Navenda Nûçeyan – Komek ji jinên Efganî, çalakvanên mafên mirovan û rojnamevanên ku li Îranê dijîn bi dîmenek ku metrisiya rewşa xwe tînin ziman û daxwaza piştgiriya lezgîn ji rêxistinên navneteweyî dikin, parve kirin.

Jinan ragihand ku piştî Talîban li Efganistanê hat ser desthilatdariyê, neçar mane welat biterikînin û li Îranê li stargehên penaberiyê bigerin.

Jin li Îranê bi pirsgirêkên bêewlehiyê rû bi rû ne

Li gorî wan, şert û mercên jiyana vê koma penaberan li Îranê bi pirsgirêkên cidî û bêewlehiyê re rû bi rû ne. Wan tekez kir ku tevî lawaziya pê re rû bi rû dimînin jî piştgiriyek baş nagirin û rewşa wan xirabtir dibe.

‘Bêdengiya saziyên navneteweyî cihê gumanê ye’

Jinan her wiha rexne li Komîseriya Bilind a Penaberan a Neteweyên Yekbûyî li Tehranê kirin û gotin: “Bêxemiya li hemberî rewşa jinan cihê metrisiyê ye. Bêdengiya saziyên navneteweyî li hemberî rewşa jinên Efgan cihê gumanê ye û pêdivî bi hesabpirsîna yekser heye.”