سلێمانی

 

لە کۆتا ڕۆژی هەڵمەتی ١٦ ڕۆژەی جیهانی بەرەنگاربوونەوەی توندوتیژی دژی ژنان، دواینیوەڕۆی ئەمڕۆ ١٠ی کانوونی یەکەم، بە دەستپێشخەری ڕێکخروای خەڵک بۆ گەشەپێدان و هاوکاری ئەنجومەنی باڵای خانمان و گەشەپێدان، شانۆی "دورینەوەی ئازار" لە ڕۆژی دووەمی نماشکردنیدا لە ناو سەرای شاری سلێمانی نمایش کرا.

 

ئەم شانۆیە کە دوێنەش لە شاری هەڵەبجە نمایشکرا، لە نووسین و دەرهێنانی ڕۆژە حەسەن و کاروان سۆفییە؛ کە باس لەو توندوتیژییانە دەکات کە ژنێکی کورد لە ناو کۆمەڵگەدا ڕووبەڕووی دەبێتەوە.

 

ڕۆژە حەسەن، یەکێک لە دەرهێنەرەکانی شانۆکە، باسی لە ناوەڕۆکی شانۆکە کردو وتی: ئەم شانۆیە جەختکردنەوەیەک بوو لە سەر ئازاری ژنانی کورد لە ناو کۆمەڵگەدا و ئێمە بە شێوازێکی سیمبۆلیک لە سەری کارمان کردووە، پێمان خۆش بوو شانۆکە لە دوو ڕۆژی جیاوازدا و لە ناو هەڵمەتی ١٦ڕۆژی بەرەنگاربووونەوەی توندوتیژی دژی ژنان نمایش بکرێت.

 

هەروەرها لە کۆتایی قسەکانیدا ئاماژەی بە گرنگی شانۆ وەک ئامڕازێک بۆ نزیکبوونەوە و دەڕبڕینی هاوسۆزی بۆ خەڵک کرد و وتی: لە ڕێگای شانۆوە دەتوانین کاریگەرتر پەیامەکانمان بگەینین.