ناوەندی هەواڵ

 

دەستبەسەرکردنی فەریدە عەبدی یەزدی، هاوڵاتی بەهایی دانیشتووی شاری شاهینشهر، پێی ناوە مانگی سێیەمەوە سەرەڕای ئەوەی تووشی چەندین نەخۆشی درێژخایەن بووە، هێشتا لە دەستبەسەریدا ماوەتەوە.

 

لە کاتێکدا، فەریدە عەبدی یەزدی لە زیندانی دەوڵەت ئابادی ئیسفەهان لە چاودێری پزیشکی تایبەتمەند بێبەش دەکرێت، خێزانەکەی لە نادڵنیایی تەواودان سەبارەت بە دۆخی دۆسیەکەی و ڕەوتی لێکۆڵینەوەکان و هیچ زانیارییەکی فەرمی و ڕوون لە دەوری بارودۆخەکەیدا نییە، ڕاپۆرتەکانی مافی مرۆڤ پشتڕاستی دەکەنەوە کە بەردەوامی ڕەتکردنەوەی چارەسەر، نیگەرانییەکانی زیاتر دەکات سەبارەت بە تێکچوونی تەندروستی.

 

دەستگیرکردن لە ماڵەوە و گواستنەوەی بۆ زیندانی دەوڵەت ئاباد

بەپێی زانیارییە بەردەستەکان، هێزەکانی سەر بە ئیتلاعاتی سپای پاسداران هەڵیانکوتایە سەر ماڵی فەریدە عەبدی یەزدی لە شاهینشهر و دەستگیریان کرد، لە کاتی ئۆپەراسیۆنەکەدا ماڵەکەیان پشکنیوە، دەست بەسەر مۆبایلەکەیدا گیراوە.

 

دوابەدوای دەستگیرکردنەکەی، گواسترایەوە بۆ زیندانی دەوڵەت ئاباد لە ئیسفەهان و تا ئێستاش لەوێ دەستبەسەرە، هیچ زانیارییەکی فەرمی سەبارەت بە هۆکاری دەستگیرکردنی و ئەو تۆمەتانەی کە ئاراستەی کراوە، بڵاونەکراوەتەوە.

 

دۆخێکی یاسایی تاریک و پەرەسەندنی نیگەرانی بۆ خێزانەکە

سەرچاوەیەکی نزیک لە خێزانەکوی ئەو هەواڵەی بۆ هەرانا پشتڕاستکردەوە و وتی: فەریدە عەبدی نزیکەی ٣٥ ڕۆژ لەمەوبەر دەستگیرکراوە و لەو کاتەوە تا ئێستا هیچ پێشکەوتنێکی ڕوون لە مامەڵەکردنی دۆسیەکەیدا بەدی نەهاتووە.

 

ئەو سەرچاوەیە ئاماژەی بەوەشکرد، نەبوونی زانیاری سەبارەت بە باری یاسایی و باری تەندروستی، دڵەڕاوکێی خێزانەکەی و کەسە نزیکەکانی زیاتر کردووە، دڵەڕاوکێیەک کە لەگەڵ تێپەڕبوونی ڕۆژێکدا توندتر دەبێتەوە.

 

نەخۆشی درێژخایەن و ڕەتکردنەوەی چاودێری پزیشکی

بەپێی زانیارییەکان، فەریدە عەبدی یەزدی تەمەن ٦٢ ساڵ، تووشی چەندین نەخۆشی بووە، لەوانە نەخۆشی شەکرە، کەمی غودە و هەوکردنی ددان، سەرچاوە نزیکەکانی ئەو خێزانە ئاماژە بەوە دەکەن، کە باری تەندروستی پێویستی بە چاودێری پزیشکی تایبەتمەند و گواستنەوەی بۆ ناوەندەکانی چارەسەری دەرەوەی زیندان هەیە.

 

سەرەڕای ئەمەش هیچ هەنگاوێکی کاریگەر بۆ چارەسەرکردن یان گواستنەوەی ئەو ژنە نەنراوە و تا ئێستاش لە دۆخێکی نەگونجاودا لە زیندانی دەوڵەت ئاباد لە ئیسفەهان دەستبەسەرە.

 

بەگوێرەی زانیارییە بەردەستەکان، فەریدە عەبدی یەزدی لە ماوەی ڕابردوودا بەهۆی چالاکییەکەیەوە ڕووبەڕووی دەستگیرکردن و ڕێوشوێنی یاسایی بووەتەوە و تا ئێستاش دۆخی دۆسیەی ئێستای ناڕوونە.

 

شێوازێکی دووبارەبوونەوەی فشار لەسەر کۆمەڵگەی بەهایی

لە ساڵانی ڕابردوودا، چەندین ڕاپۆرت بڵاوکراونەتەوە کە ئاماژەن بۆ پەرەسەندنی فشاری ئەمنی و دادوەری لەسەر هاوڵاتیانی بەهایی لە ئێران، بەپێی ئامارە بڵاوکراوەکان، بەشێکی بەرچاو لە ڕاپۆرتەکان سەبارەت بە پێشێلکردنی مافی کەمینە ئایینییەکان پەیوەندییان بە کۆمەڵگەی بەهاییەکانەوە هەیە.

 

ئەم ڕاپۆرتانە نیشان دەدەن کە لە ماوەی ساڵی ڕابردوودا زیاتر لە ٦٢٪ی ئەو حاڵەتانەی لە بواری کەمینە ئایینییەکان تۆمار کراون پەیوەندییان بە پێشێلکردنی مافی هاوڵاتیانی بەهایی هەبووە.