ناوەندی هەواڵ

 

فیلمی دیکۆمێنتاریی ”چاوی چاودێر’” لە ١٤ەمین فێستیڤاڵی نێودەوڵەتی مەکسیک خەڵاتێکی بەدەستهێنا، فیلمە دیکۆمێنتارییەکە باس لە ژیانی ژنێک دەکات کە لە خۆپیشاندانەکانی شۆڕشی ”ژن، ژیان، ئازادی”دا بووە بە نابینا.

 

خەڵات بۆ فیلمی دیکۆمێنتاریی ”چاوی چاودێر”

بەپێی ڕاگەیاندنی ١٤ەمین فێستیڤاڵی نێودەوڵەتی ”دژی بێدەنگی، هەموو دەنگەکان” لە مەکسیک، فیلمی دیکۆمێنتاریی ”چاوی چاودێر” خەڵاتێکی بەدەستهێنا، بەپێی ڕاگەیاندراوەکە، فێستیڤاڵەکە ئەم فیلمە دیکۆمێنتارییەی وەک فیلمێکی درێژ لە بەشی ”سنوورەکان، کۆچ و پەنابەری” هەڵبژاردووە، سیناریۆی فیلمەکە لەلایەن عەباس خەزالی لە ئیسپانیا نووسراوە و لەلایەن کۆمپانیای ”ESCAC Films” ”فیلمەکانی ئێسکاک” وێنەگیراوە، فیلمە دیکۆمێنتارییەکە ٢٨ خولەکە و بە زمانەکانی فارسی و ئیسپانییە.

 

چیرۆکی کەوسەر ئیفتخاری، شانۆنامەنووس

لە سەردەمی شۆڕشەکانی شۆڕشی ”ژن، ژیان، ئازادی”دا، کەوسەر ئیفتخاری، شانۆنامەنووس لەلایەن هێزەکانی ڕژێمی ئێرانەوە تەقە لە چاوی کرا و لە ئەنجامدا چاوێکی لەدەستدا، فیلمە دیکۆمێنتارییەکە تیشک دەخاتە سەر ژیانی کەوسەر ئیفتخاری دوای ئەم ڕووداوە، پرسیاری ئەوە دەکات کە ئایا بڕیار دەدات چاوێکی چێنراو بەکاربهێنێت بۆ جێگرتنەوەی ئەو چاوەی کە لەدەستیداوە بۆ ئەوەی سیمای پێشووی خۆی بەدەستبهێنێتەوە یان بەردەوام دەبێت لە ژیان لەگەڵ ئەو شوێنەوارەی کە بووەتە بەشێک لە ناسنامەکەی وەک ناڕازییەک.

 

ڕووخساری بەرخۆدان

دوای برینداربوونی کەوسەر ئیفتخاری بووەتە یەکێک لە دەموچاوە ناسراوەکانی ئەو کەسانەی کە لەکاتی ناڕەزایەتییەکاندا زیانیان پێگەیشتووە.