بێریڤان کەمال

 

سلێمانی- گەلەری ئێستا پێشانگایەکی هونەری هاوبەشی ٥٢ هونەرمەند، کارە هونەرییەکان بابەت و گوزارشتی هونەرمەندانە لە سەردەمی ئێستادا، پێشانگاکە لە کارگەری کولتووری شاری سلێمانی بەرواری ١٧ ئەیلول کرایەوە و تا ١٧ کانوونی یەکەم بەردەوام دەبێت.

 

گەلەری ئێستا خۆی لە چوارچێوەی نمایشێکی هاوبەشدا دەبینێتەوە، ٥٢ هونەرمەند لە سەرجەم پارچەکانی کوردستان و وڵاتانی دەرەوە بەشدارییان تیایدا کردووە، زیاتر لە ٢٤٠ شاکار و بەرهەمی هونەریی تیایدا نمایشکراوە، ئەم پڕۆژە هونەرییە تیشکی خستووەتەسەر "بابەت و گوزارشت"ی هونەرمەندان لەناو کارە هونەرییەکان لە سەردەمی ئێستا و چەندین ئامانجی لە خۆگرتووە.

 

هونەرمەندانی بەشداربووی پێشانگاکە چەندین بابەتی جۆراوجۆریان بە بابەتە هونەرییەکان گوزارشت لێکردووە، بابەتەکان لە کرۆک و قوڵایی کۆمەڵگەوە سەرچاوەیان گرتووە و جێگەی گرنگی پێدان و باسکردنن، بریتین لەو پرسە کاریگەرانەی کە لە ژیانی ڕۆژانەی خەڵکیدا دێتە پێشەوە وەک پرسەکانی "سیاسی، شەڕ و جەنگ، شوناس، جێندەر. ژینگە بیرەوەری و خاک، ئێستێتیکا و فۆڕمی هونەریی"، بەشێکی دیکەی هونەرمەندەکانیش وەک ناوەڕۆک تیشکیان خستووەتەسەر ئەو بابەتانەی لە دنیای هونەر بابەتی جیهانین.

 

بەشێک لە کارە هونەرییەکانی ناو پێشانگاکە

* "ڕۆژانەی منداڵێکی نەناسراو"، کارەکە دەربارەی دواڕۆژی کۆرپەیەکی تازە لەدایکبووە، ئەو ساتەی یەکەم هەناسەی هەڵدەکێشێت و چاوی دەکاتەوە، لە ڕوانگەی لەشە بچکۆلانەکەیەوە یەکەم نیگای بە ژیاندا دەگێڕێت، پەیکەری ئەم کۆرپەیە گوزارشتە لە گوزەرکردن بە ناو کات و شوێن، لە ڕێگەی تۆمارەکان و ڕۆژانە هێشتا نە نوسراوەکەیەوە و لە ڕێگەی ئەو شوێنانەی پەیکەری ئەو کۆرپەیە دادەمەزرێت، دیدێک بۆ دواڕۆژ و ناسنامەیەک بۆخۆی پێشکەشی بینەرانی دەکات.

 

 

*زۆربەی لێکۆڵینەوەکانی بواری ژینگە و ژینگەناسان پێشبینی داهاتوویەکی باش ناکەن بۆ ژیان لەسەر زەوی، بەهۆی خراپی مامەڵەکردنی مرۆڤەکان لەگەڵ ژینگەکەیاندا بەتایبەت لە سەدەی  ٢١دا، پێشکەوتنەکانی پیشەسازی لە زۆر ڕووەوە کاریگەری پێچەوانەی لەسەر ژیان لەم هەسارەیە هەیە، بەجۆرێک ئێمەی مرۆڤی ئەم سەردەمە دەکەوێتە ژێر پرسیاری نەوەکانی داهاتوو کە ئاخۆ ژینگە و ژیانمان بە چ ئاڕاستەیەک بردووە؟ لە پاش خۆمان چیمان بەجێهێشتووە؟ چۆن سروشت و ژیانە جۆراوجۆرەکانمان لەناوبردووە؟

 

 

*ئەمرۆ لە ژێر سایەی لیبرالیزمی نوێدا مرۆڤایەتی بە گشتی دووچاری سەختی دابینکردنی ژیان دەبێتەوە بە جیاوازی کۆمەڵگەکان، نەتەوەکان، ئاینەکان، دەسەڵات نایەوێت تەنانەت سادەترین پێداویستی بۆ ژیانی خەڵکەکان دەستەبەر بکات، گەرچی لە تواناشیدایە، ناچار مرۆڤەکان لە ململانێیەکی سەختدان بۆ دابینکردنی بژێوی ژیانیان، لە ژێر دەسەڵاتی بە ناوی دیموکراسی، خواست و ویستزەوت دەکرێت، هەموو پەرچەکردارێک لەلایەن سیستمی سەرکوتکەری هاوچەرخ بە توندی وەڵامدەدرێتەوە و ڕێگاکان دادەخرێت.

 

 

* ٤٦ لەچکی گرێدراوی ڕەنگاو ڕەنگ، هەروەها فۆتۆیەکی پۆرترەیت، لە ڕێگەی زمانێکی لێکدژەوە هونەرمەند هەوڵیداوە بچێتە ناوپرسی هاوسەنگیبوون و ئازار، ئاڵۆزی و ئازادی، دووبارە گرێدانەوەی فۆرمی لەچکەکە لە فۆرمێکی کراوەییەوە بۆ ئەوپەڕی بچووکبوونەوەی شێوەی خۆی، ڕەنگە مێتافۆریک بێت بۆ ئەو هەموو چوونە ناوخۆ و ئاڵۆزییەی کە ئایدێنتیتی کەسەکان دەشارێتەوە، لەلایەکی دیکەوە بەرفراوانیی چۆنێتی لە ڕێگەی ئەو لەچکە ڕەنگاوڕەنگانەوە پیشان دەدات، لە پاڵ ئەمەشدا فۆتۆی پێچراوی دەموچاوی ژنێک کە ملی دانەپۆشراوە، لەوانەیە دەمامکی مرۆڤی مۆدێرنمان پیشانبدات بە تایبەتی ژن.

 

 

* هەمیشە کەرەستەی بەکارهاتووی ڕۆژانەی بەردەوام، کە مێژوویەکی لە بەکارهێنان هەیە دەبنە پانتاییەکی نوێ بۆ کارکردنی هونەرمەند، ئەو کەرەستانەش لە خودی خۆیاندا شێوە و مانا و ئامانجی بەکارهێنانی تایبەتیان هەیە، بە تێکەڵکردنیان لەگەڵ ئەو بیرۆکەیەی کە دەمەوێت لەسەریان بەرجەستە بکرێت و کە پاشان دەبنە کارێکی هونەریی.