شروق حەجلی

 

سوەیدا-لە نمایشێکی سیمبولی یەکگرتوویی کۆمەڵایەتیدا، دانیشتووانی شاری سوەیدا کۆبوونەوە بۆ داگیرساندنی مەشخەڵی نەورۆز، پابەندبوونیان بە هیوا و ژیان سەرەڕای بارودۆخە سەختەکە دووپاتکردەوە.

 

ئەم چالاکییە بەڕێوەچوو لە نێوان ئەو بارودۆخە سەختەی کە لە ناوچەکەدا زاڵ بوو، ئامادەبووان بڕیاریان دا یادی ئەو بۆنەیە و گرنگییە سیمبولیەکەی پەیوەست بە ژیان و نوێبوونەوە و ئاشتی بکەنەوە.

 

ئەم کۆبوونەوەیە کە ئێوارەی ٢٠ی ئادار بەڕێوەچوو، زیاتر بوو لە تەنها ئاهەنگێکی زوو تێپەڕ، وەک پەیامێکی ڕوونی هاودەنگی لە نێوان پێکهاتەکانی کورد و دروزدا کاری کرد، ئەوان لە مەیدانی کەرامەت کۆبوونەوە بۆ جەختکردنەوە لەسەر چارەنووسی هاوبەش و ئازارە هاوبەشەکانیان لە کاتێکدا کە ئاڵەنگاریەکانی دەستەبەرکردنی مافەکانیان لە داهاتووی سووریادا پەرەدەستێنێت، هەرچەندە ڕووداوەکە سنووردار بوو بە ڕووناککردنەوەی سیمبولی مەشخەڵەکە، بەڵام گرنگییەکەی قووڵ بوو، باوەڕێکی پتەوی بە هیوا و باوەڕێکی بە هێزی ڕووناکی بۆ ڕەواندنەوەی تاریکی دەربڕی.

 

"نەورۆز بەرجەستەی ئاشتی و هیوایە"

لە پەراوێزی چالاکییەکەدا، یەکێک لە بەشداربووان، دانا ئەحمەد وتی: نەورۆز تەنها بۆنەیەکی جەژنانە نییە بۆ ئێمە، بەڵکو یادەوەرییەکی ڕەگداکوتاوی قووڵە، پەیوەستە بە منداڵیمان و ژیانی کۆمەڵایەتیمانەوە، پێشتر لە سروشتدا لەگەڵ خێزانەکانماندا ئاهەنگمان بۆ دەگێڕا، سەرەڕای ئەو بارودۆخە سەختەی ئەمڕۆ پێیدا دەژین، بەڵام بەهۆی ئەو هیوا و ئارامییەی کە نوێنەرایەتی دەکات، ئارەزووی ئەوەمان هەیە دەستی پێ بگرین، ئێمەش سوپاس و پێزانینمان بۆ خەڵکی سوەیدا دەردەبڕین بۆ پشتگیری بێوچانیان لەم کاتانەدا.

 

وەفا ئەحمەد وتی: ئەم ڕۆژە نوێنەرایەتی سەرەتایەکی نوێی پڕ لە گەشبینی دەکات، سەرەڕای ئەو هەموو خەم و پەژارەی کە بەرگەیمان گرتووە، جا لەدەستدانی شەهیدان بێت یان ئازاری ڕفێنراوەکان، ئێمە وەک ژن، بە هەموو وردەکارییەکانیانەوە ئەو بارودۆخانەمان تێپەڕاندووە، لەگەڵ ئەوەشدا هەوڵدەدەین ببینە سەرچاوەی هێز و پاڵپشتی بۆ یەکتر، ئەو پەیوەندییەی کە ئێمە لەگەڵ برا دروزەکانمان یەکدەخات، بەهێزتر بووە لە ڕێگەی هاوبەشکردنی ئازارەکانمان و ئیرادەمان بۆ بەرخۆدان و مانەوە.

 

ڕوقیە شاعیر جەختی لە گرنگی هاودەنگیی نێوان پێکهاتە جیاوازەکانی سووریا کردەوە و وتی: ئامادەبوونی ئێمە لێرە ئەمڕۆ دەربڕینی هاوسۆزیمانە لەگەڵ برا کوردەکانمان، هەرچەندە ئەو بۆنەیە بە هۆی ماوەی ماتەمینی و پرسەی شەهیدان کورت بوو، بەڵام داگیرساندنی مەشخەڵەکە گرنگییەکی سیمبولی گەورەی هەڵگرتووە، کە دەربڕینی هیوا و ڕووبەڕووبوونەوەیە لەگەڵ تاریکی.

 

هیند حەلەبی وتی: ئامادەبوونیان لە چالاکییەکەدا لە هاودەنگی و یەکڕیزی سووریاوە سەرچاوەی گرتووە، هەروەها ئامادەبوونی ئێمە ئەمڕۆ بۆ وەستانەوە لەگەڵ خوشکە کوردەکانمانە، کە بەرگەی سەختی ئاوارەبوون و ئاڵەنگاری هاوشێوەی ئەو شتانەیان گرتووە کە بەسەرماندا هاتووە، وەک ژنان لە گەورەیی ئەم ئازارە تێدەگەین، بەو پێیەی ڕاستەوخۆ کاریگەری لەسەر ژیانی ڕۆژانەمان هەیە، بۆیە هاودەنگیمان سەرچاوەی هێزێکە بۆ ئەوەی خۆڕاگر بن هیوادارین ئەم جەژنە سەرەتای سەردەمێکی نوێ بێت کە ئەم ئازارە تێیدا کۆتایی بێت.

 

ئەم شایەتحاڵانە ڕەنگدانەوەی دەنگی ژنانە لە مەیدانی کەرامەتدا، کە خەمێکی قووڵ تێکەڵ بە ئیرادەیەکی ڕوون بوو بۆ چەسپاندنی هیوا و ژیان، لە پەیامێکدا کە وتیان ژنان توخمێکی بنەڕەتی بووە و هەرواشن لە ڕووبەڕووبوونەوەی قەیرانەکاندا.