ناوەندی هەواڵ

 

بە پێشەنگایەتی کۆمەڵەی ژنانی ئازادی کوردستان-کژار لە شاری ستۆکهۆڵمی پایتەختی سوید کۆنفرانسی "ژن، ژیان، ئازادی"یان لە ڕۆژانی ٢٠-٢١ی ئەم مانگە بەڕێوەچوو، تیایدا زیاتر لە ١٠٠ ژن لە ژنانی نەتەوە ستەملێکراوەکانی ڕۆژهەڵاتی کوردستان و ئێران، ئەفغانستان، ئەوروپا و ئەمریکا و کەنەدا بەشدارییان کرد و گفتوگۆ لەسەر پرسی ژنان کرا و گرنگی یەکێتی ژنانی جیهان و هاوخەباتی بۆ ئازادی خرایەڕوو.

 

"تێکدانی سروشت کاریگەری لەسەر ژنان کردووە"

لە دووەم ڕۆژی کۆنفرانسەکەدا نەدا هۆشەنگ، بە کارەکانی لە سوید و ئەکادیمیای کەنەدا ناسراوە، لەگەڵ باسکردنی پرسی وێرانکردنی ناوچە و شوێنەوار و ئیکۆلۆژیای شارەکانی ڕۆژهەڵاتی ناوەڕاست، هەڵسەنگاندنی بۆ شۆڕشی ژنان کرد و وتی: دەسەڵاتداران لە ڕۆژهەڵاتی ناوەڕاست و بە تایبەت ڕژێمی ئێران لەپێناو درێژەدان بە دیکتاتۆرییەتی خۆیان سروشت و شارەکانی کوردستان و ئێران وێران دەکەن، بەمە ژیانی ملیۆنان کەس زیاتر و زیاتر لەناو دەچێت، لەم قۆناغەدا تەنانەت خواردنەوەی ئاو لە ئێران شتێکە کە هەموو کەسێک بە سەلامەتی دەستی ناکەوێت، دابەشکردنی سامانە سروشتییەکان ناکۆکی گەورەی لە چوارچێوەی دابەشکارییە کۆمەڵایەتییەکاندا دروستکردووە.

 

هەروەها وتیشی: بێ گومان لەناوبردنی سروشت زۆرترین کاریگەری لەسەر ژنان هەبووە، کاتێک قەیرانێک لە هەموو کۆمەڵگەدا ڕوودەدات، ئەو بەشەی کۆمەڵگە زۆرترین کاریگەریی لەسەرە، کە لە ڕیزەکانی پێشەوەی خەباتدایە، ئەگەر ژنان زۆرترین زیانیان بەرکەوتووە بەهۆی لەناوچوونی ئیکۆلۆژیاوە، ئەوا دەتوانین بڵێین ژنان لە پێشەنگی بەرخۆدان بۆ سروشتدان، لەم خاڵەوە بەدواوە بەدیلێکی بەرخۆدان بە ناوی ئیکۆلۆژیا لەناو بەرخۆدانی ژناندا هەیە، بەهۆی لەناوچوونی ئیکۆلۆژیا و سیاسەتی داگیرکارییەوە ژنان خاکەکەیان بەجێدەهێڵن، توندوتیژیی دەوڵەت بەرامبەریان کەم نابێتەوە و دەوڵەت هەموو وڵات دەکاتە کۆمەڵگەیەکی پیشەسازی و سەربازی، بۆیە ئێستا وشەی 'ئیکۆفیمینیزم' لە کارنامەی ژنانی ڕۆژهەڵات و کوردستاندایە، ئەم هۆشیارییەش دوای تیرۆرکردنی ژینا ئەمین و سەرهەڵدانی 'ژن، ژیان، ئازادی' هاتە بەرنامەی کارەوە.

 

ڕۆژین موکریانی: پێویستە باسی سیستەمی دەوڵەت-نەتەوە بکرێت

ڕۆژین موکریانی، کە لە کۆلێژی کۆرک کار دەکات، لە بارەی داگیرکاری، بنیادنانی دەسەڵاتی ناسیۆنالیستی دوا و تیشکی خستەسەر سیستمی دەوڵەت-نەتەوە، وتی: هەرچەندە لە هەموو جیهاندا باسی بەرخۆدانی ژنان دەکرێت، بەڵام پێویستە ئەم ڕاستییە لەبەرچاو بگیرێت و بۆ یەکگرتوویی بەرخۆدان، سیستەمی دەوڵەت-نەتەوە، کە خۆی لەسەر بنەمای قەیرانی ئیکۆلۆژی، ئابووری، شەڕ و داگیرکاری جێگیر کردووە، کێشەی گەورەی ناوەتەوە، بە سیستمی حوکمڕانی نێر-نەتەوە-دەوڵەت، سیستمی سەرمایەداری لە هەموو ڕوویەکەوە بووە بە یەک و لە ئەنجامی ئەمەشدا جینۆسایدی نەتەوەیی، وێرانکاری و توندوتیژی سێکسی، بەکارهێنانی کرێکاران و لەناوبردنی ئیکۆلۆژی سەریهەڵداوە.

 

"کێشەی کوردستان و بەلوچستان لە سەردەمی تەواوی بەرخۆدانەکەدا هەرگیز باس نەکرا"

ڕۆژین موکریانی باسی لەوەشکرد، دوای کوشتنی ژینا ئەمینی، سەرهەڵدانی گەورە دەستیپێکرد و هەموو جیهان باسیان لە یەکڕیزی ژنان کرد، وتیشی: لایەنەکانی ئەم سەرهەڵدانە هێشتا پەیوەندییەکانیان بە شێوەیەکی قووڵ و تەندروست بەهێز نەکردووە، لەبەر ئەوەی کێشەی نەتەوەیی باس نەکراوە، هەموو بەشەکانی کۆمەڵگە ناتوانن بە شێوەیەکی بەهێز بەشداری لە بەرخۆدانەکەدا بکەن، بۆ نمونە لە هەموو سەرهەڵدانەکەدا باس لە کێشەی کورد و بەلووچەکان نەکرا، لایەنەکانی بەرخۆدان نەیانتوانی لەسەر ئەو بنەمایە زمان و گێڕانەوەی هاوبەش بنیاد بنێن، بەداخەوە ئەمە دەبێتە هۆی سەرکوتکردنی بەرخۆدان لە داهاتوودا و چارەسەرنەکردنی کێشەی فرە نەتەوەیی لێدەکەوێتەوە، کەژار بە ڕوونی ئاشکرای کردووە کە بزووتنەوەی ئازادی ئەرک و پارادایمی ڕاستەقینەی هەیە بۆ چارەسەرکردنی کێشەی نەتەوەیی و بنەماکەشی پارادایمی عەبدوڵا ئۆجالانە، ئەگەر لەسەر بنەمای نەتەوەیەکی ئازاد یەکڕیزی دامەزرا، سەرچاوەی هەموو کێشەکان واتە دەوڵەتی نەتەوەیش چارەسەر دەبێت.