بە ئامانجگرتنی خوێندنگەی ئەلتابعین خەڵکی مەدەنی لەناویاندا منداڵ کوژران

لە ئاکامی هێرشی هێزەکانی ئیسرائیل بۆ سەر خوێندنگەی ئەلتابعین کە ئاوارەکانی تێدا نیشتەجێیە، لە شەقامی ئەلنەفەق لە کەرتی غەززە، ٨ هاوڵاتی مەدەنی کوژران و دەیان کەسیش برینداربوون.

ناوەندی هەواڵ

 

لە ٤١٨یەمین ڕۆژی شەڕی سەر غەززە، لە شەقامی ئەلنەفەق لە کەرتی غەززە،  بەهۆی بەئامانجگرتنی خوێندنگەی ئەلتابعین کە ئاوارەکانی تێدا نیشتەجێیە، ٨ هاوڵاتی مەدەنی کوژراون کە منداڵیشیان تێدایەو ژمارەیەکی دیکەش برینداربوون و تا ئێستاش گەڕانەکان بەردەوامن بۆ کەسانی بێسەروشوێن.

 

هەروەها هێزەکانی ئیسرائیل ماڵێکیان کردە ئامانج کە دەکەوێتە پشت خوێندنگەی “شهداء الزيتون” و لانیکەم ٧ هاوڵاتی مەدەنی کوژراون کە منداڵیان تێدایەو بیست برینداری لێکەوتەوە.

 

لە بەرەبەیانی ئەمڕۆ ٢٧ی تشرینی دووەمەوە بۆردومانەکە لە نزیک ناوەندی پەناگەی بەیت لاحیە و پڕۆژەی بەیت لاحیە و دەوروبەری نەخۆشخانەی کەمال عەدوان چڕ بووەتەوە.

 

هێزەکانی ئیسرائیل گەمارۆی قوتابخانەی " عوني الحرثاني"یان دا و ئاوارەکانیان ناچار کرد چۆڵی بکەن و بەرەو ڕۆژئاوای شاری غەززە بڕۆن، هەروەها بۆردومانی ڕۆژهەڵات و ڕۆژئاوای شارەکە لە ڕەفعە چڕتر بوونەوە.