HÊLÎN EHMED

Silêmanî – Di demeke ku Başûrê Kurdistanê bi guhertinên bilez ên siyasî û civakî re rû bi rû ye de, hesta neteweyî di nav ciwanan de hê jî yek ji mijarên herî berbiçav ên jiyana rojane li kolanan, zanîngehan û torên civakî ye. Ciwan bawer dikin ku parastina nasnameya neteweyî erka sereke ye. Di cejnên netewî de, ala Kurdistanê di destên ciwanan de bi awayekî berbiçav tê dîtin û li cihên giştî stranên netewî tên gotin. Ev wêne nîşan didin ku hesta aîdiyeta bi ax û netewê re hê jî di dilê nifşê nû de dimîne. Ger ev pirsgirêk neyên çareserkirin, ew dikarin bandorê li hestên neteweyî bikin. Tevnên civakî bûne qadeke nû ji bo nîşandana nasnameya Kurdî, ciwan naverokê bi Kurdî diweşînin, wêne û stranên neteweyî parve dikin û hewl didin dîrok û çanda Kurdî biparêzin, lê ev hest divê di nav van tevnan de raneweste, divê ji bo kar û xizmeta civakê bê veguheztin.

Pêşerojek bê hesta netewî, yekîtî û hevgirtinê xurt nabe

Pisporên perwerdê bawer dikin ku dibistan û zanîngeh dikarin roleke girîng di xurtkirina hestên neteweyî de bilîzin, nemaze bi rêya danasîna dîroka Kurd û nirxên neteweyî yên hevpar. Tevî van hemû guhertinan, gelek ciwanên Kurd hê jî bawer dikin ku parastina ax û nasnameya Kurdî ne tenê bi gotinan e. Kurd hewl didin cihê xwe di pêşeroja Kurdistanê de bibînin; Pêşerojek ku gelek kes bawer dikin bêyî hesta neteweyî, yekîtî û hevgirtinê nikare xurt bibe.
Derbarê vê mijarê de hunermend Varona Zerdeşt ji ajansa me re behsa rola ciwanan a di avakirina civakê de kir.

‘Bi zanebûn ciwan ji îrade û hesta neteweyî bêpar tên hiştin’

Hunermend Varona Zerdeşt di despêka nirxandina xwe de diyar kir ku hebûna ciwanên azad dikare civakek azad diafirîne û wiha pê de çû: “ Bi derketina holê ya ramanên azad ên ciwanan, netewe û gel dê azad bibin. Ciwan dê bi hev re ji bo azadiyê têbikoşin. Ew bê îrade tên hiştin. Ev armanca sereke ya rayedarên herêma me ye, da ku ew bi rêya bêîradeya ciwanan bighîjin armancên xwe yên siyasî û axa Kurdan bifroşin dagirkeran da ku destkeftiyên xwe yên madî bi dest bixin. Ji bo ku ciwanan ji ax û pêşeroja xwe dûr bixin, ji bo ku neghîjin armancên xwe û bi hewildanên xwe pêdiviyên welatê xwe têr nekin, pirsgirêkên sîstematîk ji wan re têne afirandin.”

‘Beşdariya ciwanan a li seferberiya Rojava destkeftiyek girîng a gelê Kurd bû

Varona Zerdeşt bal kişand ser rola ciwanan a di şoreşan de û ev tişt li nirxandinên xwe zêde kirin: “Hebûna şoreşên gelê Kurd ên li pey hev, di nav de Şoreşa Rojava û rêwîtiya ber bi Rojavayê Kurdistanê destkeftiyek girîng a gelê Kurd bû. Piştre, ciwan û welatî her roj li hemû deverên Kurdistanê daketin kolanan. Li Başûrê Kurdistanê, ciwanan piştgiriya xwe ji nû ve piştrast kirin, ev yek dagirkeran ji ber vê helwesta Kurdan xemgîn kir.”

‘Perwerdekirina ciwanan li ser ramana Abdullah Ocalan destkeftiyek e’

Varona Zerdeşt tekez kir ku azadiya civakê bi azadiya jinan ve girêdayî ye û nirxandinên xwe  wiha bidawî kir: “Her gava ku ciwan û jin di civakekê de bi azadî ji bo mafên xwe têdikoşin, welat û herêm di lûtkeya serkeftin û têkoşînê de dijîn. Ji ber vê yekê, rayedar hewl didin ku bi awayekî sîstematîk hişê ciwanan ber bi bêhêvîtî û koçberiyê û li dijî maf û nasnameya Kurd ve bizivirînin. Perwerdekirina ciwanan li ser ramana Rêberê Gelê Kurd Abdullah Ocalan destkeftiyek e. Ev ji bo ciwan û gelê Kurd li herêmê girîng e."