زەینەب عیسا 

 

دێرک-ژنانی کۆچبەری سەرێکانی و عەفرین کە دوای هێرشە داگیرکارییەکانی دەوڵەتی تورک لە کامپی نەورۆز نیشتەجێ بوون، گەشتێکی ڕۆژانەی بەرخۆدان و ئیرادەیان لە دڵیاندایە، سەرەڕای هەلومەرجی سەخت و کەمی سەرچاوەکان، کاری گرنگ لە لایەن ڕێکخراوی سارا ئەنجام دەدرێت. ڕێکخراوی سارا لە هەوڵی بەهێزکردن و ڕێکخستنی ژنانی کۆچبەر لە کامپەکەدایە. لە ڕێگەی بەرنامەکانی هۆشیاری و دانیشتنی پاڵپشتی دەروونی و چالاکییەکانی گروپەوە، ئامانجی دروستکردنی ژینگەیەکی پارێزراوە کە ژنان بتوانن خۆیان تێیدا دەرببڕن و هەست بە ئارامی و هێز بکەن، ڕێکخراوی سارا پێشەنگایەتی ڕێکخستنی ژنان لە کامپی نەورۆز دەکات و کاری مرۆیی دەگۆڕێت بۆ هەنگاوێکی بەرجەستە بەرەو گەڕاندنەوەی ژیان و کەرامەت، فاتما شێخی، بەڕێوەبەری ڕێکخراوی سارا لە کامپی نەورۆز، سەبارەت بە کار و هەوڵەکانی ڕێکخراوی سارا لە کامپەکە بۆ ئاژانسەکەمان قسەی کرد.

 

"بەهێزکردنی ژنان و داننان بە مافەکانی ژنان"

فاتما شێخی ڕایگەیاند کە ڕێکخراوی سارا لە ساڵی ٢٠٢٢ بە فەرمی لە کامپی نەورۆز کرایەوە و لە ڕێگەی سیمینارو پەروەردە و پانێڵەوە هەوڵی بەهێزکردن و ڕێکخستنی ژنان لە ناو کامپەکەد دەدەن وتی: ئامانجمان بەهێزکردنی ژنان و دانپێدانانە بە مافەکانی ژنان و خەباتیان لە دژی توندوتیژی دژی ژنان، ئێمە لە هەموو کاتێکدا دەچینە کامپی کۆچبەران و لە کامپەکاندا سیمینار ئەنجام دەدەین، هەروەها بە مەبەستی ڕەخساندنی هەلی کار بۆ ژنان، لەم دواییانەدا خولی پەروەردەی دروومانمان بۆ ژنان کردەوە، ژمارەیەکی زۆر باش لە ژنان بەشداری ئەو پەروەردەیان کرد و فێری چنین بوون.

 

هەروەها سیمینار بۆ پیاوان بەڕێوەدەچێت

فاتما شێخی ڕایگەیاند کە ڕێکخراوی سارا ڕۆڵێکی زۆر گرنگ دەگێڕێت لە کامپی نەورۆزدا و زۆربەی ژنان سوودمەند بوون لەو سیمینارو پەروەردانەی کە پێشکەش دەکرێن و وتی: ڕێکخراوی سارا ڕۆڵێکی زۆر گرنگی هەیە، ئێمە سیمینارو پەروەردەی هۆشیاری لەسەر بەهێزکردنی ژنان و خۆدەربڕین ڕێکدەخەین، هەندێک جار سیمینار بە پیاوانیش دەدەین، کە تێیدا دەمانەوێت بیرکردنەوەی پیاوسالاری بگۆڕین.

 

"ژن بوونەتە خاوەن بڕیار"

فاتما شێخی ئاماژەی بەوەدا کە ئەوان بە پەیوەندیکردن بە کۆمۆنەکان و ئەنجومەنەکانەوە بارودۆخی تایبەت چارەسەر دەکەن و لە درێژەی قسەکانیدا وتی: زۆرجار گوێبیستی بارودۆخی تایبەت دەبین کە پەیوەندی بە کۆمۆنەکان و ئەنجومەنەکانەوە دەکەین بۆ ئەوەی لەناو کامپەکەدا چارەسەری بکەین، بۆ ئەوەی بتوانین ئەو بارودۆخانە پێکەوە چارەسەر بکەین، بنەڕەتیترین بارودۆخەکان کە ئێمە سەرنجی دەخەینەسەر لەناو کامپەکەدا بریتین لە حاڵەتەکانی دەستدرێژی و چەواشەکاریی دیجیتاڵی و توندوتیژی و هاوسەرگیری منداڵان، ئەنجامێکی زۆر باش بیندراوە بە دابینکردنی سیمینارو پەروەردە، بوونەتە خاوەن ئیرادە، چونکە سەرەتا ژنێک لەناو کەمپەکەدا نەیتوانیوە خۆی دەرببڕێت.

 

" پڕۆژە بۆ ژنان دروست دەکەین"

فاتما شێخی باسی لەوەشکرد، کە ئەوانیش لەناو کامپەکەدا هەلی کار بۆ ژنان دەڕەخسێنن، هەروەها لە داهاتوودا پڕۆژەی گەورە بۆ ژنان دروست دەکەن، و لە کۆتایی قسەکانیدا وتی: ئێمە دەستمان کردووە بە خولی پەروەردەی چنین بۆ ژنان، زۆرینەی ئەو ژنانە سوودیان لێ وەرگرتووە، هەموو ژنێک لە چادرەکەی خۆیدا دورین دەکات، نزیکەی ٦٠ ژن پەروەردەی دورینیان وەرگرتووە و فێربوون، و لە ئێستادا خەریکی ئامادەکردنی خولێکی تری پەروەردەین و ناوەندەکەمان فراوان بکەین بۆ ئەوەی ژمارەیەکی باش لە ژنان بێنە سەنتەرەکە و پڕۆژە بۆ ژنان دروست بکەن و هەلی کاریان بۆ دروست بکەن.