد و لە گۆڕەپانی ئازادی کۆتایی هات. دوای خولەکێک بێدەنگی، مامۆستا عەزیز عەلی، مامۆستای زمانی کوردی لێدوانێکی دا. 

  

"پێویستە پەروەردەی زمانی کوردی بخرێتە ناو دەستوورەوە" 

لە ڕاگەیەندراوەکەدا هاتووە: ئێمە ئەمساڵ بە خۆشحاڵی و جۆش و خرۆشێکی زۆرەوە پێشوازی لە ڕۆژی زمانی کوردی ١٥ی ئایار دەکەین  و بەبۆنەی ئەم ڕۆژە مێژووییە پیرۆزبایی لە گەلەکەمان دەکەین، نەک هەر ئێمە، بەڵکو هەموو تێکۆشەران و ئازادیخوازانی دۆزی کوردستان کە لە پێناو ئەم دۆزی کوردستانەوە خەباتیان کردووە، چاوەڕوانی ئەم ساتەوەختە بوون، هاوکات لەگەڵ ئەم گۆڕانکارییانەی کە لە ناوچەکە ڕوودەدەن و لە سایەی کاری بێوچانی شەهیدان و کرێکاران، ئەمڕۆمان دۆزی نەتەوە چووەتە قۆناغێکی نوێ و ئێستا کاتی دەستەبەرکردنی دەستکەوتەکانی شۆڕشەکەمانە پیرۆزترین دەستکەوت کە دەمانەوێت بیپارێزین، مافی بەکارهێنانی زمانەکەمانە، کە بەرزترین بەهای کوردە و دەبێت بە فەرمی لە دەستووردا بناسرێتەوە. 

 

"با هەموو ڕۆژەکانمان ڕۆژی زمان بن" 

لەم ساڵە مێژوویی و چارەنووسسازەدا بە ڕێز و سوپاسەوە هەموو شەهیدانی ڕێگای ئازادی و هەموو زەحمەتکێشانی کورد بەبیردێنینەوە، هەروەها داوا لە کۆمەڵگاکەمان دەکەین کە خاوەندارێتی لەم بۆنە پیرۆزە بکەن و بەشداری تێدا بکەن، کە ڕۆژی زمانی کوردییە، با هەموو ڕۆژەکانمان ڕۆژی زمان بن، پێویستە پێکەوە بارگرانی زمانەکەمان هەڵبگرین، بەو پێیەی ساڵێکی تایبەتە، لەگەڵ هەموو دامەزراوە پەروەردەییەکانی ڕۆژئاوای کوردستان و باکور و ڕۆژهەڵاتی سووریا پێکەوە چالاکییەکانی ڕۆژی زمان دەستپێدەکەین بۆ ئەوەی پێکەوە ئەم ساتە مێژووییانە زیندوو بکەینەوە. 

  

ڕێپێوانەکە بە دروشمی "زمانی ئێمە بوونی ئێمەیە" کۆتایی هات.