Navenda Nûçeyan – Însiyatîfa jinan a “Pêwîstiya Min bi Aştiyê Heye” banga lezkirina hewldanên ji bo pêkanîna aştiyê li Tirkiye û Bakurê Kurdistanê kir. Însiyetîfê  tekez kir ku çareserkirina doza Kurd êdî nayê paşxistin û divê di her pêvajoya siyasî de daxwazên jinan esas werin girtin.

‘Di şeran de jin aliyê sereke ne’

Endama însiyatîfê Roza Kahya, diyar kir ku jin di şer de aliyê sereke ne, hem ji aliyê rûbirûbûna wan a rasterast bi tundî û binpêkirinan di salên şer de, hem jî ji aliyê rola wan a di parastina tevna civakî de.
Roza Kahya diyar kir ku paşguhkirina binpêkirinên li dijî jinan dê birînên şer vekirî bihêle, xwest rastî were eşkerekirin û kesên ji ber kiryarên xwe yên sûc berpirsiyar in hesab bidin.

Roza Kahya destnîşan kir ku însiyatîfa “Em di Aştiyê de îsrar dikin” berê jî rêzek pêşniyar pêşkêşî komîteya parlamentoyê ku ji bo lêkolînkirina pirsgirêka Kurd hatiye erkdarkirin kiribû wiha got: “Lê ev pêşniyar, nemaze yên têkildarî sûcên li dijî jin û zarokan, bi tevahî di raporên fermî de nehatine bicihkirin. Ji ber ku em van pêşniyaran wekî delîlên marjînalîzekirina berdewam a dengê jinan di pêvajoya siyasî de dihesibînin.”

‘Xurtkirina maf û azadiyê û avakirina pêşeroja welat’

Di dawiyê de, Roza Kahya tekez kir ku her pêvajoya aştiyê ya rastîn divê bi reformên demokratîk ên berfireh rast were pêkanîn û wiha domand: “Di nav de xurtkirina maf û azadiyê û misogerkirina beşdariya hemî aliyan di teşedayîna pêşeroja welat jî heye. Her wiha pêwîst e jin bibin beşek girîng a riya “Aştî û Civaka Demokratîk” da ku domdarî û bandorkeriya jinan were misogerkirin.”

Însiyatîfa jinan a Tirkiyeyê ye

Înîsiyatîfa “Pêwîstiya Min bi Aştiyê heye” tevger û kombûnek jinan a li Tirkiyeyê hatiye damezrandin e. Ji hevpeymaniya jinên Kurd û çalakvanên mafên mirovan pêk tê. Armanca wê yekbûna têkoşîna jinan, daxwaza aştiya civakî, şermezarkirina şer û tundiyê ye her wiha hewl dide çareseriyek aştiyane ji bo vê pirsgirêkan bibîne.