Navenda Nûçeyan – Endamên Şanda Îmraliyê yên Partiya Wekhevî û Demokrasiyê ya Gelan (DEM) Pervîn Buldan, Ozgur Faîk Erol û Mîthat Sancar, derbarê hevdîtina xwe ya duh bi Rêberê Gelê Kurd Abdullah Ocalan re daxuyaniyek nivîskî weşandin.

Di daxuyaniyê de, derbarê hevdîtina 5 demjimêran de, hate destnîşankirin ku li ser pêşketinên siyasî, pêvajoyê, avakirina civakek demokratîk û çawaniya şekildana çarçoveya qanûnî nîqaş hatine kirin. Di daxuyaniyê de wiha hat gotin: 

"Wekî Şandeya Îmraliyê ya Partiya DEM, piştî navbereke dirêj me bi Birêz Abdullah Ocalan re hevdîtineke berfireh li dar xist. Di hevdîtinê de, me bi berfirehî li ser pêşketinên siyasî yên li herêmê, avakirina civakeke demokratîk, pêşketinên di pêvajoya aştiyê de û çawaniya şekildana çarçoveya qanûnî nîqaş kir."

‘Tifaqa Kurd û Tirkan rastiyeke dîrokî ye’

Daxuyaniya Rêberê Gelê Kurd Abdullah Ocalan ya ku bi raya giştî re were parvekirin wiha ye:

"Em hîn jî pabend in ku li gorî rihê banga 27’ê Sibatê gavan bavêjin û pirsgirêkê di çarçoveya biratiyê de çareser bikin. Em li ber wê yekê ne ku tifaq û yekîtîya dîrokî ya di navbera Kurd û Tirkan de, rastiyek dîrokî ya li Anatoliyê ku di hemû qonaxên krîtîk de ji hev nayê veqetandin, veguherînin çarçoveyek qanûnî. Rastiya ku 'heke hûn Kurdek ji Tirkek veqetînin, Kurd namîne; heke hûn Tirkek ji Kurdek veqetînin, Tirk namînin' pêşxistina jiyaneke hevpar û wekheviyek li ser bingeha hiqûqê ferz dike."

‘Fersendeke dîrokî ji bo çareseriyê’

Dem hatiye ku çarçoveyek yasayî were avakirin ku rêzê li hesasiyetên hevbeş bigre. Bi zanîna ku rêkirina vê rêyê bi sebir fersendek dîrokî ye, werin em dev ji nêzîkatiyên sade, teng û pêşerojê berdin û bi hev re ji bo avakirina jiyaneke hevpar bixebitin. Divê her kes ji bo destpêkirina pêvajoya yasayî, wekî ku di rapora ku ji hêla Komîsyona Hevgirtina Neteweyî, Biratî û Demokrasiyê ya Meclîsa Mezin a Neteweyî ya Tirkiyeyê ve hatî amadekirin de hatî destnîşankirin, çêtirîn hewl bide da ku pevçûn û çekan bi tevahî ji holê rake û serdemek nû veke.

Tifaqa Kurd-Tirk kevirê bingehîn ê paşeroja hevpar a Anatoliyê ye. Divê her gavek ku em diavêjin li ser bingeha çanda van axan be. Bi rêya rêziknameyên qanûnî, mimkun e ku ev tifaq bi garantiyên qanûnî yên mayînde were mîsogerkirin û di komara demokratîk de bi wekhevî û azadî bi hev re bijîn. Divê qanûna neyînî veguhere qanûna erênî.

Dîrok derfetek pêşkêşî me dike ku em jiyaneke hevbeş ava bikin, rûpeleke nû di wekhevî û edaletê de vekin. Ez bi tevahî bawer im ku em ê vê derfetê bi hev re bikar bînin.”

Şandeya Îmraliyê: Em biryardar in

Wekî şandeyê em banga girîng a Birêz Ocalan wekî dîrokî dibînin û em careke din biryardariya xwe ya ji bo berdewamiya diyaloga avaker bi hemî saziyên têkildar re, nemaze Meclîsa Mezin a Neteweyî ya Tirkiyeyê re, ji bo pêşvebirina pêvajoyê bi awayekî encam-navendî, û ji bo gihîştina çareseriyek mayînde li ser bingeha prensîbên biratiyê tekez dikin.

Şandeya Îmraliyê ya Partiya DEM’ê

21’ê Tîrmeha 2026’a