ئاکین ستێرک

 

ماردین- منیرە ئاکسۆی و ئەنیسە ئاسنتکین بە ئیرادەیەکی بێکۆتا و پشتبەستن بەخۆبوون، بە سەرکەوتوویی کارێکی تایبەت بە خۆیان بەناوی "ماڵی دەمساڵ بۆ شیرینی" لە ناوچەشاری قازل تپەی ماردین دامەزراند، نموونەیەکی زیندوو لە خۆڕاگری لە بەرامبەر بارودۆخی سەختی ئابووریدا، پشتبەستن بە خەباتی هاوبەش و کاری ماندوو نەناسانە لە بەیانییەوە تا ئێوارە پێشکەش دەکەن.

 

ئەم پڕۆژە بچووکە ڕەنگدانەوەی چیرۆکێکی سەرکەوتنی ئیلهامبەخشە، چیرۆکێک کە منیرە ئاکسۆی و ئەنیسە ئاسنتکین بە داوای هاودەنگی ژنان و بەدەستهێنانی سەربەخۆیی دارایی، دەستیانپێ کردووە.

 

ئەم ئەزموونە بەشێکە لە خەباتێکی مێژوویی و بەردەوام بۆ ژنان، کە هەوڵەکانیان هەمیشە لە هەموو لایەنەکانی ژیانی کۆمەڵایەتیدا ئامادە بووە، هەر لە بەڕێوەبردنی ماڵەوە تا بەرهەمهێنانی کاڵا لە کێڵگە و وۆرکشۆپەکاندا، سەرەڕای هەوڵەکانی پەراوێزخستن و نەبوونی یەکسانی ئابووری، منیرە و ئەنیسە لە ڕێگەی ئەم دەستپێشخەرییەوە ئەوە نیشان دەدەن کە هەوڵدان بۆ ئازادی ئابووری بەهێزترین چەکی ژنانە بۆ بونیادنانی ژیانی خۆیان و وەستانەوە لە دژی سیستەمی پیاوسالاری باو.

منیرە ئاکسۆی و ئەنیسە ئاسنتکین هەموو قۆناغەکانی کارەکە بەڕێوەدەبەن، لە وردکردنی هەویرەکە و ئامادەکردنی شیرینیەکانەوە تا دەگاتە نانکردن و جێبەجێکردنی فەرمانەکان، بەهۆی بارگرانی ئابووری لە بەردەوامیی بەرهەمهێنان ڕێگرییان لێ نەکرد، لەژێر ئاڵای هاودەنگیدا، پێداگرن لەسەر تیشک خستنە سەر هەوڵەکانی ژنان و بەهێزکردنیان بۆ بەدەستهێنانی سەربەخۆیی دارایی بە پەیداکردنی بژێوی ژیانی خۆیان.

 

منیرە ئاکسو باس لەوە دەکات, کە لە ماوەی مانەوەی لە گوندەکەدا کاری کشتوکاڵ و کاری ماڵەوەی کردووە پێش ئەوەی ١٠ ساڵ لەمەوبەر بچێتە کۆچەر، لەوێ دوای ماوەیەک مانەوە لە ماڵەوە بۆ چاودێریکردنی منداڵەکانی بڕیاریدا کارێکی تایبەتی خۆی دەستپێبکات.

 

ڕوونیشیکردەوە، کە خۆی و هاوڕێکەی ئەنیسە ئاسنتکین ماوەی دوو ساڵە خەریکی دروستکردنی شیرینی دروستکردنن و وتی: پێشتر کاتێک لە ماڵەوە بە تەنها بووم بێزار دەبووم، بۆیە بیرم لەوە دەکردەوە کە دەتوانم چی بکەم، هەر لەو کاتەوە بیرۆکەی ئەم کارە هاتە پێش چاوم.

 

ئاماژەی بەوەشکرد، سەرەتا دوکانێکی بچووکیان لە گەڕەکەکەدا کردووەتەوە و ماوەی چوار مانگ لەوێ کاریان کردووە، بەڵام بەهۆی کەمی پێویستیەوە ڕوویان لە شوێنێکی گەورەتر کردووە، دۆخی دوکانەکەی یەکەمیان کە ئاو و کارەبای تێدا نەبوو، وتی: خەڵک دڵخۆش بوون بە کارەکانمان، بۆیە بڕیارماندا شوێنێکی کەمێک گەورەتر بەکرێ بگرین، شیرینی خواردنە نەریتییەکان کە لە ڕابردوودا بە شێوەیەکی بەرفراوان دروستبکەین، هەندێکجار ژنان سەرقاڵی کارەکانیانن، بۆیە داوا لە ئێمە دەکەن، ئێمەش بۆیان ئامادە دەکەین".

 

"بۆ ئەوەی ژنان بتوانن بژێوی ژیانی خۆیان پەیدا بکەن"

منیرە ئاکسۆی ڕوونیکردەوە، کە ڕەگ و ڕیشەی ئەو و هاوڕێکەی ئەنیسە ئاسنتکین دەگەڕێتەوە بۆ ژیانی گوندنشین و فێری دروستکردنی شیرینی بوون، هەروەها هاوڕێیەتییە درێژخایەنەکەیان ئێستا پەرەی سەندووە و بووەتە کەشی کارکردنی هاوبەش.

