ناوەندی هەواڵ

 

بەیانی ئەمڕۆ هەواڵی کۆچی دوایی کوێستان داودی، چالاکوانی سیاسی و ئەندامی کەنەکە بە نەخۆشی شێرپەنجە بڵاوکرایەوە، کە ساڵانێکی لەناو خەبات و تێکۆشاندا بەسەربردووە.

 

کوێستان داودی لە بنەماڵەیەکی نیشتمانپەروەر گەشتی ژیانی لە شاری مهاباد لە ڕۆژهەڵاتی کوردستانەوە دەستپێکردووە و دژی نادادییەکانی ڕژێم و لەپێناو دۆزی گەلی کورددا لە ئێران لە تێکۆشاندا بووە، چەندین جار زیندانی کراوە و دوای ئاوارەبوونی بۆ ئەوروپا دەستبەرداری تێکۆشان نەبووە و پشتیوانی خەباتی ئازادیخوازانەی ژنانی چوار پارچەی کوردستان بووە.

 

لەوباریەەوە كۆمەڵەی ژنانی كوردستان-کەژەکە پەیامێکی سەرەخۆشی بۆ کۆچی دوایی کوێستان داودی بڵاوکردەوە و ڕایگەیاند، "پێشەنگێكی تێكۆشانی نەتەوەیی ‌و ژنانمان لەدەستدا".

 

دەقی پەیامەکەی کەژەکە؛

هەواڵی كۆچی دوایی هەڤاڵ كوێستان داودیمان پێگەیشت‌ و لە ناخەوە خەمباری كردین، بەناوی كۆمەڵەی ژنانی كوردستان-کەژەکەوە پرسە و سەرەخۆشی لە خۆمان ‌و بنەماڵەی هەڤاڵ ‌و پێشەنگی تێكۆشانی نەتەوەیی‌ و ژنان كوێستان داودی دەكەین، ڕایدەگەیەنین كە كۆچی دوایی هەڤاڵمان خەسارەیەكی گەورە بوو بۆ تێكۆشانمان ‌و پڕكردنەوەی ئاستەمە ‌و ڕەنجێكی زۆری دەوێت، بەشداری خەمی ئێوەین، بەڵێن دووپات دەكەینەوە بۆ بەدیهێنانی خەون‌ و ئامانجەكانی هەڤاڵ كوێستان ئاستی تێكۆشان بڵند بكەین ‌و هیواخوازین دوا خەمی بنەماڵە بەڕێزەكەتان بێت.

 

 

لە مێژووی ژنانی كورددا كەسایەتی ‌و پێشەنگ ‌و تێكۆشەری وەك هەڤاڵ كوێستان بە زەحمەت دروست دەبن، بە تایبەت ژنێك كە بتوانێت هەموو كۆتوبەند ‌و سنورەكانی داگیركاری، پیاوسالاری، بنەماڵەگەری‌ و پارچەگەری تێپەڕێنێت‌ و لە هەر قۆناخ ‌و هەر شوێنێك ‌و هەر كاتێك بە رۆح ‌و زیهنی نەتەوەیی ‌و دیموكراتی، ژن بوونێكی راستەقینەوە بێ گوێدانە ئاستەنگیی ‌و بەربەستەكان بەردەوامی بە تێكۆشانی خۆی بدات.

 

هەڤاڵ كوێستان بۆ خەباتی ئێمەی ژنان پێشەنگ ‌و ڕێنیشاندەر ‌و نمونەیەكی جوان بوو لە بەرخۆدان، كە لە ١٩٧٩ەوە بەبێ ماندووبوون ‌و ڕاوەستان بەردەوامی بەو بەرخۆدان ‌و تێكۆشان ‌و وڵاتپارێزیەی خۆی داوە، كە لە بنەماڵەكەیەوە فێری بووە، هەر ڕۆژ توانای ئەوەی لە خۆیدا بەرجەستە و پێشخست كە ئەو توانا ‌و هەوڵانە گەورەتر بكات، بەمەش توانی ببێتە نمونەیەك كە تەواوی سنورەكان لە جوگرافیا ‌و فكری ‌و چەمكە كلاسیكەكان تێپەڕێنێت، بەو ڕۆحەوە هەڤاڵ كوێستان دواجار لەپێنا‌و ئەو ئامانج‌ و خواستە گەورەیەی كە هەیبوو لەناو خەباتی یەكێتی نەتەوەییدا خۆی دۆزیەوە ‌و بەردەوامیدا بە تێكۆشانەكەی.

 

هەڤاڵ كوێستان ژنێك بوو كە لە ڕۆژهەڵات، باكوور، باشوور، ڕۆژئاوا، دەرەوەی وڵات لە هەر كوێیەك هەستی بە پێویستی بكردایە لەوێ ئامادە ‌و خەباتگێر بوو، وە كار ‌و تێكۆشانی بەڕێوە دەبرد، كۆچی دوایی هەڤاڵ كوێستان بۆشاییەكی گەورە دەبێت لە تێكۆشانی ژنانی كورد لە هەر چوار پارچەی كوردستان، بەڵام ئەو میراسە پیرۆز ‌و جوانەی كە بۆ ئێمەی بەجێهێشتووە سەروەتێكە‌ و دەتوانین وەك ژنانی كورد بیكەین بە ئەزموون ‌و مێژووێك بۆ بەردەوامیدان بە تێكۆشانمان تا گەیشتن بە ئامانجەكانی هەڤاڵ كوێستان كە هەیبوون.

 

جارێكی تر پرسە ‌و سەرەخۆشی ئاراستەی بنەماڵەی سەربەرزی هەڤاڵ كوێستان، خۆمان‌و تەواوی ژنانی كورد دەكەین، وەك خۆی لە دوا پۆستی لە تۆڕی كۆمەلایەتی بۆ شۆرشی ژن، ژیان، ئازادی كە خەون ‌و ئامانجی هەڤاڵ كوێستان بوو، بە ئومێدەوە نوسیبووی بۆمان "ئێوە لەسەر ئەو رێگایە بەردەوام بن" بەڵێنی بەردەوامیدان بە ڕێگای تێكۆشانی هەڤاڵمان دەدەین، تا گەیشتن بە ژیانێكی ئازاد.

 

ژن، ژیان، ئازادی

كۆمەڵەی ژنانی كوردستان- کەژەکە