كچێكی كورد داهێنانێكی گەورە لە بواری ئەلیكترۆنی دەكات
كچێكی كورد لە بەریتانیا توانی بۆ یەكەم جار بڕوانامەی ماستەر بە پلەیەكی باڵا لە بواری هێرشە ئەلیكترۆنییەكان بەدەستبهێنێت، هەروەها سیستەمێكی نوێش بۆ دۆزینەوەی ئیمێڵی ساختە دابهێنێت.
ناوەندی هەواڵ- كچێكی كورد لە بەریتانیا توانی بۆ یەكەم جار بڕوانامەی ماستەر بە پلەیەكی باڵا لە بواری هێرشە ئەلیكترۆنییەكان بەدەستبهێنێت، هەروەها سیستەمێكی نوێش بۆ دۆزینەوەی ئیمێڵی ساختە دابهێنێت، ئەو كچە دەڵێت: ماستەرنامەكەی كەلێنێكی گەورەی لە بواری سایبەری سیكیوریتی پڕدەكاتەوە.
میدیا ناوخۆییەكان لەزاری ئەوین ئەنوەر ئەبوبەكر جاف ئەو كچەی خاوەن دا‌هێنانێکە سەبارەت بە پرۆژەكەی و بڕوانامەكەی زانیاری نوێ دەخەنەڕوو.
ئەوین ئەنوەر ئەبوبەكر جاف كچێكی كوردی خەڵكی سلێمانییە توانی بە سەركەوتوی پلەی یەكەمی بڕوانامەی ماستەر لە زانكۆیەكی بەناوبانگی نێودەڵەتی بەریتانیا لە شاری لیڤەرپوڵ بەدەستهێنا.
ئەو كچە كوردە دەڵێت: ماستەرنامەكە كەلێنێكی گەورەی لە بواری سایبەری سیكیوریتی پڕكردووەتەوە، كە یەكێكە لە گرنگترین بەشەكانی ئاسایشی ئەلكترۆنی بە بەكارهێنانی زیرەكی دەستكرد و مۆدێلەكانی دیپ لێرنین، كە هاوكارە بۆ جیاكردنەوەی ئیمەیڵی درووست لە ئیمەیڵی ساختەكان، لە كاتی تاقیكردنەوەشیدا لەكۆی هەزار و ٨٠٠ ئێمەیڵ لە ٩٦٪ـیان یەكلایی كردووەتەوە.
باسی لەوەشكردووە، سەرەڕای ئەوەی لەپاشخانێكی زمانەوانی و کەلتووری و ئاینی جیاوازەوە چووەتە ژینگەی خوێندن لە وڵاتی بەریتانیا بەڵام توانی پلەی یەكەم لە هەردوو بەشی ماستەرنامەكەی بەدەست بهێنێت.