لە دەست پێکردنییەوە بە گۆشکردنی ڕۆحێکی پیرۆز هاوەڵی دەکرێت، تا دەگاتە کۆتاییەک بە شکۆمەندی و نەمری، داستانی کۆبانێ ساتەوەختی دەرکەوتنەوەی ژنە خوداوەندەکانی مێزۆپۆتامیایە، شۆڕشێک لەسەر بنەمای كلتوری خواوەندە ژنەکان لە ڕۆژئاوای کوردستان بوو بە  مزگێنی. ئەو دەمەی هەموو جووانییەک لە ژێر هەڕەشەی لەناوچووندا بوو ، فۆڕمیلەی ئەو ئەو وتە ئەفسوناوییەی کە دەڵێت "هیوا لەسەر کەوتن گرنگترە" قارەمانێتی و جەوهەری ڕاستەقینەی بەرخۆدانی زاگرۆسی ژیاندەوە .

 

ڕۆژیی ٢٦ کانوونی دووەمیی ٢٠١٥، لە کاتژمێر٣:١٠ پاشنیوەرۆ لەپاش ١٣٤ ڕۆژ بە قوربانیدان و تێکۆشانی ڕۆڵەکانی هەرچوواربەشی کوردستان و ئەنترناسیۆنالیستەکان توانرا گەورەترین هێزی تیرۆریست و تاریک پەرست تێک بشکێنرێت، ڕاستە لە مێژوودا گەلی کورد ڕوبەڕووی  چەندین هێزی دڕەندە هاتووەو هەوڵی پاکتاوکاری و ڕەشەکوژی دراوە، بەڵام لە بەرخۆدانی  کۆبانێدا یەکگرتوویی گەلی کورد لە پاراستنی کۆبانێدا خاڵێکی بەهێزی سەرکەوتنی کورد و گۆڕینی باڵانسی هێزبوو. دەرخەری ئەو ڕاستییە بوو؛ سەرەڕای هەموو پلانگێڕییەکانی نەیاران لەبەرامبەر کورد، یەکێتی و یەکگرتووی هێزی گەل خۆی نوێ دەکاتەوەو خەباتی ڕزگاری خوازی دەگاتە ئامانج .

 

لەپاش ڕزگارکردنی کۆبانێ، ڕۆژی ١ی تشرینی یەکەم ڕۆژی کۆبانێ ڕاگەیەندرا و هەروەها ی ٢تشرینی دووەم وەک رۆژی جیهانی کۆبانێ ڕاگەیندراو پیرۆزکرا. شۆڕشی ڕۆژئاوای کوردستان بەرئەنجامی تێکۆشانی هاوبەش بوو، سەرکەوتنی کۆبانێش لەڕێگەی بەرخۆدان و یەکگرتوویی و تێکۆشانی هاوبەشی هەر چوارپارچەی کوردستان و گەلانی تر پێکهات و بینیمان کۆی ئەو هێزە هاوبەشانە پاراستنی شۆڕشی لەگەڵ خۆی هێنا.

 

سەرکەوتنی کۆبانێ ئەوەی بە جیهان وت هیچ هێزێک ناتوانێت ببێتە بەربەست  لەبەرامبەر ئیرادەی یەکگرتووی گەلان، لە بەرخۆدانی کۆبانێدا ژنان مێژوییەکی پڕ پێشەنگایەتی نوێیان نوسیەوە، ژنانی کورد بوونە پێشەنگی شۆڕش و دژی پاکتاوکردنی  توندڕەوەکان وەستانەوە، لە ڕیزی پێشەوەی شەڕدابوون و بەڕۆحی تێکۆشەری ناخیان، بەرگرییان لە کەرامەتی مرۆڤایەتی کرد،  بەڕۆحییەتێک تێدەکۆشان کە بە زەردەخەنەیەکی ئەفسوناویەوە دەیانگووت، شێر شێرە چ ژن چ مێرە.

 

ئەوەی ڕوویدا لە کۆبانێ و لە ڕۆژئاوای کوردستان شۆڕشی ژن و شۆڕشی بەئیرادە بوونی ژن بوو، ڕەتکردنەوەی خۆبەدەستەوەدان و ملکەچی بوو،  شۆڕشی  تێکشکاندنی فاشیزم و تاریک پەرستان  بوو،  تەقینەوەبوو بە هەناوی هەموو ئەو زهنییەتانەدا  کەدەیانەوێت ڕۆڵی ژن لە کۆمەڵگەکاندا بێ بەها بکەن.  شۆڕشی ژن لە ڕۆژئاوا مانا دانەوە بوو بە ئامادەبوونی ژن لە هەر کایەیەکی ژیاندا. هەرئەوەش هێزی ئەوەی دابەجیهان لە کەسایەتی ژندا دەتوانرێت جیهان لە تاریکییەوە وەربچەرخێت بۆ ڕوناکی و پشتگیری دایە ڕۆحی ئەو مرۆڤانەی کە داوای ئازادی دەکەن.

 

هەربۆیە جیهان شایەتی ئەوەی دا ئەگەر بەرخۆدانی کۆبانێ لە مێژوودا بە ناوێکی نوێ بۆ بەرخۆدان هەژمار بکرێت، ئەوا بە دڵنیاییەوە ئارین میرکان لە لاپەڕەکانی مێژوودا وەک خاڵی وەرچەرخان لەم بەرخۆدانەدا جێگەی خۆی گرتووە و ئەمڕۆش لە سەرانسەری کوردستان و جیهاندا، گەلی کورد بۆ زیندوو هێشتنەوەی ئەم مێژووی بەرخۆدانیە، منداڵەکانیان بەناوی ئارین میرکان و شەهیدانی ژن بەناو دەکەن و لە ڕۆژی ئەمڕۆماندا دەبینین کە سەدان ژن لە ناو شۆڕشی ڕۆژئاوادا بە تێکۆشان لە سەر فەلسەفەی "ژن، ژیان، ئازادی" پەرە بە شۆڕشی ژنان دەدەن.