قامیشلۆ

 

ئاهەنگێک لە شاری قامیشلۆ لە کانتۆنی جزیرە لە باکوور و ڕۆژهەڵاتی سووریا بە بۆنەی دەیەمین ساڵڕۆژی دامەزراندنی هێزەکانی پاراستنی ژنانی بەس نەهرین کە هێزێکی خۆبەڕێوەبەری ژنانی ئاشووری و سریانییە بەڕێوەچوو.

 

نوێنەرانی یەکینەکانی پاراستنی ژنان "یەپەژە"، نوێنەرانی خۆبەڕێوەبەری و دامەزراوەکانی، تەڤگەرەکانی ژنان و ئەنجومەنی ژنانی سووریا بەشدارییان کرد. ئامانجی ئاهەنگەکە تیشک خستنە سەر ڕۆڵی ناوەندی هێزەکانی پاراستنی ژنانی بەس نەهرین بوو لە پاراستنی مافەکانی ژنانی ئاشووری و سریانی و دەستەبەرکردنی ئاسایش و سەقامگیری لە باکوور و ڕۆژهەڵاتی سووریا.

 

لە وەڵامی کۆمەڵکوژییەکان دامەزرا

هێزەکانی بەس نەهرین لە ٣٠ی ئابی ٢٠١٥ دامەزرا، وەک وەڵامدانەوەی ڕاستەوخۆ بۆ هێرشی چەتەکانی داعش لە ناوچەکە. ئەمڕۆ بوونەتە نموونەی بەردەوام و ئیرادە لە خەباتدا، دەنگی ژنانی سریانین کە داکۆکی لە مافی ژیانێکی ئازادو ئارام دەکەن.

 

چالاکییەکە بە مەراسیمێکی سەربازی دەستیپێکرد کە لەلایەن هێزەکانی پاراستنی بەس نەهرینەوە بەڕێوەچوو. دوای ئەمەش نور حور، نوێنەری هێزەکانی پاراستنی ژنانی بەس نەهرین، وتارێکی پێشکەش کردو وتی:  شەڕی ئێمە لە مەیدان تەنها خەباتێک نەبوو دژی دوژمن، بەڵکو شەڕێکی درێژخایەن بوو لە دژی ئەو ستەم و سنووردارکردنانەی بەسەر ئێمەی ژناندا سەپێندرا، ئەمڕۆ ئێمە باڵا بەرز وەستاوین و دەیسەلمێنین کە چەک جیاوازی لە نێوان ڕەگەزەکاندا ناکات و ئازایەتی بۆ میرات نییە، لە دڵی شەڕەکەدا لەدایک دەبێت.

 

هەروەها شەزا گەریبە، بەرپرسی بەشی پاراستنی موڵک و ماڵی قەبر هەورە، شانازی و شەرەفی خۆی بۆ گەشتی هێزەکانی پاراستنی ژنانی بەس نەهرین دەربڕی و جەختی لە ڕۆڵی پێشەنگی ژنان لە خەبات بۆ یەکسانی و دادپەروەری کردەوە.

 

"دامەزراندنی هێزەکە شۆڕشێکی فیکری و کۆمەڵایەتی بوو"

هەروەها جۆرجێت بارسوم، نوێنەری یەکێتی ژنانی سریانی لە وتارەکەیدا وتی: دامەزراندنی هێزەکانی پاراستنی ژنانی بەس نەهرین تەنها ڕووداوێکی سەربازی یان ڕێکخراوەیی نەبوو، بەڵکو شۆڕشێکی فیکری و کۆمەڵایەتی بوو، نوێنەرایەتی ئیرادەی ئازادی ژنان بوو، ژنان بینەرێکی پاسیڤ نین لەسەر ڕێگای مێژوو، بەڵکو هێزێکی چالاکن کە گۆڕانکاری دروست دەکات، ژنان نوێنەرایەتی ڕۆحی بەرەنگاربوونەوە لە خۆیاندا دەکەن دڵەکان داهاتووی گەشاوەی گەلەکەمان تەنها لەسەر یەکسانی و دادپەروەری بونیاد بنرێت، لەم یادە مەزنەدا پابەندبوونی خۆمان بە بنەماکانی خەباتی هاوبەشەوە دووپات دەکەینەوە.