Navenda Nûçeyan- Rêxistina Mafên Mirovan a Îranê di çarçoveya pêngava 16 rojan a têkoşîna li dijî tundiya li ser jinan de raporek belav kir.

Girtiyên siyasî ji xizmetên sereke bêpar tên hiştin

Li gorî raporê, ji destpêka salê ve 44 jin li Rojhilatê Kurdistan û Îranê hatine darvekirin. Her wiha hat diyarkirin ku girtiyên siyasî yên jin di şert û mercên gelek zehmet de tên girtin û gelek caran rastî zextên derûnî û gefan tên. Her wiha hat gotin ku girtiyên jin ên siyasî di saloneke qerebalix de tên girtin, ji xizmetên sereke bêpar tên hiştin û ev jî bandoreke neyînî li ser tendirustiya wan dike.

Di raporê de hat gotin ku di 40 salên borî de li Rojhilatê Kurdistan û Îranê jin her dem li dijî cudakarî û astengiyan rabûne û nîşan dane ku ew ji bo bidestxistina mafên xwe bihêz û îsrar in. Her wiha hat gotin ku jinan îspat kirine ku dikarin civakek dadwer û bê tundî ava bikin.

Di dawiya raporê de jî hat gotin ku ji ber rewşa heyî pêwist e civaka navdewletî û rêxistinên mafên mirovan helwest nîşan bidin û piştgiriya mafên jinan bikin.