سلێمانی

 

ئەمڕۆ لە سەنتەری ئۆتیزم لە شاری سلێمانی پەرتوکی "پەروەردەکردن لە ڕێگەی چیرۆکەوە لە دایەنگە" لەلایەن پرۆژەی پەروەردەی خەونی منداڵان بە سەرپەرشتیاری وەزارەتی کار و کاروباری کۆمەڵایەتی بە ئامانجی پەروەردەکردن و دروستکردنی خەیاڵ بۆ منداڵان بڵاوکرایەوە.

 

سەرەتای چالاکییەکە بە ئامادەبوونی دیمەن حەمە عەلی، کە خاوەن بیرۆکەی پەرتوکەکە و سەرپەرشتیاری پەروەردەیی باخچەی منداڵان، نووسەرانی بواری منداڵان پەیام ئیبراهیم، ئەمین محەمەد، عەلی حەمە ڕەشید، بە خولەکێک وەستان بۆ گیانی پاکڕەوان دەستی پێکرد و چەند پارچە میوزیكێک پێشکەش بە ئامادەبووان کرا.

 

دیمەن حەمە عەلی، سەرپەرشتیاری پەروەردەیی باخچەی منداڵان و خاوەن بیرۆکەی پەرتوکەکە، وتی: تەمەنی دایەنگە کە پێنچ ساڵی یەکەمی منداڵ دەکات، تەمەنێکی زۆر هەستیارە، لەبەرئەوە دەبێت بە شێوەیەکی دروست و ڕاست پەروەردە بکرێن، بۆیە دەبێت بتوانین منداڵان لە هەموو بوارەکاندا گەشە پێبدەین، ئەو بوارانەی کە گرنگە بۆ پەروەردەکردی منداڵ، چیرۆک و یارییە، پەرتوکەکەش چەند بابەتێکی لە خۆدەگرێت لە چوارچێوەی پەروەردە کردنەوە کە منداڵان لەم تەمەنەوە پێویستی پێیەتی،  بۆ نمونە وەرزەکان، ڕەنگەکان، پاکو خاوێنی و شێوە ئەندازەییەکان.

 

لە درێژەی قسەکانیدا دیمەن حەمە عەلی ئاماژەی بەوە کرد، وەزارەتی کار و کاروباری کۆمەڵایەتی کە وەزارەتێکە و چەندین بەڕێوەبەرایەتی هەیە، لەم پڕۆژەیەدا پاڵپشت بووە.

 

پڕۆژەی خەونی منداڵان ئامانجیان لە بڵاوکردنەوەی ئەم شێوە پەرتوکە چیرۆکیانە، ئەوەیە کە، پەروەردەی منداڵان لە دایەنگەکاندا بکەن و تەنها بە گێڕانەوە و گوێگرتن نەبێت. بەڵکو هاندەرێک بێت بۆ پەروەردەی منداڵ و ناساندی "پیتەکان و ڕەنگەکان و گەشەی زمان و کەسێتی" کە دەبێت منداڵ فێر بکرێت لە سەرەتای تەمەنی دایەنگەوە.