سلێمانی

 

ئەمڕۆ، لە مۆزەخانەی ئەمنەسوورەکەی شاری سلێمانی، لەلایەن بەڕێوەبەرایەتی پەروەردەی سلێمانی و خوێندنگە بنەڕەتییەکانی سنوری پەروەردەی ڕۆژهەڵاتەوە پێشانگای ساڵانەی چالاکییە هونەرییەکانی خوێندنگا بنەڕەتییەکانی سنووری پەروەردەی ڕۆژهەڵات، بە درۆشمی ''تەنها کورد، دۆستی کوردە'' کرایەوە، کە مەبەستی پێشانگاکە نیشاندانی بەرهەم و توانا هونەریەکانی خوێندکاران و پەرەپێدانی ڕۆحی هاوبەشبوون و ناسنامەی نەتەوەیی بوو، هەروەها بۆماوەی چەند ڕۆژێک بەردەوام دەبێت.

ڕێکخەرانی پێشانگاکە وتیان: ئەم پێشانگایە دەرفەتێکی گرنگە بۆ دۆزینەوە و پەرەپێدانی تواناکانی منداڵان، چونکە هونەر ڕۆڵێکی کاریگەر دەبینێت لە دروستکردنی کەسایەتی و بەهێزکردنی متمانە بەخۆبوونی خوێندکاران، هەروەها ئەم چالاکییانە یارمەتیدەرن بۆ دروستکردنی پەیوەندییەکی باش لەنێوان خوێندنگا و مامۆستا و دایک و باوکاندا، ئەم پێشانگایە چەند ڕۆژێک بەردەوام دەبێت، چاوەڕوانیش دەکرێت گروپە جیاوازەکانی خوێندکارانی خوێندنگا بنەڕەتییەکانی سنووری دیکەی پارێزگای سلێمانی بەشداری تێدا بکەن، بۆ ئەوەی ئەم چالاکییە ببێتە بۆنەیەک بۆ پێکەوەهاتن، هاوبەشبوون و پشتیوانیکردنی هونەری منداڵان.

 

''وەک مامۆستایەکی هونەر داوا لە دایک و باوکان دەکەم کە منداڵەکانیان بهێنن بۆ ئەم پێشانگایە''

بەناز جەمال، مامۆستا لە خوێندنگەی جەمال عەبدول، وتی: بەشداریمان کردووە لە چالاکی خوێندنگەکانی سلێمانی، ئەم پێشانگایە ئیشی خوێندکارانە، واتە خوێندکاران بە هاوکاری مامۆستایان لە کاتی دەوام و وانەی خۆماندا ئیشیان کردووە، ئەم ئیشانەی کە لێرەیە چەندەها ئیشی هاوشێوە لە خوێندنگەکەمان هەمانە ، بەڵام لێرە تەنها دەتوانین ئەوەندە نمایش بکەین، ئەم پێشانگایە بە ڕاستی جێگەی خۆی کردۆتەوە  لە دڵی خوێنداکاراندا، من وەک مامۆستایەکی هونەر داوا لە دایک و باوکان دەکەم کە منداڵەکانیان بهێنن بۆ ئەم پێشانگایە، هەروەها دایک و باوکان وەک لە کۆبوونەوەکاندا گوێمان لێدەبێت زیاتر گرنگی بە وانەکانی دیکە دەدەن وەک بیرکاری، عەرەبی، ئینگلیزی،  بۆیە گرنگی بە وانەی وەرزش و هونەر نادەن، لە کاتێکدا ئەم وانانە زاخاوی مێشکە، ئەگەر خوێندکارێک مێشکێکی هونەری نەبێت ئایا دەتوانێت وانەکانی دیکە بە هونەری داڕێژێتەوە؟، بە لای منەوە وانەی هونەر وانەیەکی هزرییە بۆ خوێندکار و پێویستە هەموو دایک وباوکێک پەرەی پێبدات، چونکە وانەی هونەر و وەرزش، ڕەنگدانەوەی نەتەوەیە، واتە نەتەوەی ئێمە بەتایبەت سلێمانی ئەوا گرنگی زۆری بە هونەرداوە لە هەموو بوارە جیاوازەکانیدا و داواش دەکەم لە بواری هونەر بەرەو پیشەوە بچین و دایکان و باوکان منداڵەکانیان بهێنن بۆ ئەم پێشانگایانە.

 

''زۆر باشە کە ئەم پێشانگایانە بکرێنەوە''

نورا هەژار، خوێندکار و بەشداربووی پێشانگاکە، وتی: زۆر سوپاسی مامۆستاکانم و خوێندنگەکەم دەکەم کە بەشدارییان کردووە لەم پێشانگایەدا و  ئێمەش توانیمان بەشداری بکەین و ئیشەکانمان بخەینە ڕوو، من بە دوو وێنە و کاری زەخرەفە بەشداریم کردووە، زۆر باشە کە ئەم پێشانگایانە بکرێنەوە، چونکە دەتوانم بچم سەیری وێنەکانی دیکە بکەم و منیش لە داهاتوودا ئیشی باشتر بکەم و ئیشی هاورێکانم زۆر پێ جوانە و مامۆستاکانمان زۆر هاوکارمان بوون .

 

باڤین محەمەد، خوێندکار و بەشداربووی پێشانگاکە، وتی: هاتووم بەشداریم کردووە بەم وێنە جوانانە و لەگەڵ خوێندنگەکەم سەیری وێنەکانی دیکە دەکەم.

 

''بە هاوکاری مامۆستاکانم توانیومە چەندین وێنە بکێشم''

لاسۆ شوانە، خوێندکار و بەشداربووی پێشانگاکە، وتی:  بە هاوکاری مامۆستاکانم توانیومە چەندین وێنە بکێشم وبەشداری پێ بکەم لەم پێشانگایەدا، هەروەها خۆشحاڵم وەکو هەموو خوێندکارەکانی دیکە.

 

''پێکەوە لەگەڵ هاوڕێکانم کارەکانمان دەکرد''

سیدرا سیروان، خوێندکار و بەشداربووی پێشانگاکە، وتی: ئێمە بەشداریمان کردوە بەم وێنە جوانانە و  مامۆستاکانمان زۆر هاوکارمان بوون، هەروەها پێکەوە لەگەڵ هاوڕێکانم کارەکانمان دەکرد بۆ ئەوەی کارەکانمان جوان دەرچێت.

 

''هیوادارم خوێندکاران بەردەوام ئەم کارە جوانانە بکەن''

گوڵی لاوکۆ، خوێندکار و بەشداربووی پێشانگاکە، وتی: ئێمە چەندین وێنە و کاری زەخرەفەمان کردووە و بەشداریمان کردوە لەم پێشانگایەدا، هەروەها زۆر سوپاسی مامۆستا کانم دەکەم کە زۆر هاوکارم بوون بەتایبەت نەزیرە خان کە زۆر هاوکارم بووە، بۆیە  هەمیشە بەردەوام دەبم لەسەر ئەم کارانە و هیوادارم خوێندکاران بەردەوام ئەم کارە جوانانە بکەن.