 

منیرە ئاکسۆی جەختی لە گرنگی ئازادی ئابووری ژنان کردەوە، سەرچاوەی پەیوەندی نێوانیان و بیرۆکەی پشت پڕۆژەکەیان بیرهێنایەوە، هاوڕێیەتییان زۆر لەمەوبەر لە ژیانی کۆچەریدا دەستی پێکردووە، مەڕیان لە نێوان گوندەکانیاندا دەلەوەڕاند، لەوێ فێری دروستکردنی شیرینی بووە، ئەم پەیوەندییە قووڵتر بووەوە دوای ئەوەی هاوڕێکەی ڕووی لە گوندەکە کرد و ساڵانێکی زۆر پێکەوە ژیاون، لە کۆتاییدا بیرۆکەی کردنەوەی دوکانی تایبەت بە خۆیانی لێکەوتەوە.

 

منیرە ئاکسۆی جەختی لە گرنگی توانای ژنان بۆ دامەزراندنی کاروباری تایبەت بە خۆیان کردەوە و وتی: کارکردنی ژنان سەردەمانێک قەدەغە بوو، ئێمە دەمانەوێت ژنان کاری خۆیان دابمەزرێنن و بژێوی ژیانی خۆیان پەیدا بکەن، هەر بۆیەش ئەم شوێنەمان کردەوە، لە ڕابردوودا کاری ژنان بە شەرمەزاری دادەنرا، ڕێگەمان پێنەدەدرا کار بکەین، ئێستا دۆخەکە جیاوازە، هەموو ژنێک توانای بەڕێوەبردنی خۆی هەیە.

 

"قەیرانی ئابووری پشتی ئێمەی شکاندووە"

سەبارەت بە بارودۆخی کارکردنی ڕۆژانەیان، منیرە ئاکسوی ڕایگەیاند، ئامادەکردنی شیرینی کارێکی قورسە، بەڵام بەرگەی سەختییەکان دەگرن، چونکە ئەوان ئەو کارەیان خۆشدەوێت کە دەیکەن، وتی: دووبارەکردنەوەی هەویرەکە بە بەردەوامی و نانکردن و ئامادەکردنی پێکهاتەکانی ماندووکەرە، بەڵام ئێمە کارەکانمان خۆشدەوێت، کاتێک هەبووە لە گەرمای هاویندا تا ئێوارە کارمان کردووە، ئەم کارە ئاڵەنگاری خۆی هەیە، بەڵام کاتێک ئەو کارەت خۆشدەوێت کە دەیکەیت، چیتر ئەو سەختییانە نابینیت.

 

ئاماژەی بەوەشکرد، قەیرانی ئابووری و بەرزبوونەوەی نرخەکان بووەتە هۆی سەختییەکی زۆر لە دەستەبەرکردنی پێداویستییە سەرەتاییەکان و داپۆشینی کرێ و خەرجکردنی خوێندنی منداڵەکانیان، بەرزبوونەوەی بەرچاوی نرخی کەلوپەلی سەرەکی وەک ڕۆن و گۆشت و ئارد جگە لە تێچووی کارەبا و کرێی دوکانەکان، وایکردووە کە کڕینی ئاسایی و بەڕێوەبردنی شتەکان ئەستەم بێت تەنها بە سەختییەکی زۆر نەبێت.

ئەنیسە ئاسنتکین جەختی لەوە کردەوە، کە بارودۆخی کارکردن و سەختی ئابووری دەیانخاتە ژێر فشارەوە، وتی: ئەم شوێنەم بە هاوبەشی لەگەڵ هاوڕێکەم کردەوە، بە جۆرێک یان جۆرێکی تر. هەردووکمان ئەم کارەمان خۆشدەوێت، هەرچەندە قورس و ماندووکەر بێت.

 

ڕوونیشیکردەوە، ماڵ و دوکانەکەیان خاوەندارێتی ئەوان نییە بەڵکو بە کرێیە، ئەمەش باری ڕۆژانەیان دوو هێندە زیاد دەکات، ئاماژەی بە توندی بارودۆخەکانیان کرد و وتی: ژیان ئاسان نییە، ئێمەش ماوەیەکی زۆر خەبات دەکەین بۆ ئەوەی بژێوی ژیانمان دابین بکەین، تێچووی کرێکان بارگرانییەکی قورسە کە قورساییمان لەسەر دروست دەکات.

 

سەرەڕای ئەم ئاڵەنگاریانە، جەختی لەوە کردەوە، کە دروستکردنی شیرینی زیاترە لە تەنها ئامرازێک بۆ بەدەستهێنانی بژێوی ژیان، نوێنەرایەتی میراسێکی خێزانییە کە بە نەوەکاندا دەگوازرێتەوە، جەختی لە گرنگی پێزانینی خەباتی ژنان کردەوە، وتی: ئێمە ئەم پڕۆژەیە بە سۆزێکی زۆرەوە بەڕێوە دەبەین دوای ئەوەی بوو بە نەریتێکی خێزانی، ئێمە لێرەوە دەستمان پێکرد دوای ئەوەی شوێنی کارەکەی پێشوومان داخرا، تەنها هیوامان ئەوەیە هەوڵەکانی ژنان ئەو دانپێدانانە بەدەستبهێنن کە شایەنیەتی، هەروەها ژنان لە هەموو بارودۆخێکدا بتوانن بتوانن سەربەخۆیی خۆیان بەدەستبهێنن.