هیچ گومانێکی تێدا نییە، کۆمەڵگەی کوردی، بە دەوڵەمەندی سرووشت و فەرهەنگ و زمان و کولتوورەکەیەوە دەناسرێتەوە، لە مێژووی کۆندا گەلی کورد یەکگرتوو بووە وەکوو کۆمەڵگە، لە دژی هەرچەشنە داگیرکارییەک هەیبەتی خۆی نیشانداوە، بە تایبەت لە دژی داگیرکارییەکانی سەدەی ناوەڕاستدا، لەو کاتەوە هەتا ڕۆژی ئەمڕۆ پیلانگێڕییەکانی سەر گەلی کورد بەردەوامی هەیە، نەتەوە فاشیست و سەردەستەکان بە هاوبەشی لەگەڵ ئەو چەتانەی کران بە نەتەوەی فاشیست و هاوردەی سەر خاکی کوردان و گەلی ئەرمەن کران، کران بە دەوڵەت و  گورگ ئاسا کەوتنە وێزەی گەل و خاک و مێژوو و فەرهەنگ و کولتووری کوردی، هێزی گەلی کوردی لە خۆبەڕێوەبەریی و سرووشت پارێزییەوە سەرچاوەی گرتووە، هۆشیاری ژنان و گەنجان گەشەی کردووە، ئەمەش بۆ فاشیست و سەردەستەکان مایەی نیگەرانییان بووە، کە گەلێکی وەها دەوڵەمەند، لە خاکێکی ڕەنگین و پڕ بەرەکەت کە سەرچاوەکەی گەنج و ژنە، وەکوو کەمی خۆیان بینیویانە، بەو هۆیەوە بە پشتیوانی وڵاتانی داڕێژەری سیستمی سەرمایەداریی، کار لە سەر پەرتکردن و زاڵبوون دەکەن بەسەر گەلی کورددا، لە بری پێکەوەژیانی دیموکراسییانە، بڕياڕی شەڕ و قڕکردنی گەلی کورد دەدەن، دەیان کۆمەڵکوژیی و داگیرکاریی لە دژی گەلی کورد ئەنجام دەدەن.

 

دەوڵەتی تورک بەوەشەوە نەوەستا، بەڵکو ئەو کوردانەی لەناو گەلی کورد بێئاگان لە پیرۆزی نیشتیمانەکەیان بە کرێیان گرتن لە دژی گەلی کورد و بەکاریان هێنان و بەردەوامیشی هەیە، هیچ ڕێگایەک نەماوە بۆ قڕکردنی گەلی کورد نەگیرابێتە بەر، بەڵام دەبینین گەلی کورد قۆناغ لە دوای قۆناغ بەرخۆدانی دەستپێکردووە، دووژمنی خوێنخۆریان بە زاڵە هێناوە، ئاستی بەرخۆدانی ژنان و گەنجان سەدان هێندە لە داگیرکاریی بەرزترە، بەڵام ئەوە بەس نییە، پێویستە تەواوی کۆمەڵگە لە چوارچێوەی پاراستنی ڕەوادا ڕێکبخرێت، ڕۆڵی ڕاستەقینەی ژنان بدرێتەوە بە دەست ژنان و بە ڕۆحیەتی گەنجبوون، داگیرکەر و نۆکەرەکانیان لە خاک وەدەر بندرێن، کۆتای بە داگیرکاریی دەوڵەت لە دژی کۆمەڵگەبوونی نەتەوەکان بهێندرێت، ئاشتیی، دیمکراسیی و ژیانی هاوبەش، ببێت بە ئاڵای مرۆڤایەتیی، ئەگەر خواست بۆ ئازادیی و ئاشتیی لەناو گەلان یەکانگیربێت، بۆ شوێنگرەوەی دەوڵەت نەتەوە، کۆمەڵگەی دیموکرات و ژینگەپارێز بە بنەما بگیرێت، زەوی لە موڵکایەتی و سنووربەندی داماڵدرێت، زەوی نیشتیمانی هەمووانبێت، هەموو کۆمەڵگە لە بەرانبەر پێکەوە بۆ پاراستنی ئازادیی دیموکراسیی دامەزراوبن، لە دژی خیانەت و نادادپەروەریی تێکۆشان پێشبخەن، زمان و فەرهەنگ و کولتوورە جیاوازەکان وەکوو دەوڵەمەندی هاوبەش ببینن، بیری ڕەگەزپەرستی بنێژن، ئیتر زەوی لەوە زیاتر بەرگەی شەڕانگێزییەکانی سیستەمی سەرمایداری و دەوڵەت نەتەوە ناگرێت کە پڕۆژەی تایبەتن بۆ بەردەوامیدان بە شەڕی گەلان و باڵاکردنی چینی دەسەڵاتداران و زیاتر چەوساندنەوەی ئەو چینەی کە بە مەبەست و بە ئامانج هەژاریان کردووە.

 

کاتێک مرۆڤ هۆشیار دەبێتەوە، هەرگیز نابێتە سووتەمەنی داگیرکاریی و خیانەت و شەڕی تایبەت، کە ڕۆژانە ئەو زلهێزانەی لە پڕۆژەی دەوڵەت نەتەوەدا سەرکێشی دەکەن، پەرەی پێ دەدەن، چونکە لەوە دەترسن ئەگەر گەلان هۆشیاربن، پڕۆژەی ئەوان شکست و کورت دەهێنێت، گەلی کورد چەوساوەترین گەلی جیهانە بە دەست سیستمی سەرمایەداری و دەوڵەت نەتەوەوە، کەواتە لێرەدا بە تەواوی دەگەینە ئەو باوەڕەی ئەو سیستەمە ڕەت بکەینەوە، کە دەیان ساڵە گەلی کوردی لە ژێر دەستاڕی خۆیدا هاڕیوە، جگە لە تاکی کوژەر و فاشیست و دژە ژینگە و دژە بە تواناکانی گەنج و ژن، هیچ خاڵێکی ئەرێنی لە مرۆڤدا بەرهەم نەهێناوە، تەنها هەژاری فکرە مرۆڤ بەرەو حەزی دەوڵەت نەتەوە ئاراستە دەکات، ئەنجامەکەشی یەکسانە بە شەڕ و ڕق.